ប្រទេសអង់គ្លេសបានសម្រេចមិនបំពាក់បណ្តាញ ៥G របស់ក្រុមហ៊ុនចិន Huawei
នៅទីបំផុត ប្រទេសអង់គ្លេសបានសម្រេចដកក្រុមហ៊ុនចិន Huawei ចេញពីបណ្តាញ ៥G របស់ខ្លួន។ ព័ត៌មាននេះត្រូវបានបញ្ជាក់ដោយរដ្ឋមន្រ្តីក្រសួងវប្បធម៌លោកអីលីវីយេ ដាវដិននៅមុខចំពោះមុខក្រុមសមាជិកសភានាថ្ងៃអង្គារ ទី១៤ កក្កដា។ លោកដាវដិនបានថ្លែងថាចាប់ពីឆ្នាំ ២០២១ ទៅ បណ្តាញទូរគមនាគមន៍នៅអង់គ្លេសនឹងមិនអាចប្រើសម្ភារៈបរិក្ខាររបស់ Huawei បានទៀតឡើយ ហើយក្រុមហ៊ុនទូរស័ព្ទដៃទាំងអស់ដែលកំពុងបំពាក់សម្ភារៈបរិក្ខាររបស់ Huawei នៅក្នុងបណ្តាញ ៥G របស់ខ្លួននឹងត្រូវដកចេញវិញទាំងអស់ពីពេលនេះទៅឆ្នាំ ២០២៧។ គួររម្លឹកថាក្នុងខែមករា អង់គ្លេសបានអនុញ្ញាតឲ្យប្រើសម្ភារៈបរិក្ខារមិនយុទ្ធសាស្រ្តរបស់ Huawei ដល់ទៅ ៣៥% ដើម្បីពង្រាយបណ្តាញ ៥G ដែលមានល្បឿនលឿន។ តែអង់គ្លេសក៏ដូចជាបណ្តាប្រទេសអឺរ៉ុបផ្សេង ពិសេសសហរដ្ឋអាមេរិកបានទាត់ Huawei ចោលវិញដោយបារម្ភពីហានិភ័យសន្តិសុខ។ យ៉ាងណាក៏ដោយ ការសម្រេចរបស់អង់គ្លេសពេលនេះនឹងធ្វើឲ្យទំនាក់ទំនងរវាងទីក្រុងឡុងដ៏ និងទីក្រុងប៉េកាំងដែលកំពុងតានតឹងស្រាប់ដោយសំណុំរឿងហុងកុងរឹតតែឡើងតានតឹងមួយកម្រិតទៀត។ សម្រាប់ប្រធានមជ្ឈមណ្ឌល think tank អាស៊ី លោកហ្សង់ ហ្រ្វង់ស័រ ឌីម៉េគ្លីយ៉ូ លោកមើលឃើញហេតុផលចំនួនពីរដែលមានក្រុមប្រទេសបស្ចិមលោកបានដកខ្លួនចេញពី Huawei គឺនយោបាយ និងភាពគ្មានតម្លាភាពរបស់ Huawei ខ្លួនឯងដែលមានការគាំទ្រពីរដ្ឋាភិបាលចិន។
ចុះផ្សាយនៅថ្ងៃ៖
ស្តាប់ - ០១:២៦
« ជាអកុសលដែលមានប្រទេសជាច្រើនកំពុងមានមន្ទិលសង្ស័យលើតម្លាភាពរបស់ក្រុមហ៊ុន Huawei។ បន្ទាប់មក គេបូកបញ្ចូលនូវជំហរមួយទៀតដែលគេអាចចាត់ទុកជារឿងនយោបាយរបស់ប្រទេសអង់គ្លេសពាក់ព័ន្ធនឹងវិបត្តិហុងកុង។ ចូរកុំភ្លេចថា រដ្ឋាភិបាលអង់គ្លេសបានបញ្ចេញប្រតិកម្មវាយប្រហារចិនខ្លាំងៗដែលបានបង្កើតច្បាប់សន្តិសុខជាតិលើហុងកុង និងដែលច្បាប់នេះបានដាក់គំនាបខ្លាំងលើពលរដ្ឋហុងកុង។
នេះជាបរិបទមួយ តែគេត្រូវចាប់អារម្មណ៍ជាពិសេសលើឥរិយាបទខុសៗគ្នារបស់ក្រុមហ៊ុន Huawei និងភាពមន្ទិលសង្ស័យដែលមានលើក្រុមហ៊ុន Huawei ស្តីពីតម្លាភាព។ នៅពេលដែលចិនចូលខ្លួនជួយការពារក្រុមហ៊ុន Huawei កាន់តែខ្លាំង នោះភាពមន្ទិលសង្ស័យស្តីពីការឃុបឃិតរវាង Huawei និងរដ្ឋអំណាចចិនក៏មានកាន់តែខ្លាំងដែរ។
ឥឡូវនេះ ការដែលអង់គ្លេសបានដាក់គំនាបលើចិនពេលនេះមិនបានធ្វើឲ្យអង់គ្លេសឯកោទេ ព្រោះចិនខ្លួនឯងក៏បានដាក់គំនាប និងបន្តឹងជំហរទល់នឹងដៃគូសន្ទនារបស់ខ្លួនវិញដែរ។ គេកំពុងស្ថិតនៅក្នុងបរិបទមួយដែលខ្ញុំសូមបដិសេធដាច់ខាតមិនចាត់ទុកជាសង្រ្គាមត្រជាក់រវាងបស្ចិមលោក និងប្រទេសចិនទេ។ តែជាបរិបទមួយដែលបង្ហាញយ៉ាងច្បាស់ក្រឡែតពីការពង្រឹងភាពតានតឹងនៃទំនាក់ទំនងរវាងចិន និងដៃគូបស្ចិមលោករបស់ចិន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ