ហេតុអ្វីរុស្ស៊ីជាគោលដៅវាយប្រហារភេរវកម្មរបស់ក្រុមជីហាតអង្គការរដ្ឋអ៊ីស្លាមនៅពេលនេះ?
នៅថ្ងៃសុក្រទី ២២ មីនា ថ្ងៃតែមួយដែលខ្មាន់កាំភ្លើងចូលបាញ់សម្លាប់មនុស្ស នៅក្នុងសាលតន្រ្តីនៅជាយក្រុងម៉ូស្គូ ក្រុមជីហាត Khorassan បានប្រកាសចេញមុខភ្លាម ទទួលខុសត្រូវថា ជាស្នាដៃរបស់ក្រុមខ្លួន។ ប៉ុន្តែ រុស្ស៊ី តាំងពីមេដឹកនាំកំពូលលោកពូទីន រហូតដល់ក្រុមស៊ើបការណ៍សម្ងាត់ បដិសេធ ធ្វើមិនដឹងមិនលឺការទាមទាររបស់ក្រុមជីហាត ហើយបែរជានិយាយចោទចង្អុលមុខអ៊ុយក្រែនថាជារឿងបង្កហេតុ។ ទើបតែនៅថ្ងៃចន្ទទី ២៥ មីនា ប្រធានាធិបតីរុស្ស៊ី លោកពូទីន នៅទីបំផុតបាននិយាយទទួលស្គាល់ចុងមាត់ចុងកថា ភេរវកម្មសម្លាប់មនុស្ស នៅសាលតន្រ្តីនៅជាយក្រុងម៉ូស្គូ កាលពីយប់ថ្ងៃសុក្រទី ២២មីនា បង្កឡើងក្រុមអ៊ីស្លាម។ តើក្រុមអ៊ីស្លាម ជីហាតKhorassan ជាអ្នកណា? ហេតុអ្វីក្រុមនេះយករុស្ស៊ីជាគោលដៅវាយប្រហាររបស់ខ្លួន?
ចុះផ្សាយនៅថ្ងៃ៖
ស្តាប់ - ០៥:៤៤
នៅយប់ថ្ងៃសុក្រទី២២មីនា ជនប្រដាប់អាវុធមួយក្រុមបានចូលទៅបាញ់សម្លាប់មនុស្សដោយឈាមត្រជាក់នៅក្នុងសាលប្រគំតន្រី្ត Crocus City Hall ជាយក្រុងម៉ូស្គូ។ ខណៈពេលដែលមនុស្សចលាចលរត់ប្រសាច ចេញពីកន្លែងកើតហេតុ ក្រុមជីហាត អង្គការរដ្ឋអ៊ីស្លាមបានបង្ហោះសារនៅលើបណ្តាញសង្គមតេឡេក្រាម ចេញមុខទទួលខុសត្រូវថា ការវាយប្រហារភេរវកម្មជាស្នាដៃរបស់ក្រុមខ្លួន។ ដំបូងឡើយ ថ្នាក់ដឹកនាំរបស់រុស្ស៊ី រួមទាំងលោកពូទីនគ្មាននិយាយដល់ឈ្មោះក្រុមជីហាត បើទោះជាក្រុមនេះចេញមុខអះអាងទទួលខុសត្រូវ។ ផ្ទុយទៅវិញ រុស្ស៊ីរបស់លោកពូទីនគិតតែដៅទម្លាក់កំហុស ចោទប្រកាន់អ៊ុយក្រែន។ ទើបតែថ្ងៃចន្ទ ៣ថ្ងៃក្រោយភេរវកម្ម ទើបប្រធានាធិបតីរុស្ស៊ី លោកពូទីននិយាយទទួលស្គាល់ ចុងមាត់ ចុងកថា ក្រុមអ៊ីស្លាមជាអ្នកប្រព្រឹត្តអំពើភេរវកម្មសម្លាប់មនុស្សនៅសាលតន្រ្តី ជាយក្រុងម៉ូស្គូ។
ទោះមេដឹកនាំរុស្ស៊ីមិនបានលម្អិតឈ្មោះក្រុមអ៊ីស្លាម ប៉ុន្តែ គេដឹងហើយថា ក្រុមអ៊ីស្លាមជាក្រុមជីហាតKhorassan សាខារបស់ក្រុមអង្គការរដ្ឋអ៊ីស្លាម នៅប្រទេសអាហ្វហ្កានីស្ថាន បន្ទាប់ពីក្រុមនេះអះអាងទទួលខុសត្រូវភ្លាមៗ នៅថ្ងៃកើតមានភេរវកម្ម។
តើក្រុមជីហាតEI Khorassan ជាអ្នកណា?
EI Khorassan ជាចលនាប្រដាប់អាវុធកកើតឡើងនៅទឹកដីអាហ្វហ្កានីស្ថាន ប៉ុន្តែ ចាប់ស្មោះស្ម័គ្រដើរតាមក្រុមជីហាតអង្គការរដ្ឋអ៊ីស្លាម នៅពេលក្រុមនេះធ្វើសង្រ្គាមពង្រីកដែនដីគ្រប់គ្រងរបស់ខ្លួននៅស៊ីរី និងអ៊ីរ៉ាក់។ នៅឆ្នាំ២០១៤ នៅពេលក្រុមជីហាតអង្គការរដ្ឋអ៊ីស្លាមឡើងឥទ្ធិពលខ្លាំងនៅស៊ីរី និងអ៊ីរ៉ាក់ ក្រុមជីហាត EI Khorassanប៉ុនប៉ងពង្រីកដែនគ្រប់គ្រងរបស់ខ្លួន ចេញពីអាហ្វហ្កានីស្ថានទៅប៉ាគីស្ថាន និងប្រទេសនៅអាស៊ីកណ្តាលដូចជា តួកមេនីស្ថាន តាហ្សីគីស្ថាន អ៊ូសបេគីស្ថាន និងអ៊ីរ៉ង់។
យោងតាមអ្នកជំនាញ បន្ទាប់ពីបែកខ្ចាត់ខ្ចាយ អស់អំណាចនៅស៊ីរី និងនៅអ៊ីរ៉ាក់នៅឆ្នាំ ២០១៩ ដោយសារប្រតិបត្តិការវាយប្រហាររបស់សម្ព័ន្ធអន្តរជាតិ ក្រុមអង្គការរដ្ឋអ៊ីស្លាមបានត្រលប់មកពង្រឹងបណ្តាញរបស់ខ្លួន នៅអាស៊ីកណ្តាល តាមរយៈ ក្រុមជីហាតEI Khorassanនៅអាហ្វហ្កានីស្ថាន។ បើតាមរបាយការណ៍របស់អង្គការសហប្រជាជាតិ ដែលដាក់ជូន ក្រុមប្រឹក្សាសន្តិសុខ នៅឆ្នាំ ២០២១ ក្រុមជីហាតEI Khorassan ត្រូវគេវាយតម្លៃថា មានចំនួនយុទ្ធជនប្រយុទ្ធពី ៦០០ទៅ ១០០០នាក់។ ក្រុមនេះសកម្មខ្លាំងនៅអាស៊ីខាងត្បូង អ៊ីរ៉ង់ និងអាស៊ីកណ្តាល។ បើតាមរបាយការណ៍របស់អង្គការសហប្រជាជាតិដដែល ទោះក្រុមនេះត្រូវរួមថយដែនគ្រប់គ្រងរបស់ខ្លួន ចាប់តាំងពីគូប្រជែង គឺក្រុមតាលីបង់បានវិលត្រលប់មកកាន់អំណាចនៅអាហ្វហ្កានីស្ថាន ប៉ុន្តែ ក្រុមEI Khorassan មិនធ្លាក់ថមថយកម្លាំង ឬបន្ថយសកម្មភាពធ្វើភេរវកម្មរបស់ខ្លួនឡើយ។ ក្រុមEI Khorassanបានចាប់ដៃសហការប្រមូលកម្លាំង ក្រុមជ្រុលជីហាត អ៊ីស្លាម ជ្រុលនិយមនៅតាមបណ្តោយព្រំដែនប៉ាគីស្ថាន ដូចជាក្រុមតាលីបង់ប៉ាគីស្ថាន និងក្រុមយុវជនអាហ្វហ្កានីស្ថានដែលមានទំនោរកាន់តែហិង្សា ស្អប់ជនបរទេស និងអ្នកកាន់សាសនាអ៊ីស្លាមនិកាយស៊្ហីអ៊ីត។ នៅពេលមេដឹកនាំក្រុមអង្គការរដ្ឋអ៊ីស្លាមត្រូវកងទ័ពអាមេរិកបាញ់សម្លាប់នៅឆ្នាំ ២០១៩ ក្រុមអង្គការរដ្ឋអ៊ីស្លាមបានបែរទិសចេញពីស៊ីរី និងអ៊ីរ៉ាក់ឆ្ពោះទៅអាស៊ីកណ្តាល។
ជាក់ស្តែង នៅពេលកងទ័ពរដ្ឋាភិបាលវាយរំដោះតំបន់ដែលធ្លាប់គ្រប់គ្រងដោយក្រុមEI Khorassanនៅឆ្នាំ ២០២០ មនុស្សជាង១៤០០នាក់បានទម្លាក់អាវុធ ដែលនៅក្នុងនោះ គេឃើញមនុស្សប្រុសស្រី មានដើមកំណើតចេញមកពី ប្រទេសអាស៊ីកណ្តាល ដូចជា អ៊ូបេគីស្ថាន តាហ្ស៊ីគីស្ថាន អាស៊ែបៃហ្សង់និងតួកគីជាដើម។
អាហ្វហ្កានីស្ថានជាសំបុកថ្មី ចំណែក អាស៊ីកណ្តាលជាស្ពានរបស់ក្រុមអង្គការរដ្ឋអ៊ីស្លាមដើម្បីចូលមកវាយប្រហារទឹកដីរុស្ស៊ី
ជនសង្ស័យទាំង៤នាក់ដែលអាជ្ញាធររុស្ស៊ីចាប់ខ្លួន នៅក្រោយភេរវកម្មនៅជាយក្រុងម៉ូស្គូ ជាជនជាតិតាហ្ស៊ីគីស្ថាន។ រឿងនេះគេគ្មានសង្ស័យឡើយ ព្រោះថា រដ្ឋាភិបាលតាហ្ស៊ីគីស្ថានក៏ដូចប្រទេសអាស៊ីកណ្តាលផ្សេងទៀតទទួលស្គាល់ថា មានជនជាតិរបស់ខ្លួនរាប់ពាន់នាក់ធ្លាប់ចូលទៅរួមប្រយុទ្ធជួយក្រុមអង្គការរដ្ឋអ៊ីស្លាមនៅស៊ីរី និងអ៊ីរ៉ាក់ នៅឆ្នាំ ២០១០ នៅមុនក្រុមនេះបែកខ្ចាត់ខ្ចាយ ៩ឆ្នាំក្រោយ។
នៅមុនវាយប្រហារភេរវកម្មនៅសាលប្រគំតន្រ្តីនៅជាយក្រុងម៉ូស្គូ ក្រុមEI Khorassanសាខារបស់ក្រុមជីហាតអង្គការរដ្ឋអ៊ីស្លាម ធ្លាប់ដៅវាយប្រហារផលប្រយោជន៍របស់រុស្ស៊ី និងចិន ដែលនៅបន្តសហការជាមួយរបបតាលីបង់ដែលជាសត្រូវរបស់ខ្លួន។ នៅខែកញ្ញាឆ្នាំ ២០២២ ក្រុមEI Khorassanបានបំផ្ទុះគ្រាប់អត្តឃាតនៅស្ថានទូតរុស្ស៊ី នៅទីក្រុងកាប៊ូល ដោយបានសម្លាប់បុគ្គលិកទូតរុស្ស៊ី២នាក់ និងជនជាតិអាហ្វហ្កានីស្ថាន៤នាក់។ នៅឆ្នាំដដែល ក្រុមនេះបានទៅបំផ្ទុះគ្រាប់បែកនៅសណ្ឋាគារក្នុងទីក្រុងកាប៊ូល ដែលសំបូរស្នាក់នៅ ដោយជនជាតិចិន និងធ្វើភេរវកម្មបំផ្ទុះគ្រាប់បែកសម្លាប់មនុស្ស៩០នាក់ នៅKerman ប្រទេសអ៊ីរ៉ង់ កាលពីខែមករាដើមឆ្នាំនេះ។
ដោយដៅវាយប្រហាររុស្ស៊ី ក្រុមEI Khorassanក៏ចង់សងសឹកផងដែរ រុស្ស៊ីដែលតាមពិតសកម្មខ្លាំងនៅក្នុងប្រតិបត្តិការយោធាវាយប្រហារក្រុមខ្លួន នៅក្នុងទឹកដីស៊ីរី។ មួយវិញទៀត តាមរយៈទឹកដីអាស៊ីកណ្តាល ដែលសំបូរដោយបណ្តាញក្រុមយុទ្ធជនរបស់ខ្លួន ក្រុមKhorassan អាចងាយស្រួលចូលទៅក្នុងទឹកដីរុស្ស៊ី ជាងចូលទឹកដីអឺរ៉ុប ដែលបានពង្រឹងបណ្តាញស៊ើបការណ៍សម្ងាត់ ការចែកចាយព័ត៌មានស្តីពីក្រុមភេរវនិយម រវាងបណ្តាប្រទេសសមាជិកអឺរ៉ុប។ ផ្ទុយពីអឺរ៉ុបដែលប្រុងប្រយ័ត្នខ្ពស់នៅចំពោះមុខការគំរាមកំហែងភេរវកម្ម រុស្ស៊ីឯណោះវិញ ដែលកំពុងជាប់ដៃធ្វើសង្រ្គាមនៅអ៊ុយក្រែន ភ្លេចខ្លួន និងបានមើលរំលងក្រុមជីហាតEI Khorassan ដែលតាមពិតគ្រោះថ្នាក់ខ្លាំង។ គ្រោះថ្នាក់ ព្រោះថា ក្រុមនេះ មានគំនុំចង់សងសឹកនឹងរុស្ស៊ី ដែលចូលរួមកងទ័ពរដ្ឋាភិបាលស៊ីរីវាយប្រហារក្រុមខ្លួន នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ