អេស្តូនី ទិញគ្រឿងសព្វាវុធពីសហរដ្ឋអាមេរិក ដើម្បីការពារខ្លួនទប់ទល់នឹងរុស្ស៊ី
នៅថ្ងៃសៅរ៍ ទី៣ធ្នូ រដ្ឋាភិបាល អេស្តូនី បញ្ជាក់ថា ខ្លួនបានចុះកិច្ចសន្យាទិញគ្រឿងសព្វាវុធសហរដ្ឋអាមេរិក ក្នុងតម្លៃទឹកប្រាក់ ២០០ លានដុល្លារ។ ការណ៍ដែល អេស្តូនី ទិញគ្រឿងសព្វាវុធពីសហរដ្ឋអាមេរិក ដើម្បីការពារខ្លួនទប់ទល់នឹងរុស្ស៊ី ជាប្រទេសជាប់ក្បែររបងគ្នា។ ជាការកត់សម្គាល់ ប្រទេសក្បែរៗរបងជិតខាងរុស្ស៊ី បានផ្តើមទិញអាវុធសម្រាប់ការពារខ្លួនកាន់តែច្រើនឡើងៗ ក្រោយពីព្រឹត្តិការណ៍ផ្ទុះសង្គ្រាមឈ្លានពានអ៊ុយក្រែន នាចុងខែកុម្ភៈមក។
ចុះផ្សាយនៅថ្ងៃ៖
ស្តាប់ - ០២:២១
ការទិញគ្រឿងសព្វាវុធសឹកសង្គ្រាមក្នុងតម្លៃ២០០លានដុល្លារបែបនេះ គឺ អេស្តូនី មិនដែលធ្លាប់ទិញឡើយ ពីមុនមក។ នេះជាលើកទី១ ដែល រដ្ឋាភិបាលក្រុងតាលីន តាមរយៈទីភ្នាក់ងារវិនិយោគវិស័យការពារជាតិអេស្តូនី បានចុះកិច្ចព្រមព្រៀងជាមួយ ក្រសួងការពារជាតិសហរដ្ឋអាមេរិក ដើម្បីទិញប្រព័ន្ធបាញ់គ្រាប់រ៉ូកែត ប្រភេទ HIMARS របស់អាមេរិក ចំនួន៦គ្រឿង ក្នុងគោលបំណងពង្រឹងកម្លាំងយោធា អេស្តូនី។ នេះតាមសេចក្តីថ្លែងការណ៍មួយរបស់រដ្ឋាភិបាល អេស្តូនី និងដែលត្រូវទីភ្នាក់ព័ត៌មានបារាំងAFP ផ្សាយថ្ងៃសៅរ៍ ទី៣ធ្នូ។
ទំនិញគ្រឿងចម្បាំងនេះ គឺជា ប្រព័ន្ធបាញ់គ្រាប់រ៉ូកែត ដែលបាញ់ពីផ្ទៃដី ហើយអាចហោះបានរយៈចម្ងាយរាប់សិប ដល់រាប់រយគីឡូម៉ែត្រ។ ពោលគឺ គ្រឿងអាវុធដែល រដ្ឋាភិបាល អេស្តូនី ទិញលើកនេះ អាចបាញ់បានចម្ងាយខុសៗគ្នា ចាប់ពីអាវុធបាញ់ហោះ ចន្លោះពី៧០គីឡូម៉ែត្រ ទៅ៣០០គីឡូម៉ែត្រ។ រដ្ឋាភិបាលក្រុងវ៉ាស៊ីនតោន ត្រូវផ្តល់ទំនិញទាំងនេះឲ្យ អេស្តូនី នៅឆ្នាំ២០២៤។ គ្រឿងច្បាំងប្រភេទនេះ សហរដ្ឋអាមេរិក ធ្លាប់បានផ្តល់ឲ្យ អ៊ុយក្រែន ដើម្បីច្បាំងទប់ទល់នឹង រុស្ស៊ី។ សហរដ្ឋអាមេរិក ក៏ធ្លាប់ប្រើវាសម្រាប់សមយុទ្ធយោធា នៅអាស៊ី ដូចជា ហ្វីលីពីន ជាដើម។
ដូចគ្នានឹង អេស្តូនី ដែរ គឺប្រទេស លីទុយអានី, ឡេតូនី ហើយនិង ប៉ូឡូញ គឺបានផ្តើមបង្កើនកម្លាំងយោធា និងបង្កើនគ្រឿងសព្វាវុធសម្រាប់ការពារខ្លួន ហើយដើម្បីវាយប្រហារតបតវិញ ក្នុងករណីមានសង្គ្រាមឈ្លានពានណាមួយកើតឡើង។ ទិដ្ឋភាពនេះ ត្រូវប្រទេសក្បែរៗខាងសហព័ន្ធរុស្ស៊ី យកចិត្តទុកដាក់ខ្លាំង គឺចាប់តាំងតែពីពេលផ្ទុះសង្គ្រាមរុស្ស៊ីលើអ៊ុយក្រែន ជាច្រើនខែមកនេះ។ នៅខែវិច្ឆិកា កន្លងទៅថ្មីៗនេះ រដ្ឋាភិបាល លីទុយអានី ក៏បានសម្តែងចេតនាចង់ទិញ គ្រឿងចម្បាំងរបស់សហរដ្ឋអាមេរិក ដូចអេស្តូនីទិញដែរ គឺចង់ទិញឲ្យបាន ៨គ្រឿង ក្នុងតម្លៃ ៤៩៥ លានដុល្លារ។
អេស្តូនី ជាប្រទេសជាប់ក្បែរព្រំរបងនឹងរុស្ស៊ី។ ចម្ងាយប្រហែល២០០គីឡូម៉ែត្រពីរដ្ឋធានីតាលីន គឺក្រុងណារវ៉ា នៅជាប់នឹងរុស្ស៊ីតែម្តង ហើយទីនោះ មានប្រជាពលរដ្ឋ៩០% ដែលប្រើប្រាស់ភាសារុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ