អាជ្ញាធរអាមេរិករករឿង Huawei ជាថ្មី ដោយបង្កើនវិធានការកាន់តែតឹងតែង
ក្រុមហ៊ុនទូរស័ព្ទចិន Huawei នៅតែជាស្នូលនៃភាពតានតឹងរវាងអាមេរិកនិងចិន។ នៅថ្ងៃសុក្រទី ១៥ ឧសភា ដើម្បីការពារសន្តិសុខជាតិអាមេរិក ការិយាល័យព័ត៌មាននិងសន្តិសុខអាមេរិក របស់រដ្ឋបាលលោកដូណាល់ត្រាំ បានប្រកាសចាត់វិធានការ មួយចំនួនសំដៅកំរិតសមត្ថភាពរបស់ក្រុមហ៊ុន និងសាខា ក្នុងការផលិតគ្រឿងផ្សំដ៏សំខាន់មួយ ដោយប្រើ បច្ចេកវិទ្យាអាមេរិក។
ចុះផ្សាយនៅថ្ងៃ៖
ស្តាប់ - ០២:១៦
អាមេរិកចាំបាច់ត្រូវប្តូរវិធានការ ដើម្បីកុំឱ្យបច្ចេកវិទ្យាអាមេរិកទៅបំរើសកម្មភាពផ្ទុយនឹងផលប្រយោជន៍សន្តិសុខជាតិ និងនយោបាយការបរទេសរបស់ខ្លួន។ នេះជាប្រសាសន៍របស់រដ្ឋមន្ត្រីក្រសួងពាណិជ្ជកម្មដោយបានអះអាងទៀតថា
សហរដ្ឋអាមេរិកធ្វើគ្រប់យ៉ាង ដើម្បីទប់ស្កាត់វត្តមានរបស់ក្រុមហ៊ុនទូរគមនាគមន៍ចិន Huawei នៅលើទឹកដីអាមេរិក ព្រោះក្រុមហ៊ុននេះធ្វើការជាមួយរដ្ឋាភិបាលប៉េកាំង និងអាចមានសកម្មភាពចារកិច្ច ដែលគំរាមកំហែងដល់សន្តិសុខជាតិអាមេរិក។
វិធានការថ្មីរបស់អាមេរិក សំដៅធ្វើបិទខ្ទប់សមត្ថភាពរបស់ក្រុមហ៊ុន Huawei មិនឱ្យមាន Semiconducteurs ធាតុផ្សំដ៏ចំបាច់ក្នុងវិស័យទូរគមនាគមន៍ ដែលជាបច្ចេកវិទ្យាផ្ទាល់របស់អាមេរិកបានទៀត។ ក្រុមហ៊ុនណាចង់ផលិត ឬប្រើធាតុផ្សំមួយនេះ និងចង់លក់គ្រឿងផ្គុំផលិតពីធាតុនេះទៅឱ្យ Huawei និងសាខាHiSilicon ក្រុមហ៊ុនបរទេសនោះត្រូវសុំអាជ្ញាបណ្ណពីសហរដ្ឋអាមេរិកសិន ទើបអាចលក់បាន។
សម្រាប់អាមេរិក តាមរយៈវិធានការនេះ Huawei លែងមានផ្លូវអាចគេចផុតពីការត្រួតពិនិត្យរបស់អាមេរិកបានទៀតហើយ។ កន្លងមកបើទោះបីជាប់ក្នុងបញ្ជីខ្មៅអាមេរិកតាំងពីឆ្នាំ២០១៩មកក្តី ក៏ Huawei និងសាខាចំនួន១១៤ នៅតែអាចពង្វាងបម្រាមអាមេរិក ដោយបន្តប្រើកម្មវិធីព័ត៌មានវិទ្យា និងបច្ចេកវិទ្យាអាមេរិកបានដដែល តាមរយៈការបញ្ជាទិញផលិតផលពីក្រុមហ៊ុននៅបរទេស។ រដ្ឋាភិបាលអាមេរិកបានទុកពេលឱ្យក្រុមហ៊ុនបរទេស និងនៅបរទេស អាចបន្តប្រើបច្ចេកវិទ្យាអាមេរិក semi-conducteurs រយៈពេល១២០ថ្ងៃទៀត គិតចាប់ពីថ្ងៃសុក្រទី ១៥ឧសភាទៅ។
នៅពេលចូលជាធរមាន វិធានការអាមេរិកនឹងធ្វើឱ្យការផ្គត់ផ្គង់សម្ភារៈរបស់ក្រុមហ៊ុន Huawei រអាក់រអួលខ្លាំង ប៉ុន្តែផលវិបាកមិនមែនកំរិតក្រុមហ៊ុនយក្យចិនមួយនេះទេ ក្រុមហ៊ុនតៃវ៉ាន់ TSMC ដែលស៊ីឈ្នួលបន្តពី HiSilicon សាខា ព្រមទាំងក្រុមហ៊ុនអាមេរិកជាច្រើនមានជាអាទិ៍ក្រុមហ៊ុន Apple និង Qualcomm ក៏នឹងត្រូវរងការប៉ះពាល់ដែរ។ ដោយសារវិធានការនេះ ទំនាក់់ទំនងអាមេរិក-ចិន អាចនឹងឡើងតានតឹងខ្លាំងជាថ្មីឡើងវិញជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ