សហភាពអឺរ៉ុបត្រៀមផ្តល់ជំនួយសម្រាប់ការស៊ើបអង្កេតលើបទឧក្រិដ្ឋកម្មសង្រ្គាម នៅអ៊ុយក្រែន
សហភាពអឺរ៉ុបចង់សហការជាមួយតុលាការព្រហ្មទណ្ឌអន្តរជាតិដើម្បីស៊ើបអង្កេតលើបទឧក្រិដ្ឋកម្មសង្រ្គាម ដែលអាចកើតឡើងនៅក្នុងសង្រ្គាមអ៊ុយក្រែន។ នៅក្នុងសេចក្តីប្រកាសព័ត៌មានកាលពីថ្ងៃសៅរ៍ ទី ៩មេសា គណៈកម្មការអឺរ៉ុបបានអះអាងថា ប្រមុខការទូតអឺរ៉ុបត្រូវជួបរដ្ឋអាជ្ញារបស់តុលាការព្រហ្មទណ្ឌអន្តរជាតិ នៅថ្ងៃអាទិត្យនេះ ដើម្បីពិភាក្សាពីជំនួយគាំទ្រផ្នែកច្បាប់ និងបច្ចេកទេសនៅក្នុងការងារស៊ើបអង្កេតទៅលើការសម្លាប់ប្រជាជនស៊ីវិលនៅប៊ូតឆា ក្បែរទីក្រុងកៀវ ក្នុងប្រទេសអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២៧
រដ្ឋអាជ្ញាតុលាការព្រហ្មទណ្ឌអន្តរជាតិ លោកKarim Khan ត្រូវជួបពិភាក្សាជាមួយប្រមុខការទូតអឺរ៉ុបនៅថ្ងៃអាទិត្យ នៅប្រទេសលុចសំបួរ មុននឹងជួបពិភាក្សាជាមួយរដ្ឋមន្រ្តីការបរទេសរបស់បណ្តាប្រទេសសមាជិកសហភាពអឺរ៉ុប នៅថ្ងៃចន្ទ។
ជំនួបផ្ទាល់ជាមួយរដ្ឋអាជ្ញាតុលាការព្រហ្មទណ្ឌអន្តរជាតិបង្ហាញពីឆន្ទៈ ក្តីប្រាថ្នារបស់សហភាពអឺរ៉ុបដែលចង់ឲ្យមានការបើកស៊ើបអង្កេតបន្ទាន់ទៅលើករណីសម្លាប់រង្គាលប្រជាជនស៊ីវិល បន្ទាប់ពីគេឃើញមានសាកសព និងរណ្តៅសពរួម នៅក្រោយ កងទ័ពរុស្ស៊ីដកខ្លួនចេញពីទីក្រុងប៊ូតឆា ក្បែររដ្ឋធានីកៀវរបស់អ៊ុយក្រែន។
ប្រធានាធិបតីអ៊ុយក្រែន និងប្រទេសសមាជិកអឺរ៉ុបមួយចំនួន រួមទាំងអាមេរិកផង បានថ្កោលទោស ចោទប្រកាន់កងទ័ពរុស្ស៊ីថា បានប្រព្រឹត្តឧក្រិដ្ឋកម្មសង្រ្គាមនៅប៊ូតឆា ប៉ុន្តែ ម៉ូស្គូបានបដិសេធ មិនទទួលខុសត្រូវ។
នៅមុនចាកចេញពីទឹកដីអ៊ុយក្រែន កាលពីថ្ងៃសៅរ៍ ប្រធានគណៈកម្មការអឺរ៉ុប លោកស្រី អួសូឡា វ៉ុនឌែរ ឡេយែន ដែលបានធ្វើដំណើរទៅដល់កន្លែងប្រមូលសាកសព នៅទីក្រុងប៊ុតឆា បានចោទសួរថា បើសិនអ្វីដែលកើតឡើងនៅប៊ូតឆា មិនមែនជាឧក្រិដ្ឋកម្មសង្រ្គាម អីចឹង តើឧក្រិដ្ឋកម្មសង្រ្គាម គឺជាអ្វី?
យ៉ាងណាក៏ដោយ នៅក្នុងសេចក្តីថ្លែងការណ៍កាលពីថ្ងៃសៅរ៍ ថ្នាក់ដឹកនាំរបស់សហភាពអឺរ៉ុបបានអំពាវនាវឲ្យមានការប្រយ័ត្នប្រយែងថា នៅក្នុងរឿងចោទប្រកាន់ពីបទឧក្រិដ្ឋកម្មសង្រ្គាម គេត្រូវគោរពនីតិវិធីតុលាការ និងត្រូវរង់ចាំលទ្ធផលនៃការស៊ើបអង្កេតរបស់តុលាការអ៊ុយក្រែន ដែលមានជំនួយគាំទ្រពី តុលាការព្រហ្មទណ្ឌអន្តរជាតិ សហភាពអឺរ៉ុប ក្រុមប្រឹក្សាសិទ្ធិមនុស្ស និងអង្គការដើម្បីសន្តិសុខ និងសហប្រតិបត្តិការអឺរ៉ុប ហៅកាត់ថា OSCE។
ប្រធានគណៈកម្មការអឺរ៉ុប យល់ស្របដែលថា ការស៊ើបអង្កេតស្វែងរកភស្តុតាង ត្រូវតែធ្វើឡើងដោយមធ្យ័ត ត្រឹមត្រូវតាមច្បាប់ និងស្តង់ដា ដើម្បី ឲ្យបទចោទប្រកាន់ ស្តីពីឧក្រិដ្ឋកម្មសង្រ្គាមអាចទទួលយកបាននៅតុលាការព្រហ្មទណ្ឌអន្តរជាតិ។
សហភាពអឺរ៉ុបបានផ្តល់ថវិកាចំនួន ៧,៥លានអឺរ៉ូសម្រាប់ការបណ្តុះបណ្តាលរដ្ឋអាជ្ញាអ៊ុយក្រែនដើម្បីស៊ើបអង្កេតទៅលើបទឧក្រិដ្ឋកម្មប្រព្រឹត្តទៅ នៅក្នុងសង្រ្គាមឈ្លានពានរបស់រុស្ស៊ី នៅអ៊ុយក្រែន។ លើសពីនោះ សហភាពអឺរ៉ុបបានបង្កើតក្រុមស៊ើបអង្កេតរួមជាមួយភាគីអ៊ុយក្រែន ដើម្បីប្រមូលភស្តុតាងនៅប៊ូតឆា និងនៅកន្លែងផ្សេងៗទៀត ដែលអាចកើតមានការសម្លាប់មនុស្សក្នុងអំឡុងពេលត្រួតត្រារបស់កងទ័ពរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ