ចិនកាត់ទោសជនជាតិកាណាដាម្នាក់ឲ្យជាប់ពន្ធនាគារ១១ឆ្នាំ ពីបទចារកិច្ច
កំពុងដុនដាបស្រាប់ផង ទំនាក់ទំនងចិន-កាណាដា បានធ្លាក់ផុងជ្រៅមួយជាន់ថែមទៀត នៅថ្ងៃពុធទី ១១សីហានេះ។ ពលរដ្ឋកាណាដា លោក មៃខល ស្ពេវ័រ Michael Spavor ដែលជាប់ឃុំឃាំងនៅចិន តាំងពីខែធ្នូឆ្នាំ២០១៨មក ទើបត្រូវបានតុលាការចិនសម្រេចកាត់ទោសឱ្យជាប់ពន្ធនាគារចំនួន ១១ឆ្នាំ ពីបទចារកិច្ច។ កាណាដាបានបញ្ចេញប្រតិកម្មភ្លាម ថា ជាសាលក្រមដែលមិនអាចទទួលយកបានដាច់ខាត។ តំណាងការទូតប្រមាណ៥០រូប មកពី២៥ប្រទេស បានមកជួបជុំគ្នានៅស្ថានទូតកាណាដានាទីក្រុងប៉េកាំង ដើម្បីសម្តែងការសាមគ្គីភាពនិងគាំទ្រកាណាដា។
ចុះផ្សាយនៅថ្ងៃ៖
ស្តាប់ - ០២:១៥
បន្ទាប់ពីបានបើកសវនាការដោយបិទទ្វារ ដូចទម្លាប់រាល់គ្រប់សំណុំរឿងពាក់ព័ន្ធនឹងការណ៍សម្ងាត់រដ្ឋ កាលពីខែមីនា ២០២១មក តុលាការខេត្ត ដង់ដុង ជាប់ព្រំដែនកូរ៉េខាងជើង បានចេញសាលក្រម នៅថ្ងៃពុធទី ១១សីហានេះ ដាក់ទោស លោក មៃខល ស្ពេវ័រ ជនជាតិកាណាដា ឱ្យជាប់ពន្ធនាគារ១១ឆ្នាំ ពីបទធ្វើចារកិច្ចឱ្យបរទេស និងលួចការណ៍សម្ងាត់រដ្ឋ ដោយបានល្មើសបម្រាមលួចទៅថតរូបយន្តហោះយោធា។ ជាមួយការដាក់ទោសឱ្យជាប់ពន្ធនាគារ តុលាការរឹបអូសយកទ្រព្យសម្បត្តិ (យ៉ាងច្រើនបំផុត ៥០ម៉ឺនយ័ន =៦៦០០អឺរ៉ូ) ព្រមទាំងត្រូវបណ្តេញពីទឹកដីចិនទៀត តែពុំទាន់កំណត់ពេល។ នេះបើតាមសេចក្តីថ្លែងការណ៍របស់តុលាការ។
គ្រាន់តែបានឮសាលក្រមភ្លាម នាយករដ្ឋមន្ត្រីកាណាដា លោក ហ្សូសស្តាំង ទ្រូដូ បានចេញសេចក្តីថ្លែងការណ៍ថ្កោលទោសភ្លាមដែរ ថា នេះជាសាលក្រមដែលមិនអាចទទួលយកបានជាដាច់ខាត។ ជាសវនាការគ្មានតម្លាភាព និងគ្មានគោរពច្បាប់និងបទដ្ឋានអន្តរជាតិ សូម្បីតែបន្តិច បន្ទាប់ពីចាប់ខ្លួននិងឃុំឃាំងលោក ដោយបំពានអស់ជាងពីរឆ្នាំ។
ចំណែកឯកអគ្គរដ្ឋទូតកាណាដាប្រចាំក្រុងប៉េកាំង លោក Dominic Barton ដែលបានធ្វើដំណើរទៅដល់តុលាការ និងបានជួបលោក មៃខល ស្ពេវ័រ មួយភ្លែត បានអះអាងថា លោកស្ពេវ័រអាចមានលទ្ធភាពធ្វើបណ្តឹងឧទ្ធរណ៍បាន ហើយកំពុងពិចារណាជាមួយមេធាវី។
មានជំនាញខាងទំនាក់ទំនងជាមួយកូរ៉េខាងជើង ដោយធ្លាប់ជួបលោកគីមជុងអ៊ុនជាច្រើនលើក ព្រមទាំងធ្លាប់បានសម្របសម្រួលឱ្យមានទស្សនកិច្ចជាច្រើននៅព្យុងយ៉ាង លោក Michael Spavor និងលោក Michael Kovrig អតីតអ្នកការទូត កំពុងបម្រើការឱ្យអង្គការវិភាគនយោបាយ International Crisis Group ត្រូវបានអាជ្ញាធរប៉េកាំង ចាប់នៅថ្ងៃទី ១០ធ្នូ ក្នុងពេលដែលកាណាដានិងចិនកំពុងមានវិបត្តិការទូត ទាក់ទងនឹងសំណុំរឿងHuawei ។ ជាផ្លូវការ ប៉េកាំងចាប់ខ្លួនអ្នកទាំងពីរ ពីបទមានការគំរាមកំហែងសន្តិសុខជាតិចិន ដែលគ្មានជាប់ចំណងអ្វីជាមួយនឹងការឃាត់ខ្លួនលោកស្រី ម៉េង វ៉ាន់ចូវ ប្រធានផ្នែកហិរញ្ញវត្ថុរបស់ក្រុមហ៊ុនHuaweiទេ។ ចិនបដិសេធថាពុំបានចាប់ពលរដ្ឋកាណាដាទាំងពីររូបមកធ្វើថ្នូរនឹងការដោះលែងលោកស្រី ម៉េង វ៉ាន់ចូវទេ។
ប៉ុន្តែពិតជាចៃដន្យជ្រុល សាលក្រមធ្លាក់មកជួនចំពេលដែលកំពុងមានសវនាការនៅកាណាដាទាក់ទងនឹងសំណុំរឿងធ្វើបច្ចាប័នលោកស្រី ម៉េង វ៉ាន់ចូវ ទៅឱ្យអាមេរិក។ សម្រាប់លោកប្រមុខការទូតកាណាដានៅចិន នេះជាមិនមែនជារឿងចៃដន្យទេ។ ម្សិលមិញ តុលាការចិន បានបញ្ជាក់អំពីការកាត់ទោសប្រហារជីវិតពលរដ្ឋកាណាដាម្នាក់ ពីបទជួញដូរគ្រឿងញៀន។ ឯជោគវាសនារបស់លោក មៃខល ខូវរីល ពុំដឹងជាយ៉ាងណាទេ។ លោកឯករដ្ឋទូតមិនបានទទួលដំណឹងអ្វីសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ