កាណាដាសម្រេចដកក្រុមហ៊ុនHuaweiនិងZTEពីប្រព័ន្ធអ៊ីនធ័រនែត5Gរបស់ខ្លួន
ជាសំណុំរឿងដែលបំពុលទំនាក់ទំនងចិននិងកាណាដាអស់ជាច្រើនឆ្នាំមកហើយ។ ហើយដូចការរង់ចាំ នៅថ្ងៃព្រហស្បតិ៍ទី ១៩ ឧសភាម្សិលមិញ កាណាដា បានសម្រេចចិត្តហាមឃាត់មិនឱ្យក្រុមហ៊ុនទូរគមនាគមន៍ចិនHuawei និងZTE ធ្វើផលិតកម្មប្រព័ន្ធអ៊ីនធ័រនែត5G នៅក្នុងផ្ទៃប្រទេសកាណាដាទេ ដើម្បីរក្សាសន្តិសុខជាតិ។ សេចក្តីសម្រេចចិត្តរបស់រដ្ឋាភិបាលកាណាដា គ្មានមូលដ្ឋានត្រឹមត្រូវ។ នេះជាបញ្ចេញប្រតិកម្មប្រឆាំងរបស់ចិន នៅថ្ងៃសុក្រទី ២០ឧសភា។ ចំណែកសហរដ្ឋអាមេរិកវិញអបអរយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:០១
“ក្រោយការសិក្សាអង្កេតពេញលេញរបស់ទីភ្នាក់ងារសន្តិសុខជាតិ និងក្រោយពីបានពិគ្រោះជាមួយសម្ព័ន្ធមិត្តដ៏ជិតស្និទ្ធមក កាណាដាសម្រេចហាមឃាត់មិនឱ្យ Huawei និងZTE មានសេវាកម្មនិងផលិតផល ក្នុងប្រព័ន្ធទូរគមនាគមន៍ជាតិទេ”។ នេះជាសេចក្តីថ្លែងការណ៍របស់រដ្ឋមន្ត្រីក្រសួងឧស្សាហកម្មកាណាដា លោក François-Philippe Champagne។ ដោយមិននិយាយចំឈ្មោះ រដ្ឋមន្ត្រីក្រសួងសន្តិសុខជាតិកាណាដា បានអះអាងបន្ថែមទៀតថា ប្រព័ន្ធ5G កំពុងលូតលាស់ និងមានការប្រកួតប្រជែងខ្លាំងតែក៏មានហានិភ័យខ្ពស់ ដោយមានក្រុមហ៊ុនមិនល្អច្រើនចាំតែឆ្លៀតយកចំណេញពីភាពទន់ខ្សោយនៃបណ្តាញ។
ប៉ុន្តែសេចក្តីសម្រេចរបស់កាណាដានេះ គ្មានមូលដ្ឋានសោះ ! ចិនសូមប្រឆាំងយ៉ាងដាច់ខាត និងគ្រោងចាត់វិធានការចាំបាច់ដើម្បីការពារក្រុមហ៊ុនចិន។ នេះជាប្រតិកម្មតបរបស់ក្រសួងការបរទេសចិន នៅថ្ងៃសុក្រទី ២០ឧសភា ដោយមិនលម្អិតថាតើជាវិធានការអ្វីឱ្យប្រាកដទេ។
ផ្ទុយទៅវិញ ជាមួយនឹងសារអបអរការបណ្តេញក្រុមហ៊ុនHuawei ពីបណ្តាញអ៊ីនធ័រនែត5G កាណាដា សហរដ្ឋអាមេរិកបានសន្យាសហការជាមួយសម្ព័ន្ធមិត្តដូចយ៉ាងកាណាដា ដើម្បីធានាសន្តិសុខទាំងអស់គ្នា។
សូមបញ្ជាក់ថា ជាអ្នកដឹកនាំយុទ្ធនាការប្រឆាំងHuawei វ៉ាស៊ីនតោនបានដាក់សម្ពាធលើក្រុមហ៊ុនបច្ចេកវិទ្យាចិន និងតែងបានចោទប្រកាន់ជាញឹកញយថាHuawei ជាតំណាងគ្រោះថ្នាក់សម្រាប់សន្តិសុខជាតិព្រោះប៉េកាំងអាចប្រើប្រាស់ក្រុមហ៊ុននេះសម្រាប់តាមដាននិងលួចទិន្នន័យប្រទេសផ្សេង។ សហរដ្ឋអាមេរិកបានជំរុញឱ្យសម្ព័ន្ធមិត្តហាមឃាត់សេវាHuawei ប្រទេសរៀងៗខ្លួន។ កាលពីឆ្នាំ២០១៨ តាមសំណើអាមេរិក កាណាដាបានដល់ថ្នាក់ចាប់ខ្លួនលោកស្រី ម៉េង វ៉ាន់ចូវ ប្រធានគ្រប់គ្រងហិរញ្ញវត្ថុ និងជាកូនរបស់ស្ថាបនិកក្រុមហ៊ុនHuawei ផង រហូតធ្វើឱ្យទំនាក់ទំនងកាណាដាចិនធ្លាក់ចុះដុនដាបយ៉ាងខ្លាំង។ ក្រៅពីកាណាដា អង់គ្លេស ជប៉ុន អូស្ត្រាលី និងស៊ុយអែត លែងប្រើសេវាកម្មHuawei ដូចអាមេរិកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ