ការវាយប្រហារដោយកាំបិតនៅប៉ារីស ៖ ជនដៃដល់ថាខឹងកាសែតគូររូបថ្លុកព្រះមហាមេដ
ចុះផ្សាយនៅថ្ងៃ៖
ស្តាប់ - ០៧:២៤
នៅថ្ងៃសុក្រទី ២៥កញ្ញាម្សិលមិញ មានការវាយប្រហារដោយប្រើកាំបិតតាំងតោកាប់មនុស្ស នៅកណ្តាលទីក្រុងប៉ារីស ដែលបង្កឱ្យមនុស្សពីរនាក់ ជាអ្នកកាសែត រងរបួស។ ជនដៃដល់ជាប់សង្ស័យចំបងគេ មានអាយុទើបតែ១៨ឆ្នាំ កើតនៅប៉ាគីស្ថាន។ ជនជាប់សង្ស័យ៦នាក់ផ្សេងទៀតត្រូវបានចាប់ខ្លួនដែរ។ ២៤ម៉ោងក្រោយហេតុការណ៍ តើការអង្កេតបានជឿនលឿនទៅ មុខយ៉ាងណា ?
ជនដៃដល់ជាប់សង្ស័យដ៏ចំបងបំផុត ត្រូវចាប់ខ្លួនបានភ្លាមដោយសម្រួល តែប៉ុន្មាននាទីក្រោយហេតុការណ៍ និងនៅចម្ងាយប្រមាណ៥០០ម៉ែត្រពីកន្លែងកើតហេតុ។
កើតនៅក្រុងអ៊ីស្លាម៉ាបាត ប្រទេសប៉ាគីស្ថាន ថ្ងៃទី ១០សីហា ២០០២ (បើតាមសំបុត្រកំណើត) អាលី បានមកដល់ប្រទេសបារាំង កាលពីខែសីហា ២០១៨ ក្នុងនាមជាក្មេងអន្តោប្រវេសន៍ គ្មានម៉ែឪ ដែលអាជ្ញាធរបារាំងបានជួយសង្គ្រោះ និងដាក់ឱ្យស្ថិតក្រោមការគ្រប់គ្រងរបស់ភ្នាក់ងារសង្គ្រោះកុមារ នៅតំបន់ជាយក្រុងប៉ារីស។ តែដំណើរដើមទងនៃការរត់ចេញពីប៉ាគីស្ថានមក មិនទាន់ត្រូវបានវិភាគលម្អិតទេ និងគ្មានការវិភាគផ្ទៀងផ្ទាត់អាយុទេ (មុខចាស់ជាងអាយុ)។ បន្ទាប់ពីបានចេញពីមណ្ឌលគ្រប់គ្រងកុមារជាផ្លូវការនៅពេលក្លាយជាមនុស្សពេញវ័យ (១៨ឆ្នាំ) គេបានបញ្ជូនអាលីឱ្យនៅផ្ទះសំណាក់សង្គម នៅGergy ជាយទីក្រុងប៉ារីស តែអាលីបានក្លាយជាជនត្រាច់ចរ ទៅរស់នៅមួយកន្លែងទៀតក្នុងផ្ទះតូច ចែកគ្រែជាមួយពលរដ្ឋប៉ាគីស្ថានជាង១០នាក់ផ្សេងទៀត។
គ្មាននិន្នាការជាជនផ្តាច់ខ្លួននិយម
ក្នុងពេលស្ថិតក្រោមការឃុំគ្រងរបស់សង្គម គេពុំសង្កេតឃើញសញ្ញាឬនិន្នាការផ្តាច់ខ្លួនបែបជ្រុលនិយមអ៊ីស្លាមទេ។ ឈ្មោះជនដៃដល់នេះ ក៏ពុំមានក្នុងបញ្ជីភ្នាក់ងារសន្តិសុខជាតិប្រយុទ្ធប្រឆាំងនឹងភេវកម្មទេ។ ភ្នាក់ងារចារកិច្ចក៏ពុំដែលធ្លាប់ឮនិយាយអំពីជនជាប់សង្ស័យរូបនេះដែរពីមុនមកដែរ។ ប៉ុន្តែកាលពីខែមិថុនា២០២០កន្លងទៅថ្មីៗនេះ បើតាមរដ្ឋមន្ត្រីក្រសួងមហាផ្ទៃ ភ្នាក់ងារប៉ូលិស ធ្លាប់បានចាប់អាលី ពីបទមានកាន់អាវុធដែលអាចបង្កគ្រោះថ្នាក់ (តួនឺវីស) តែព្រលែងទៅវិញដោយមិនទាន់គ្រប់អាយុ។
ខឹង Charlie Hebdo
ការឆែកឆេរនៅទីស្នាក់ទាំងពីរកន្លែងរបស់អាលី មិនទាន់អាចអនុញ្ញាតឱ្យគេកំណត់បាននៅឡើយទេសម្រាប់ពេលនេះ ថាអាលីមានចំណងជាមួយក្រុមជីហាត ឬ ជំនឿសាសនា មនោគមវិជ្ជាណាមួយជាពិសេសទេ។ ក្រុមអង្កេតបានរឹបអូសទូរស័ព្ទដៃយកទៅ វិភាគ។ អ្នកអង្កេតកំពុងផ្ចង់ទិសតាមដានលើលក្ខណៈបុគ្គល លង់តាមបរិបទនយោបាយនិងព័ត៌មានច្រើនជាង មានជាអាទិ៍ទំនោរលង់ទៅតាមការអូសទាញរបស់អាល់កៃដានៅឧបទ្វីបអារ៉ាប ផ្សព្វផ្សាយកាលពីថ្ងៃទី ១១កញ្ញា និងចរន្តបាតុកម្មនៅ ប៉ាគីស្ថាន បន្ទាប់ពីកាសែតឆាលីអេបដូ បានគូសរូបថ្លុកព្រះអាឡានៅទំព័រមុខជាថ្មីកាលពីដើមខែ។
បើតាមប្រភពអង្កេតនៅព្រឹកថ្ងៃសៅរ៍នេះ អាលីបានទទួលស្គាល់ថាទង្វើវាយប្រហាររបស់ខ្លួន ជាប្រតិកម្មតបទៅនឹងរូបថ្លុក ព្រះអាឡា របស់កាសែតឆាលីអេបដូ កាលពីថ្ងៃទី ២ កញ្ញា។ ជាទង្វើដោយចេតនា គិតប៉ងទុក បង្កប់អត្ថន័យនយោបាយ តែរឿងបុព្វហេតុសាសនា គេត្រូវការអង្កេតស៊ីជម្រៅបន្ថែមទៀត។
ចាប់ខ្លួនជនជាប់សង្ស័យ៧នាក់
រហូតមកទល់នឹងពេលនេះ អាលីបានអះអាងថាធ្វើសកម្មភាពតែម្នាក់ឯងទេ។ ម្សិលមិញ ក្រោយហេតុការណ៍ភ្លាម នគរបាលបានចាប់ខ្លួនជនសង្ស័យម្នាក់ទៀត អាយុ៣៣ឆ្នាំ កើតនៅអាល់ហ្សេរី នៅកៀកកន្លែងកើតហេតុតែម្តង។ ជននេះបានជួបនិយាយជាមួយជនសង្ស័យប៉ាគីស្ថាននៅក្នុងយានជំនិះសាធារណៈ។ តែត្រូវបានអាជ្ញាធរដោះលែងទៅវិញ ដោយក្រោយការសាកសួរដឹហថាគាត់ជាសាក្សី ដេញតាមជនដៃដល់ និងបានសាកល្បងចាប់ជនដៃដល់ទេ។ នេះបើតាមមេធាវីរបស់គាត់។
ក្រៅពីនេះ នៅមានការចាប់ខ្លួនជនសង្ស័យ៦នាក់ផ្សេងទៀត។ ៥នាក់ (កើតនៅចន្លោះពីឆ្នាំ១៩៨៣-១៩៩៦) ជាជនដែលរស់នៅក្នុងផ្ទះជាមួយអាលី និងម្នាក់ទៀតជាអតីតអ្នកធ្លាប់រស់នៅក្នុងបន្ទាប់ជាមួយក្នុងផ្ទះសំណាក់សង្គម។
បរិបទភេរវកម្ម
អាជ្ញាធរប្រយុទ្ធប្រឆាំងនឹងភេរវកម្មបារាំង បានក្តាប់សំណុំរឿងនិងប្រកាសបើកអង្កេត ពីបទភេរវកម្មភ្លាម ព្រោះមានហេតុផលបីយ៉ាង ៖
ទីមួយ ទីកន្លែងនៃការវាយប្រហារ ស្ថិតនៅចំពីមុខទីស្នាក់ការកាសែតឆាលីអេបដូ ដែលរងការវាយប្រហារភេរវកម្មកាលពីឆ្នាំ២០១៥។ ចំណែកជនរងគ្រោះទាំងពីរ ជាអ្នកកាសែតដែលជាបុគ្គលិករបស់ភ្នាក់ងារព័ត៌មានទូរទស្សន៍ Premiere lignes។ បុគ្គលិកបំរើការក្នុងក្រុមហ៊ុននេះធ្លាប់ជាសាក្សី និងចូលសង្គ្រោះមិត្តរួមអាជីពឆាលីអេបដូ មុនគេ ពេលរងការបាញ់ប្រហារភេរវកម្មឆ្នាំ២០១៥។
ទីពីរ គឺ ពេលវេលា នៃការវាយប្រហារ។ ហេតុការណ៍បានកើតឡើងក្នុងខណៈដែលសវនការកាត់ទោសជនជាប់ចោទពាក់ព័ន្ធនឹងភេរវកម្មឆ្នាំ២០១៥ និងក្នុងខណៈដែលកាសែតឆាលីអេបដូទើបរងការគំរាមកំហែងជាថ្មីបន្ទាប់ពីបានបោះផ្សាយរូបថ្លុកព្រះអាឡាលើទំព័រមុខកាលពីថ្ងៃទី ២កញ្ញា។
ទីបី គឺប្រភេទអាវុធ។ របៀបវាយប្រហារបានបង្ហាញថាជនដៃដល់មានចេតនាប៉ុនប៉ងធ្វើសកម្មណាមួយដែលប៉ះពាល់ដល់ជីវិតមនុស្ស។
ការវាយប្រហារបែបនេះ ជាទម្រង់មួយនៃការវាយប្រហារភេរវកម្មអ៊ីស្លាមជ្រុលនិយម។ នេះបើតាមលោករដ្ឋមន្ត្រីក្រសួងមហាផ្ទៃ កាលពីម្សិលមិញ ដោយបានសម្តែងការសោកស្តាយចំពោះទង្វើវាយប្រហារបង្ហូរឈាមថ្មីប្រឆាំងនឹងបារាំង។ តែលោករដ្ឋមន្ត្រី ក៏បានទទួលស្គាល់ថាបារាំងមើលស្រាលការគំរាមកំហែងភេរវកម្មទើបហេតុការណ៍ម្សិលមិញអាចកើតឡើងបាន។ ក្រោយភេរវកម្មឆ្នាំ២០១៥ កាសែតឆាលីអេបដូ បានរើទៅកាន់ទីតាំងថ្មី ដែលលាក់ជាសម្ងាត់ដើម្បីសុវត្ថិភាព។ ឯទីតាំងចាស់ ត្រូវបានរដ្ឋាភិបាលគិតថាលែងជាកន្លែងរងការគំរាមកំហែងទៀតហើយ និងក៏គ្មានការការពារអ្វីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ