WHO/OMS សង្ឃឹមថានឹងយកឈ្នះកូវីដ១៩ ក្នុងរយៈពេល២ឆ្នាំ ខណៈការឆ្លងរាលដាលកំពុងកើនឡើងខ្លាំង
ចុះផ្សាយនៅថ្ងៃ៖
ស្តាប់ - ០៨:៣៧
លោកអគ្គលេខាធិការអង្គការសុខភាពពិភពលោក បានថ្លែងនៅក្នុងសន្និសីទកាលពីថ្ងៃសុក្រម្សិលមិញថា ក្រុមអ្នកជំនាញរបស់អង្គការនេះ សង្ឃឹមថាពិភពលោកយើង នឹងអាចយកឈ្នះ ជម្ងឺកូវីដ១៩ ក្នុងរយៈពេល មិនលើសពី២ឆ្នាំ បើសិនជាគ្រប់គ្នា រួមកម្លាំងនិងមធ្យោបាយ ឲ្យមានប្រសិទ្ធិភាព។ ទោះជាយ៉ាងនេះក្តី គេសង្កេតឃើញថា ការឆ្លងរាលដាលនូវជម្ងឺកូវីដ១៩ បានហក់សន្ទុះខ្លាំងឡើងវិញ ក្នុងរយៈពេលប៉ុន្មានសប្តាហ៍ចុងក្រោយនេះ ជាពិសេសនៅតាមប្រទេសតំបន់អឺរ៉ុប និងតំបន់ដើមបូព៌ា។
គេសង្កេតឃើញថា ការឆ្លងរាលដាល ហាក់បានស្ទុះកើនឡើងខ្លាំងណាស់ ប្រមាណជា៣ ទៅ ៤សប្តាហ៍ចុងក្រោយនេះ។ ជាពិសេសគឺតាមប្រទេសតំបន់អឺរ៉ុបតែម្តង ដោយសារតែអំឡុងពេលនេះ ជាពេលវិស្សមកាលសម្រាក ហើយមនុស្សចេញទៅលំហែរ នៅតាមតំបន់ទេសចរណ៍គ្រប់ៗគ្នា។ អ្នកជំនាញជឿថា ប្រការនេះវាបានធ្វើឲ្យមេរោគកូរ៉ូណា អាចចល័តឆ្លងរាលដាលច្រើន។
អេស្ប៉ាញ ២៤ម៉ោងចុងក្រោយ មានអ្នកឆ្លងថ្មី៨០០០នាក់
នៅបារាំង ២៤ម៉ោងចុងក្រោយនេះ មានអ្នកឆ្លងថ្មីចំនួនដល់ទៅជាង៤៥០០នាក់។ ២ថ្ងៃជាប់គ្នាហើយ ដែលគេរកឃើញមានអ្នកឆ្លងថ្មីជាង៤០០០នាក់។ ករណីឆ្លងជាក្រុម បានកើនឡើងខ្លាំង គួរឲ្យបារម្ភ។ អាជ្ញាធរបារាំង នៅតាមទៅក្រុងធំៗមួយចំនួន ដូចជា ប៉ារីស នីស ម៉ាកសី ទូលូហ្ស និងលីយ៉ុងជាដើម សុទ្ធតែបានដាក់ចុះវិធានការបន្ថែម តម្រូវឲ្យពាក់ម៉ាសនៅតាមផ្លូវ និងទីសាធារណៈ។
នៅអេស្ប៉ាញវិញ ធ្ងន់ធ្ងរជាងបារាំងទៅទៀត។ ២៤ម៉ោងចុងក្រោយនេះ គេរកឃើញអ្នកឆ្លងថ្មី ដល់ទៅជាង៨០០០នាក់។ អាជ្ញាធរអេស្ប៉ាញ បានចេញវិធានការបិទខ្ទប់ទាំងស្រុងឡើងវិញ នៅទីតាំងមួយចំនួន ដែលមានផ្ទុះការឆ្លងរាលដាល។ ចំណែកនៅអង់គ្លេសវិញ ស្ថានការណ៍ក៏ធ្ងន់ដែរ។ អាជ្ញាធរអង់គ្លេស កំពុងតាមដានខ្លាំងបំផុត នៅទីក្រុង Birmingham និងបានហាមឃាត់ប្រជាជននៅទីក្រុងមួយចំនួន មិនឲ្យជួបប្រាស្រ័យជាមួយអ្នកណាផ្សេង ក្រៅពីសមាជិកគ្រួសារ ក្នុងផ្ទះជាមួយគ្នាទេ។ នៅស្វ៊ីសវិញ អ្នកឆ្លងថ្មី មានចំនួនប្រមាណ៣០០នាក់ សឹងតែរាល់ថ្ងៃ។ នៅអាល្លឺម៉ង់ នៅបែលហ្សិក និងនៅដាណឺម៉ាក គឺចំនួនអ្នកឆ្លងថ្មី សុទ្ធតែបានកើនឡើងទាំងអស់។
នៅតំបន់ដើមបូព៌ា និងអាហ្វ្រិកខាងជើង ក៏មិនខុសគ្នាប៉ុន្មានដែរ។ អាជ្ញាធរលីបង់ ទើបតែបានប្រកាសបិទខ្ទប់ប្រទេសទាំងស្រុង រយៈពេល២សប្តាហ៍។ នៅសហរដ្ឋអាេមរិក ស្ថានការណ៍ មិនទាន់ធូរស្រាលទេ គឺនៅតែធ្ងន់ដដែល។ ២៤ម៉ោងចុងក្រោយ មានអ្នកស្លាប់ ១០៦៧នាក់ ហើយអ្នកឆ្លងថ្មី មានចំនួន៤៧០៣១នាក់។
ចំណែកនៅអាស៊ីវិញ កូរ៉េខាងត្បូង កំពុងតែព្រួយបារម្ភខ្លាំង បន្ទាប់ពីបានរកឃើញអ្នកឆ្លងថ្មី មួយថ្ងៃជាង៣០០នាក់ ២ថ្ងៃជាប់គ្នា។ អាជ្ញាធរកូរ៉េខាងត្បូង បានចេញវិធានការបន្ថែម ឲ្យមនុស្សរក្សាគម្លាតពីគ្នា បិទហាងខារ៉ាអូខេ បិទសារមន្ទីរ និងភោជនីយដ្ឋានខ្លះ នៅទីក្រុងសេអ៊ូល និងតំបន់ជុំវិញទីក្រុងនេះ។ ឆ្នេរសមុទ្រនៅទូទាំងប្រទេស ក៏ត្រូវហាមឃាត់មិនឲ្យមានមនុស្សទៅដែរ។ រដ្ឋមន្ត្រីសុខាភិបាលកូរ៉េខាងត្បូងអះអាងថា ប្រទេសនេះកំពុងស្ថិតនៅក្បែរគ្រោះថ្នាក់ នៃរលកឆ្លងរាលដាលខ្លាំង ជាលើកទី២។
មានអ្នកឆ្លងថ្មីច្រើន តែភាគច្រើនមិនមានអការៈជំងឺ
តែទោះបីជាយ៉ាងនេះក្តី អ្នកជំនាញនៅអឺរ៉ុប មួយចំនួន បានលើកឡើងថា ករណីឆ្លងថ្មី បានកើនឡើងច្រើនមែន ក៏ប៉ុន្តែមិនសូវជាគួរឲ្យបារម្ភទេ។ គេបានលើកហេតុផលជាច្រើន ដូចជាករណីថា ភាគច្រើននៃអ្នកឆ្លងថ្មីទាំងនោះ គឺជាក្មេងៗ យុវជន មនុស្សពេញកម្លាំង ហើយដែលមិនមានចេញជាអការៈរោគ ឈឺធ្ងន់ធ្ងរឡើយ។
នៅបារាំង បើយើងពិនិត្យ លើតួលេខជាក់ស្តែង គឺយើងឃើញថា អ្នកឆ្លងថ្មីកើនឡើងមែន តែចំនួនអ្នកជំងឺធ្ងន់ធ្ងរ ដែលត្រូវសង្រ្គោះបន្ទាន់ មិនកើនឡើងទេ ឬក៏កើនតិចបំផុត។ ក្នុងចំណោមចំនួនអ្នកឆ្លងថ្មី ដែលគេរកឃើញ គឺមានពាក់កណ្តាលមិនមានអការៈរោគទេ ហើយក្រៅពីនោះ ភាគច្រើន គ្រាន់តែក្តៅខ្លួនបន្តិចបន្តួច ហើយក៏ជាសះស្បើយទៅវិញ។ តែយ៉ាងណា អ្នកជំនាញមួយចំនួនទៀត លើកឡើងថា មិនត្រូវមើលស្រាលទេ ព្រោះថាមិនយូរមិនឆាប់ ពួកអ្នកឆ្លងថ្មីទាំងនេះ នឹងនាំមេរោគនេះទៅចម្លងដល់មនុស្សចាស់ ឬមនុស្សងាយរងគ្រោះ។ ដូច្នេះក្នុងពេលដ៏ឆាប់ ចំនួនអ្នកឈឺធ្ងន់ ដោយកូវីដ១៩ អាចនឹងកើនឡើងខ្លាំង បើសិនជាគ្មានវិធានការទប់ស្កាត់ ឲ្យមានប្រសិទ្ធិភាពទេនោះ។
កូរ៉ូណាវីរុស បំលែងខ្លួន ខ្សោយជាងមុន?
ដោយឡែក មានហេតុផលមួយទៀត ដែលគេបានលើកឡើងថា មេរោគកូរ៉ូណាវីរុសដែលកំពុងចល័ត ឆ្លងរាលដាលនាពេលបច្ចុប្បន្ននេះ គឺវាបានបំលែងខ្លួនប្តូរទំរង់ ឆ្លងរហ័សមែន តែវាមានកម្រិតគ្រោះថ្នាក់ដល់សុខភាព តិចជាងអាមេរោគដើម ដែលឆ្លងរាលដាល កាលពីខែកុម្ភៈ ខែមីនា។ នេះបើផ្អែក តាមការពន្យល់ របស់លោក Brendan Wren សាស្ត្រាចារ្យនៅសាលាវិជ្ជសាស្ត្រតំបន់ត្រូពិក នៅទីក្រុងឡុងដ៍។ យ៉ាងណាមិញ របាយការណ៍ស្រាវជ្រាវមួយ ត្រូវបានទស្សនាវត្តី Cell ចុះផ្សាយថ្មីៗនេះ ក៏បានសន្និដ្ឋានប្រហាក់ប្រហែលគ្នាដែរ ពោលគឺកូរ៉ូណាវីរុស ដែលកំពុងចរាចរនៅអឺរ៉ុប នាពេលបច្ចុប្បន្ននេះ គឺទំនងជាខ្សោយមិនសូវគ្រោះថ្នាក់ខ្លាំងដល់ជីវិតទេ។
ក៏ប៉ុន្តែអ្នកវិភាគខ្លះទៀត លើកឡើងថា ទម្រង់កូរ៉ូណាវីរុសដែលចរាចរនាពេលបច្ចុប្បន្ននេះ គឺត្រូវបានគេរកឃើញថា វាមានវត្តមាននៅអឺរ៉ុប តាំងតែពីខែមេសាម្លេះ ពោលគឺក្នុងអំឡុងពេលរលកឆ្លងខ្លាំង លើកទី១។ ដូច្នេះបើថាទម្រង់មេរោគនេះ មិនគ្រោះថ្នាក់ខ្លាំងដល់ជីវិតនាពេលនេះ គឺវាហាក់ដូចជាត្រឹមត្រូវទេ។
យ៉ាងណាក៏ដោយ កម្រិតគ្រោះថ្នាក់បណ្តាលមកពីការឆ្លងរាលដាលនេះ គឺវាខុសគ្នាពីប្រទេសមួយ ទៅប្រទេសមួយ។ ស្ថានការណ៍មិនដូចគ្នាទេ រវាងករណីនៅអឺរ៉ុប នៅអាស៊ី និងនៅអាមេរិក។ វាអាស្រ័យផងដែរ ទៅលើកត្តាសុខភាពជាទូទៅ របស់ប្រជាជននៅក្នុងតំបន់នីមួយ។ សម្រាប់ប្រជាជនដែលមានជំងឺប្រចាំកាយស្រាប់ ដូចជាជម្ងឺលើសឈាម ជម្ងឺធាត់ចុកខ្លាញ់ ជម្ងឺបេះដូង ឬទឹកនោមផ្អែមជាដើម គឺថាពួកគេអាចងាយរងគ្រោះ ច្រើនជាអ្នកមានសុខភាពមាំមួន បើសិនជាឆ្លងកូវីដ១៩។ ដូច្នេះ សុខភាព និងសារពាង្គកាយមាំមួយ របស់មនុស្ស ដែលប្រែប្រួលពីតំបន់មួយទៅតំបន់មួយ ក៏វាអាចជួយទប់កម្លាំងវាយលុក របស់កូរ៉ូណាវីរុសដែរ។
យកឈ្នះកូវីដ១៩ ក្នុងរយៈពេល២ឆ្នាំ
លោកអគ្គលេខាធិការអង្គការសុខភាពពិភពលោក លើកឡើងនៅក្នុងសន្និសីទកាសែត កាលពីល្ងាចថ្ងៃសុក្រ ទី២១សីហា ថា គេសង្ឃឹមថានឹងយកជំងឺកូវីដ១៩នេះឲ្យបាន ក្នុងរយៈពេល២ឆ្នាំ។ លោកពន្យល់ថា អាចយកឈ្នះបាន គឺទាល់តែគ្រប់គ្នា ប្រមូលកម្លាំងរួមគ្នា សហការគ្នា រកមធ្យោបាយ និងផ្តល់លទ្ធភាព ដើម្បីប្រយុទ្ធប្រឆាំងនឹងមេរោគនេះ។ អ្វីដែលសំខាន់នោះ គឺថ្នាំវ៉ាក់សាំង ដែលកំពុងរំពឹងរងចាំ។
តាមពិតទៅ សម្តីរបស់លោកអគ្គលេខាធិការអង្គការសុខភាពពិភពលោកនេះ គឺវាមានខ្លឹមសារ ជាសារអំពាវនាវច្រើនជាង។ ពោលគឺលោកចង់អំពាវនាវ ឲ្យក្រុមអ្នកជំនាញស្រាវជ្រាវ ព្រមទាំងរដ្ឋាភិបាលប្រទេសធំៗទាំងអស់ ត្រូវតែរួមកម្លាំងគ្នា មិនត្រូវប្រជែងយកឈ្នះគ្នា ឈ្លោះប្រកែកគ្នា ដើម្បីការការពារផលប្រយោជន៍ តែរៀងៗខ្លួននោះទេ។ ដូចយើងឃើញហើយថា កូវីដ១៩នេះ មិនស្គាល់ព្រំដែន មិនរើសអើងជាតិសាសន៍ណាទេ។ ដូច្នេះ គេមិនអាចយកឈ្នះវាបានទេ បើសិនជាមិនរួមកម្លាំងគ្នា។
លោកអគ្គលេខាធិការអង្គការសុខភាពពិភពលោក សង្ឃឹមថា ជាមួយនឹងកូវីដ១៩នេះ គេនឹងត្រូវចំណាយពេលតិចជាង កាលពីជំនាន់ជំងឺគ្រុនអេស្ប៉ាញុល កាលពីឆ្នាំ១៩១៨ ដែលកាលនោះ មនុស្សប្រមាណ៥០លាននាក់ បានស្លាប់បាត់បង់ជីវិត។ សម្រាប់ស្ថានភាពបច្ចុប្បន្ននេះវិញ លោកបានលើកឡើងថា ពិភពលោកមានការរីកចំរើនច្រើន មានសមត្ថភាពវិទ្យាសាស្រ្តខ្ពស់ ក្នុងការយកឈ្នះកូវីដ១៩ ហើយជាពិសេសនោះ គឺយើងមានឆន្ទៈរួមគ្នា ក្នុងការប្រយុទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ