រុស្ស៊ីរងភេរវកម្មរបស់អង្គការរដ្ឋអ៊ីស្លាម នៅជាយក្រុងម៉ូស្គូស្លាប់ជាងមួយរយនាក់
អាជ្ញាធររុស្ស៊ី ប្រកាសចាប់ខ្លួនបានជនសង្ស័យ ១១ នាក់ ក្នុងនោះ ៤ នាក់ ពាក់ព័ន្ធផ្ទាល់ នឹងភេរវកម្មនៅយប់ថ្ងៃសុក្រទី២២ មីនា នៅក្នុងសាលតន្ត្រីមួយ ឯជាយក្រុងម៉ូស្គូ។ បើតាមតួលេខបណ្តោះអាសន្នចុងក្រោយ មានស្លាប់ ១១៥នាក់ ក្នុងចំណោមទស្សនិកជនជាង ៦.០០០ នៅទីនោះ។ តែតុល្យការអ្នកស្លាប់ ដោយការវាយប្រហារនេះ អាចកើនឡើងថែមទៀត ដ្បិតមានអ្នករបួសធ្ងន់ជាច្រើន ស្ថិតក្នុងស្ថានភាពស្ទើរស្លាប់ស្ទើររស់។ អង្គការ ជីហាត “រដ្ឋអ៊ីស្លាម” បានចេញមុខទទួលខុសត្រូវ ចំពោះ ភេរវកម្មនេះ។
ចុះផ្សាយនៅថ្ងៃ៖
ស្តាប់ - ០២:៤៤
អង្គការជីហាត “រដ្ឋអ៊ីស្លាម” ដែលជាច្រើនលើកច្រើនដង តែងចាត់ទុកប្រទេសរុស្ស៊ីជាផ្ទាំងស៊ីបរបស់ខ្លួន បានអះអាងលើបណ្តាញ Telegram ថា ពួកយុទ្ធជនរបស់ខ្លួន “ បានវាយប្រហារទៅលើ ទីកន្លែងដែលមានមនុស្សច្រើនកុះករ នៅឯតំបន់ជាយរដ្ឋធានីរុស្ស៊ី ក្រុងម៉ូស្គូ”។ អង្គការរដ្ឋអ៊ីស្លាម ក៏បានអះអាងទៀតថា បន្ទាប់មកក្រុមកុម្ម៉ង់ដូ ទាំងនោះបានត្រឡប់ទៅកាន់មូលដ្ឋានខ្លួនវិញ ដោយសុវត្ថិភាពពេញទី។
អ្នកនាំពាក្យការទូតរុស្ស៊ី លោកស្រី Maria Zakharova បានថ្លែងបរិហាររួចទៅហើយ” ភេរវកម្មសែនបង្ហូរ ឈាម”នេះ ទាំងចាត់ទុកជា “ឧក្រិដ្ឋកម្មហួសហេតុ”។
ភេរវកម្មនេះ ដែលចាប់ផ្តើមផ្សាយដោយប្រព័ន្ធព័ត៌មានរុស្ស៊ី នៅម្តុំមៅង ៨ និង ១៥ នាទី យប់ ម៉ោងម៉ូស្គូ គឺ ប្រព្រឹត្តដោយ ក្រុមជនប្រដាប់អាវុធមានគ្នា ៥ នាក់ សម្រុកចូលយ៉ាងគំហុក ទៅក្នុងសាលតន្ត្រី Crocus City Hall នៅបុរី Krasnogorsk ជាប់នឹងច្រកចេរញប៉ែកពាយ័ព្យនៃរដ្ឋធានីម៉ូស្គូ។ បើតាមអ្នកយកការណ៍របស់ទីភ្នាក់ងារព័ត៏មានរុស្ស៊ី RIA Novosti ជនទាំងនោះស្លៀកពាក់ប៉ារ៉ា ស្រាប់បាន លេចចេញមកធ្លោ នៅទីកន្លែងអង្គុយនៃទស្សនិកជនស្ថិតនៅជាន់ខាងក្រោមជាប់ដីផ្ទាល់ ហើយក៏បាញ់រះ ប្រាវៗនិងគប់គ្រាប់បែក គប់ដបសាំង ទើបបណ្តាលឲ្យឆាបឆេះជាអគ្គិភ័យ។ អណ្តាតភ្លើង បានត្របាក់ ផ្ទៃក្រឡា ១៣,០០០ ម៉ែត្រការ៉េ នៃអគារតែម្តង និងបានកំទេចអស់ដំបូលមួយភាគ។ សេចក្តីនេះ ទម្លាយឲ្យដឹង ដោយ លោក Andrei Vorobiov អភិបាលតំបន់ជាយក្រុងម៉ូស្គូ ដែល រួមក្តោប បុរី Krasnogorsk នេះ។
លោកប្រធានាធិបតី វ៉្លាឌីមៀរ ពូទីន ដែលបានទទួលព័ត៌មានតាំងពីប៉ុន្មាននាទីដំបូងនៃភេរវកម្មនោះ បានបួងសួង ឲ្យរាល់តែអ្នករងគ្រោះជាង ១០០ នាក់ ឆាប់ជាស្បើយ និង បានសំដែងអំណរគុណដល់ បណ្តាគ្រូពេទ្យ តែនៅមិនទាន់បង្ហាញមុខថ្លែងជាសាធារណៈទេ។
គ្មានបង្អង់ អ៊ុយក្រែនបានប្រញាប់ប្រញាល់ បដិសេធរាល់ការទទួលខុសត្រូវរបស់ខ្លួនចំពោះភេរវកម្ម ដោយមិនទុកចិត្តលើស្ថាប័នសន្តិសុខជាតិរុស្ស៊ី។ ចំណែកសេតវិមានវិញ បានថ្លាថ្លែសាមគ្គីភាពជាមួយ អ្នករងគ្រោះរុស្ស៊ីក្នុងការវាយប្រហារសែនព្រៃផ្សៃនេះ និង បានអះអាងថាសហរដ្ឋអាមេរិកបានចែករំលែក ជាមួយអាជ្ញាធររុស្ស៊ីនូវព័ត៌មានសម្ងាត់ឈ្លបយកបានអំពីគម្រោងវាយប្រហារនេះ ។
សហភាពអឺរ៉ុប សំដែង”ក្តីរន្ធត់”។ ប្រធានាធិបតីបារាំង លោក អេម៉ានុយអែល ម៉ាក្រុង អគ្គលេខាធិការ អសប លោក Antonio Guterres និង ក្រុមប្រឹក្សាសន្តិសុខ អសប ព្រមទាំងប្រទេសជាច្រើនទៀត នាំគ្នា ផ្តន្ទាទោសភេរវកម្មនេះ។ ប្រធានាធិបតីចិន លោក ស៊ី ជីនពីង បានថ្លែងសារចូលរួមមរណទុក្ខ មកកាន់សមភាគីរុស្ស៊ី លោក វ៉្លាឌីមៀរ ពូទីន ចំពោះការធ្លាក់ខ្លួនស្លាប់នៃពលរដ្ឋរុស្ស៊ី ជាង ១០០ នាក់ ក្នុង ភេរវកម្មនៅតំបន់ជាយក្រុងម៉ូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ