សហភាពអឺរ៉ុប មិនចង់ឃើញ បេឡារុស ក្លាយជា«អ៊ុយក្រែនទី២»
ចុះផ្សាយនៅថ្ងៃ៖
ស្តាប់ - ០៦:១៤
ប្រធានាធិបតីបេឡារុស Loukachenko ពីថ្ងៃទី២២សីហា បញ្ជាឱ្យប្រើកម្លាំងយោធាដើម្បីការពារបូរណភាពទឹកដី និងអនុញ្ញាតឱ្យចល័តទ័ពទៅទប់ទល់សភាពការនៅព្រំប្រទល់ដែន ព្រោះលោកថា មានសញ្ញាណគំរាមកំហែងពីអង្គការអូតង់ នៅជាប់ ប៉ូឡូញ និង លីទុយអានី។ ក៏ប៉ុន្តែ អង្គការអូតង់ ប្រកាសតបភ្លាមៗ ថា គ្មានពង្រឹងទ័ព នៅព្រំដែន បេឡារុស នោះឡើយ។ ថ្នាក់ដឹកនាំប៉ូឡូញ និង លីទុយអានី ក៏ចោទបកវិញថា ប្រធានាធិបតី Loukachenko កំពុងតែបង្វែរសាច់រឿង និងនិយាយផ្តេសផ្តាស គ្មានមូលដ្ឋានច្បាស់លាស់។ ទោះយ៉ាងនេះក្តី សំណុំរឿងបេឡារុស អាចនឹងកាន់តែក្តៅ ឬអាចនឹងថយមកត្រជាក់វិញ ក៏ថាបាន នៅពេលដែលមានដំណើរទស្សនកិច្ចរបស់អនុរដ្ឋមន្ត្រីអាមេរិក ទៅប្រទេស លីទុយអានី ជាប់ព្រំដែន បេឡារុស នៅថ្ងៃចន្ទ។ ចំណែក សហភាពអឺរ៉ុបវិញ មិនចង់ឃើញ បេឡារុស ជាអ៊ុយក្រែនទី២ឡើយ។
បាតុកម្មនៅបេឡារុស ធ្វើឡើងជិត២សប្តាហ៍មកហើយ ប្រឆាំងនឹងលទ្ធផលបោះឆ្នោតប្រធានាធិបតី។ នៅថ្ងៃអាទិត្យ បាតុកម្មកាន់តែមានច្រើន ព្រោះក្រុមបាតុករខឹងខ្លាំងនឹងសម្តីរបស់ប្រធានាធិបតី ដែលជំរុញឱ្យប្រើកម្លាំងទ័ព។
បាតុកម្មនៅបេឡារុស គិតមកដល់ពេលនេះ មានស្លាប់មនុស្ស យ៉ាងតិច ៣ នាក់ រាប់រយនាក់ របួស និងរាប់សិបនាក់ ត្រូវចាប់ខ្លួន។ មេបក្សប្រឆាំងលោកស្រី Tikhanovskaya នៅតែបន្តចាក់ប្រេងសាំង ផ្លុំផ្សែង បញ្ឆេះភ្លើងកំហឹងពលរដ្ឋ ដោយពោលពីបរទេសថា «បើមិនធ្វើបាតុកម្មពេលនេះទេ អស់ឱកាសទាមទារសិទ្ធិរបស់អ្នកហើយ។» និងថា «លោក Loukachenko បានកាន់អំណាចដោយកណ្តាប់ដៃដែក អស់២៦ឆ្នាំមកហើយ យើងមិនអាចបន្តមើលមេដឹកនាំផ្តាច់ការ ដឹកនាំប្រទេសបែបនេះ តទៅទៀត នោះទេ។»
ដោយបានមើលឃើញពីកំហឹងបាតុករកាន់តែឆេះរោល ដែលជាឱកាសល្អផង លោកស្រីមេបក្សប្រឆាំងដែលកំពុងគេចនិរទេសខ្លួន បានជំរុញឱ្យអ្នកគាំទ្របន្តបាតុកម្ម កុំឈប់ ហើយកុំខ្លាច ព្រោះថា នេះការតស៊ូដើម្បីទាមទារសិទ្ធិសេរីភាពរបស់ពួកគេ។
នៅថ្ងៃអាទិត្យ មានការប្រមូលផ្តុំមនុស្សកាន់តែច្រើនជាងថ្ងៃមុនៗទៀត ពិសេសក្រុមនារីៗ ក៏ចេញមកធ្វើបាតុកម្មយ៉ាងសន្ធឹក ព្រោះខឹងនឹង ប្រធានាធិបតី Alexandre Loukachenko ដែលបញ្ជាឱ្យប្រើកម្លាំងនិងវិធានការឱ្យតឹងតែងបំផុត ទោះក្នុងតម្លៃណាក៏ដោយ។ សម្តីនេះ ដូចយកប្រេងសាំង ចាក់លើភ្លើងអ៊ីចឹង។
គួររម្លឹកត្រង់នេះបន្តិចថា ថ្ងៃសៅរ៍ទី២២សីហា ពេលកំពុងតែត្រួតពលនៅព្រំដែន លោក Loukachenko ប្រកាសថា មានកម្លាំងពីខាងក្រៅ មករួមដៃនឹងហ្វូងបាតុករ គឺហូរចូលពីច្រកព្រំដែន ប៉ូឡូញ និងលីទុយអានី។ នៅក្នុងនោះ លោកក៏ចង្អុលមុខអង្គការអូតង់ផង។ លោកក៏បញ្ជាថាឱ្យកងទ័ពត្រៀមខ្លួន ដើម្បីការពារបូរណភាពទឹកដី ហើយកម្លាំងយោធាត្រូវតែស្ថិតនៅក្នុងសភាពត្រៀមប្រយុទ្ធជានិច្ច។
អូតង់ ច្រានចោលការប្រកាសរបស់ប្រធានាធិបតីបេឡេរុស ហើយនិងថា ជា«ការចោទប្រកាន់ដែលគ្មានមូលដ្ឋាន»
លោកស្រី Oana Lungescu អ្នកនាំពាក្យអង្គការសន្ធិសញ្ញាអាត្លង់ទិកខាងជើង ហៅកាត់ថា អូតង់ ឬណាតូ បានបញ្ជាក់ច្បាស់ ក្នុងសេចក្តីថ្លែងការណ៍ខ្លីមួយថា «អូតង់គ្មានពង្រឹងទ័ពឬប្រមូលកម្លាំងកងទ័ពនៅតំបន់ព្រំដែន បេឡារុស នោះទេ។ នេះជាជំហរច្បាស់ណាស់ ហើយ អូតង់ ក៏មិនមែនជាហេតុនៃការគំរាមកំហែងចំពោះបេឡារុស នោះដែរ។»
ចំណែក នាយខុទ្ទការល័យប្រធានាធិបតីប៉ូឡូញ ប្រតិកម្មតបនៅយប់ថ្ងៃសៅរ៍ ថា «គួរឱ្យអស់សំណើច អស្ចារ្យដែរ តែវាមិនធ្វើឱ្យពេញចិត្តសោះ។» ការដែលប្រធានាធិបតីបេឡារុស Loukachenko ថាអូតង់កំពុងពង្រាយទ័ពនៅជាប់ព្រំដែនអីនោះ ជារឿងគ្មានមូលដ្ឋានទាល់តែសោះ។ សម្តីនេះ គឺគ្រាន់តែជាពាក្យដើម្បីជំរុញការគាំទ្ររបបកាន់តែអំណាចបេឡារុស តែប៉ុណ្ណោះ។
ស្រដៀងគ្នានេះដែរ ប្រធានាធិបតី លីទុយអានី លោក Gitanas Nauseda បានប្រតិកម្ម តាំងពីថ្ងៃសៅរ៍ដែរ ថា «លោក Loukachenko កំពុងកាច់មួលបង្វែរពីវិបត្តិផ្ទាល់ខ្លួនក្នុងស្រុក មកបំភ្លៃជាបញ្ហាព្រំដែន និងថាជាបញ្ហាមកពីក្រៅ។ នេះការស្រមៃ និងបំភ្លៃជ្រុលហួស។»
គេត្រូវយល់ថា ភូមិសាស្ត្ររបស់ បេឡារុស គឺក្តីបារម្ភពិតមែនសម្រាប់លោកប្រធានាធិបតី Loukachenko ព្រោះថា បេឡារុស ខាងត្បូងជាប់ អ៊ុយក្រែន ហើយភាគខាងជើងនិងខាងកើត ជាប់រុស្ស៊ី ដែលជាខ្នងបង្អែកស្រាប់។ មិនសូវអីទេ។ ក៏ប៉ុន្តែ ផ្នែកខាងលិច ហើយភាគប៉ែកខ្លះនៃខាងជើង គឺជាប់នឹងប្រទេស ប៉ូឡូញ លីទុយអានី ឡេតូនី ដែលសុទ្ធសឹងតែជាបណ្តារដ្ឋសមាជិករបស់អង្គការអូតង់។ ដូច្នេះហើយ ទើបលោក Loukachenko ខ្លាចរអាផងថា អូតង់អាចវាយសង្គ្រប់មក ហើយលោកក៏យករឿងនេះ ជាលេសដែរ។
លោក Loukachenko យករឿងព្រំដែននេះ ជាលេស ព្រោះអាចធ្វើជាឃោសនាគាំទ្រប្រមូលកម្លាំងស្នេហាជាតិ ប្រមូលកម្លាំងអ្នកដែលអ្នកស្អប់អាមេរិក ស្អប់អូតង់ ឱ្យមកនៅខាងគាត់ ហើយនិងធ្វើឱ្យឃើញថា មានតែគាត់ទេ និងរុស្ស៊ី ទេ ទើបអាចជួយការពារបូរណភាពទឹកដី បេឡារុស បាន។
«អាមេរិកលូកដៃក្នុងបញ្ហា បេឡារុស ?»
អនុរដ្ឋមន្ត្រីការបរទេសអាមេរិក លោក Stephen Biegun នឹងបំពេញទស្សនកិច្ចនៅ លីទុយអានី ថ្ងៃចន្ទ ទី២៤សីហា ហើយនឹងបន្តចេញទៅ រុស្ស៊ី ថែមទៀត ថ្ងៃអង្គារនិងថ្ងៃពុធ។ ដំណើរទស្សនកិច្ចរបស់មន្ត្រីថ្នាក់ដឹកនាំការទូតអាមេរិកនេះ ផ្តោតឧទ្ទិសសំខាន់ចំពោះបញ្ហាស្ថានការណ៍ បេឡារុស តែម្តង។ នេះបើតាមការផ្សាយរបស់ក្រសួងការបរទេស លីទុយអានី និងភ្នាក់ងារព័ត៌មានបារាំង AFP។
មន្ត្រីទូតលីទុយអានី លោក Vygaudas Usakas គិតថា វត្តមានរបស់មន្ត្រីជាន់ខ្ពស់ លំដាប់លេខ២ នៃក្រសួងការបរទេសសហរដ្ឋអាមេរិក នៅឱកាសនេះ គឺជាសញ្ញាមួយក្នុងដំណោះស្រាយនៅ បេឡារុស។
តាមមនុស្សស្និទ្ធនឹងលោកស្រី Tikhanovskaya មេបក្សប្រឆាំងបេឡារុស ដែលកំពុងភៀសនិរទេសខ្លួននៅ លីទុយអានី គឺ លោកអនុរដ្ឋមន្ត្រីការទូតអាមេរិក ក៏នឹងទទួលជួបពិភាក្សាជាមួយលោកស្រីមេបក្សប្រឆាំងនេះដែរ។ដូច្នេះ ទំនងជាដើមសប្តាហ៍ថ្មី ចាប់ពីថ្ងៃចន្ទ គេអាចនឹងមើលឃើញស្ថានការណ៍វិវឌ្ឍថ្មីថែមទៀត។
«បេឡារុស មិនមែនជាអ៊ុយក្រែនទី២ទេ»
សហភាពអឺរ៉ុប បានតាមដានរឿងនេះយ៉ាងកៀកកិត។ ក្រៅពីប្រកាសមិនទទួលស្គាល់លទ្ធផលបោះឆ្នោតរបស់បេឡារុស សហភាពអឺរ៉ុប ថែមទាំងគំរាមដាក់ទណ្ឌកម្មចំពោះរដ្ឋាភិបាល បេឡារុស ទៀតផង។
ប្រមុខការទូតសហភាពអឺរ៉ុប Josep Borrell បានបង្ហាញទស្សនៈ នៅថ្ងៃអាទិត្យទី២៣សីហា ថា បញ្ហាបេឡារុស គឺមិនមែនជា«អ៊ុយក្រែនទី២»ទេ ហើយសហភាពអឺរ៉ុបក៏គ្មានចេតនាធ្វើដូច្នោះដែរ។ រឿងនេះទំនងជាមិនគួរមានការប្រឈមមុខគ្នាដោយកម្លាំងនោះឡើយ ព្រោះស្ថានភាពបេឡារុស ខុសពីអ៊ុយក្រែន ឆ្នាំ២០១៤។ អ៊ុយក្រែន ជំនាន់នោះ ដែលត្រូវជ្រើសរើសរវាង អឺរ៉ុប និងរុស្ស៊ី ហើយទើបវាបណ្តាលនាំឱ្យមានហិង្សាបង្ហូរឈាម។ ក៏ប៉ុន្តែ បេឡារុស គឺជារឿងរបស់ប្រជាពលរដ្ឋ ដែលត្រូវជ្រើសរើសសិទ្ធិសេរីភាព និងលិទ្ធិប្រជាធិបតេយ្យរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ