បាតុករដើម្បីប្រជាធិបតេយ្យ តោងឡើងឈរលើវិមានប្រជាធិបតេយ្យ នៅក្រុងបាងកក
បាតុកម្មរបស់ក្រុមទាមទារប្រជាធិបតេយ្យថៃ បានលេចរូបរាងសាជាថ្មី។ នៅថ្ងៃសៅរ៍ម្សិលមិញ នៅទីក្រុងបាងកក បាតុករដើម្បីប្រជាធិបតេយ្យ រាប់ពាន់នាក់ បានប្រមូលផ្តុំ នៅវិមានប្រជាធិបតេយ្យ ដោយលើកនេះ បានរុំក្រណាត់ស ជុំវិញ វិមានប្រជាធិបតេយ្យ។ នៅពីលើផ្ទាំងក្រណាត់ស ដ៏ធំ បាតុករ បានសរសេរធំៗ ទាមទារកំណែទម្រង់ស្ថាប័នព្រះមហាក្សត្រ និងការចុះចេញពីតំណែងរបស់នាយករដ្ឋមន្រ្តី លោកប្រាយុទ្ធ ចាន់អូចា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
បាតុកម្មនៅថ្ងៃសៅរ៍ កើតចេញមកពីការអំពាវនាវរបស់ក្រុមចំនួន ២០ ដែលមានគោលដៅដូចគ្នា គឺ បង្កើតលទ្ធិប្រជាធិបតេយ្យពិតប្រាកដ នៅប្រទេសថៃ។ សម្រាប់ក្រុមនិស្សិតដែលដឹកនាំចលនាបាតុកម្ម តាំងពីខែ កក្កដា ការទាមទាររបស់ពួកគេគឺនៅតែដដែល នោះ គឺនាយករដ្ឋមន្រ្តី ដែលចូលកាន់តំណែងចាប់តាំងពីធ្វើរដ្ឋប្រហារនៅឆ្នាំ ២០១៤ ត្រូវចុះចេញពីតំណែង។ សភា ត្រូវធ្វើកំណែទម្រង់ រដ្ឋធម្មនុញ្ញ ដើម្បីធ្វើឲ្យប្រទេសថៃ មានលក្ខណៈប្រជាធិបតេយ្យជាងមុន។ ការទាមទារចុងក្រោយ និងសំខាន់ជាងគេរបស់ក្រុមយុវជនដើម្បីប្រជាធិបតេយ្យ គឺការធ្វើកំណែទម្រង់ ស្ថាប័នព្រះមហាក្សត្រ ដែលពួកគេវាយតម្លៃថា មានអំណាចជ្រុលពេក។
សម្រាប់ក្រុមបាតុករ កំណែទម្រង់ ស្ថាប័នព្រះមហាក្សត្រ នឹងអាចធ្វើឲ្យប្រទេសថៃ មានលទ្ធិប្រជាធិបតេយ្យពិតប្រាកដ។ គឺហេតុផលនេះហើយ ដែលជំរុញ ឲ្យពួកគេហ៊ានប្រថុយធ្វើបាតុកម្ម ប្រឆាំងព្រះរាជា ដោយមិនខ្លាចច្បាប់ជេរប្រមាថ ព្រះមហាក្សត្រ។ ច្បាប់ដែលអនុញ្ញាតឲ្យចាប់ដាក់ពន្ធនាគារ ដល់១៥ឆ្នាំ សម្រាប់ការជេរប្រមាថ ប៉ះពាល់ព្រះមហាក្សត្រ។
នៅថ្ងៃ សៅរ៍ ដើម្បី សំដែងការប្រឆាំងរបស់ខ្លួន ក្រុមបាតុករបានលើក ម្រាមដៃ និងបែរខ្នងដាក់ក្បួនព្រះទីនាំងរបស់ព្រះរាជា ព្រះបាទ មហាវិជ្ជរ៉ា ឡុងកន។
នៅថ្ងៃ សៅរ៍ ព្រះអង្គបានយាងសម្ពោធ ខ្សែរថភ្លើងលើអាកាសមួយខ្សែទៀត នៅ ទីក្រុងបាងកក ក្រោមសំលេងហ៊ោ កញ្ជ្រៀវស្រែកសរសើរ របស់ក្រុមអ្នកគាំទ្ររាជវាំង។ ធ្លាប់រងរិះគន់ថា បានចំណាយពេលវេលា នៅប្រទេសអាល្លឺម៉ង់ ច្រើនជាងប្រទេសថៃ ក្នុងពេលប្រទេសកំពុងជួបវិបត្តិកូវីដ ព្រះចៅវិជ្ជរ៉ាឡុងកន បានបង្ហាញ ព្រះភ័ក្រ កាន់តែញឹកញាប់ ជាមួយ ព្រះមហេសី នៅចំពោះ មុខ មហាជនថៃ។
នៅក្នុងបាតុកម្ម កាលពីថ្ងៃសៅរ៍ ក្រុមបាតុករ បាននាំគ្នា លើកផ្ទាំងក្រណាត់ ស រុំស្រោប វិមានប្រជាធិបតេយ្យ។ នៅពីលើក្រណាត់ មានសរសេរអក្សរថា “អ្នកកំពុងលួចអនាគតភ្លឺថ្លារបស់ខ្ញុំ” ឬថា “ប្រជាធិបតេយ្យនឹងឈ្នះ”។ សម្រាប់បាតុករ វាជាផ្នែកមួយនៃសេរីភាពបញ្ចេញមតិដែល ត្រូវរួបរឹតរួមតូច ចាប់តាំងពីប្រមុខយោធា ចូលដឹកនាំប្រទេសថៃ តាមរយៈរដ្ឋប្រហារនៅ ឆ្នាំ ២០១៤។
អាជ្ញាធរថៃ បានពង្រាយប៉ូលិស ប្រមាណ ៨ពាន់នាក់ សម្រាប់បាតុកម្មនៅថ្ងៃសៅរ៍។ គេមិនច្បាស់ថា តើបាតុករនឹងត្រលប់មកជួបជុំ ធ្វើបាតុកម្មសាជាថ្មី នៅថ្ងៃអាទិត្យនេះទៀតដែរឬទេ។ កាលពីថ្ងៃអាទិត្យមុន ប៉ូលិសបានប្រើកាណុងបាញ់ទឹកជាលើកទី ២ ដើម្បី បំបែកហ្វូងបាតុករ ដែលបណ្តាលមានរលកតវ៉ា និងរិះគន់យ៉ាងខ្លាំងពីសំណាក់ក្រុមសកម្មជនការពារសិទ្ធិមនុស្ស និងមហាជនថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ