មេដឹកនាំចលនាប្រជាធិបតេយ្យថៃ ១២នាក់អាចនឹងជាប់ចោទ ពីបទប្រមាថព្រះមហាក្សត្រ
មេដឹកនាំចលនាទាមទារលទ្ធិប្រជាធិបតេយ្យថៃចំនួន ១២នាក់ ត្រូវបានប៉ូលិសកោះហៅទៅសួរចម្លើយ និងអាចត្រូវរងការចោទប្រកាន់ពីបទប្រមាថព្រះមហាក្សត្រផង។ នេះជាលើកទីមួយហើយគិតចាប់តាំងពីចលនាបាតុកម្មប្រជាធិបតេយ្យបានផ្ទុះឡើង ដែលអាជ្ញាធរថៃបានងាកមកប្រើច្បាប់ការពាររាជវង្ស ប្រឆាំងនឹងបាតុករ។ បាតុករដែលគ្រោងនឹងប្រមូលផ្តុំគ្នាជាថ្មីទៀត នៅថ្ងៃពុធទី ២៥វិច្ឆិកា ២០២០ នៅទីក្រុងបាងកក ដើម្បីបរិហារប្រព័ន្ធគ្រប់គ្រងហិរញ្ញវត្ថុរាជវាំងគ្មានតម្លាភាព។
ចុះផ្សាយនៅថ្ងៃ៖
ស្តាប់ - ០២:០៧
បើតាមការគូសបញ្ជាក់របស់សមាគមមេធាវីការពារសិទ្ធមនុស្សថៃ ប៉ូលិសបានកោះហៅមេដឹកនាំចលនាទាមទារប្រជាធិបតេយ្យចំនួន ១២នាក់ ទៅចោទសួរ ដោយសំអាងលើមាត្រា១១២នៃច្បាប់ព្រហ្មទណ្ឌថៃ ពោលគឺច្បាប់ប្រឆាំងនឹងការប្រមាថព្រះមហាក្សត្រ ដ៏តឹងតែងជាងគេបំផុតមួយនៅលើពិភពលោក។ តាមរយៈច្បាប់នេះ រាល់ការរិះគន់ ជេរប្រមាថ បរិហារកេរ្តិ៍ ព្រះមហាក្សត្រ ឬសមាជិកក្រុមគ្រួសាររាជវង្ស នឹងត្រូវរងការដាក់ឱ្យជាប់ក្នុងពន្ធនាគារដល់ទៅ១៥ឆ្នាំ។
នេះជាលើកទីមួយហើយ គិតចាប់តាំងពីឆ្នាំ២០១៨មក ដែលមានករណីពាក់ព័ន្ធនឹងបទប្រមាថព្រះមហាក្សត្រត្រដែតឡើង។ ហេតុអ្វីពេលនេះ ? រាជានិយមប្រកាសសង្គ្រាមជាមួយរាស្ត្រឯងឬ ?! នេះជាការចោទចម្ងល់របស់លោក Parit Chiwarak មេដឹកនាំចលនាប្រជាធិបតេយ្យម្នាក់ក្នុងចំណោម១២នាក់ដែលប៉ូលិសថៃកោះហៅ។ មេដឹកនាំរូបនេះបានព្រមានថា ការកោះហៅនេះ អាចនឹងធ្វើចលនាបាតកម្មរីកកាន់តែធំ។
ជាការពិត នៅថ្ងៃពុធនេះ ក្រុមចលនាទាមទារប្រជាធិបតេយ្យគ្រោងនឹង បង្ហែក្បួនបាតុកម្មជាថ្មី សំដៅទៅការិយាល័យគ្រប់គ្រងហិរញ្ញវត្ថុរាជវាំង Crown property bureau (CPB)។ តែដើម្បីបញ្ចៀសការប៉ះទង្គិចជាមួយក្រុមអ្នករាជានិយម ចលនាអ្នកប្រជាធិបតេយ្យងាកប្រមូលផ្តុំគ្នា នៅមុខធនាគារ Siam Commercial Bank វិញ។ ធនាគារដ៏ធំជាងគេរបស់ថៃ ដែលព្រះមហាក្សត្រផ្ទាល់ខ្លួន ជាម្ចាស់ភាគហ៊ុនដ៏ចំបងផង។
ពីមួយថ្ងៃ ទៅមួយថ្ងៃ ចលនាប្រជាធិបតេយ្យបានបង្ហាញការប្រឆាំងកាន់តែខ្លាំងឡើង ដោយហ៊ានស្រែកទាមទារដោយចំៗ ការធ្វើកំណែទម្រង់របបរាជនិយម ជាពិសេសការធ្វើកំណែទម្រង់ប្រព័ន្ធគ្រប់គ្រងហិរញ្ញវត្ថុរាជវង្សដ៏មហាសាល (៣០ទៅ៦០ពាន់លានដុល្លារ) និងដែលលែងសូវមានតម្លាភាព គិតចាប់តាំងតាំងពីព្រះមហាវិជ្ជរ៉ាឡុងកនបានអនុម័តច្បាប់ប្រគល់អំណាចគ្រប់គ្រងទ្រព្យសម្បត្តិទាំងស្រុងមកឱ្យព្រះអង្គ។ កាលពីមុនជាភារៈរបស់មួយចំណែករបស់រដ្ឋាភិបាល (រដ្ឋមន្ត្រីក្រសួងហិរញ្ញវត្ថុ)។
សូមបញ្ជាក់ក្រោយផ្ទុះចលនាបាតុកម្មប្រជាធិបតេយ្យដ៏តានតឹងអស់រយៈពេលបួនខែមក និងការប្រើវិធីបង្ក្រាបដោយបាញ់ទឹកមក រដ្ឋាភិបាលថៃទំនងជាកំពុងងាកមកប្រើដំណោះស្រាយតាមផ្លូវច្បាប់ម្តង។ គិតចាប់តាំងពីថ្ងៃទី ១៨កក្កដា២០២០មក មានបាតុករយ៉ាងហោច១៧៤នាក់ រងការចោទប្រកាន់ពីបទធ្វើបាតុកម្មខុសច្បាប់។ យ៉ាងហោច៤៦នាក់ ជាប់អង្កេតពីបទបះបោរដែលអាចជាប់ទោសក្នុងពន្ធនាគារដល់ទៅ៧ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ