ប្រធានាធិបតីឥណ្ឌូណេស៊ីប្រកាសធ្វើដំណើរទៅក្រុងកៀវ និងមូស្គូ
បច្ចុប្បន្នជាប្រធានផ្លាស់វេនG២០ លោកប្រធានាធិបតីឥណ្ឌូណេស៊ី ចូកូ វីដូដូ នឹងធ្វើដំណើរទៅប្រទេសអ៊ុយក្រែន និងរុស្ស៊ី ក្នុងពេលឆាប់ៗខាងមុខនេះ។ នេះបើតាមការជូនដំណឹងរបស់ក្រសួងការបរទេសឥណ្ឌូណេស៊ីដោយបញ្ជាក់ថា លោកវីដូដូ ទៅក្រុងកៀវនិងមូស្គូ ដើម្បី ជជែកអំពីផលវិបាកសេដ្ឋកិច្ច និងមនុស្សធម៌ ដែលបង្កឡើងដោយសង្គ្រាមរុស្ស៊ីនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០៥
គិតចាប់តាំងពីរុស្ស៊ីធ្វើសង្គ្រាមឈ្លានពានអ៊ុយក្រែនមក លោក ចូកូ វីដូដូ នឹងក្លាយជាប្រមុខដឹកនាំប្រទេស នៅតំបន់អាស៊ី ដំបូងគេបង្អស់ ដែលនឹងធ្វើដំណើរទៅកាន់ប្រទេសទាំងពីរ ក្រោយពីលោកបានចូលរួមក្នុងជំនួបប្រជុំក្រុមប្រទេសមហាអំណាចG៧ នៅប្រទេសអាល្លឺម៉ង់ ចប់សព្វគ្រប់។
ក្នុងអំឡុងពេលទស្សនកិច្ចនៅក្រុងកៀវ និងក្រុងមូស្គូ លោកប្រធានាធិបតីឥណ្ឌូណេស៊ី ដែលជាប្រធានផ្លាស់វេនG២០ផងនោះ នឹងជួបពិភាក្សាដោយផ្ទាល់ជាមួយសមភាគីអ៊ុយក្រែន លោក ហ្សេឡេនស្គី និងសមភាគីរុស្ស៊ី លោក វ្លាដេមៀ ពូទីន។ នេះបើតាមការបញ្ជាក់របស់លោករដ្ឋមន្ត្រីក្រសួងការបរទេស ដែលមិនបានលម្អិតអំពីកាលបរិច្ឆេទនៃទស្សនកិច្ចទេ។ ប៉ុន្តែបើតាមសារព័ត៌មានផ្លូវការ លោកវីដូដូទំនងជានឹងជួបលោកពូទីននៅថ្ងៃទី ៣០មិថុនា។ ភ្នាក់ងារសារព័ត៌មានសាធារណៈរុស្ស៊ី Tass ក៏លើកឡើងអំពីកាលវិភាគនេះដែរ។
ក្នុងផ្ទៃនៃក្តីព្រួយបារម្ភជុំវិញបញ្ហាមនុស្សធម៌ លោក វីដូដូ ចង់ស្វះស្វែងរកច្រកដោះស្រាយវិបត្តិស្បៀងអាហារពិភពលោក ដែលជាផលវិបាកបង្កឡើងដោយសង្គ្រាមនៅអ៊ុយក្រែន និងដែលបានធ្វើឱ្យទីផ្សារពិភពលោកជាប់គាំង ព្រមទាំងបង្កឱ្យមានវិបត្តិខ្វះប្រេងឆាបរិភោគ ហើយតម្លៃប្រេងក៏ឡើងថ្លៃខ្លាំងនៅឥណ្ឌូណេស៊ី។
ឥណ្ឌូណេស៊ីជាអ្នកផលិតនិងនាំចេញប្រេងដូងលំដាប់លេខមួយពិភពលោក បានរងវិបត្តិយ៉ាងធ្ងន់ធ្ងររហូតដល់រដ្ឋាភិបាលបង្ខំចិត្តហាមឃាត់ការនាំចេញប្រេងឆាអស់មួយខែ កាលពីខែមេសា២០២២។ ហើយដូចជាបណ្តាប្រទេសកំពុងលូតលាស់ខ្លាំងផ្សេងទៀតដែរ ឥណ្ឌូណេស៊ីសាកល្បងរក្សាជំហរអព្យាក្រិត្យជុំវិញសង្គ្រាមរវាងរុស្ស៊ីនិងអ៊ុយក្រែន។ លោកវីដូដូ បានបដិសេធមិនបញ្ជូនអាវុធទៅឱ្យអ៊ុយក្រែនតាមសំណូមពររបស់លោកហ្សេឡេស្គីទេ តែផ្តល់ជំនួយមនុស្សធម៌។ ក្រោមសម្ពាធរបស់បស្ចិមលោកឱ្យផាត់រុស្ស៊ីពីG២០ ឥណ្ឌូណេស៊ីជាប្រធានផ្លាស់វេនបានអញ្ជើញអ៊ុយក្រែនជាធ្វើភ្ញៀវសម្រាប់ជំនួបកំពូលឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ