ភេរវកម្ម១៣វិច្ឆិកា៖ តុលាការបារាំងកាត់ទោសភេរវជន សាឡា អាប់ដេស្លាម ឲ្យជាប់ពន្ធនាគារមួយជីវិត
ចុះផ្សាយនៅថ្ងៃ៖
ស្តាប់ - ០៧:៤៧
ថ្ងៃពុធ ទី២៩មិថុនា តុលាការបារាំងផ្នែកប្រឆាំងនឹងបទល្មើសភេរវកម្ម បានសម្រេចកាត់ទោស បុគ្គលឈ្មោះ សាឡា អាប់ដេស្លាម (Salah Abdeslam) ឲ្យជាប់ពន្ធនាគារអស់មួយជីវិត។ ស្ថានទម្ងន់ទោសនេះ គឺ ធ្ងន់ជាងគេបំផុត ដែលមានចែងក្នុងក្រមព្រហ្មទណ្ឌបារាំង និងដែលចៅក្រមបារាំងកម្រនឹងចេញសេចក្តីសម្រេចយ៉ាងដូច្នេះណាស់។ សូមជ្រាបថា ពិរុទ្ធជន សាឡា អាប់ដេស្លាម គឺជាភេរវជនតែម្នាក់គត់ ដែលនៅរស់រានមានជីវិត ពី «ព្រឹត្តិការណ៍ភេរវកម្ម ថ្ងៃទី១៣ ខែវិច្ឆិកា ឆ្នាំ២០១៥» នៅក្នុងក្រុងប៉ារីស។ នេះគឺជាអំពើភេរវកម្មដ៏រន្ធត់ ដែលបានបណ្តាលឲ្យមនុស្ស១៣០នាក់ ត្រូវបាត់បង់ជីវិត និង ៣៥០នាក់រងរបួស។
ព្រឹត្តិការណ៍ភេរវកម្ម ថ្ងៃទី១៣ ខែវិច្ឆិកា ឆ្នាំ២០១៥ នៅក្រុងប៉ារីស បានរំលងទៅ ជាង៦ឆ្នាំហើយ។
នៅវេលាម៉ោង ៩និង២០នាទីយប់ គឺសំឡេងផ្ទុះ បានបន្លឺឡើង នៅក្បែរពហុកីឡដ្ឋានជាតិបារាំង ខណៈដែលមនុស្សជាច្រើនម៉ឺននាក់ រួមទាំងអតីតប្រធានាធិបតី ហ្វ្រង់ស្វ័រ ហូឡង់ ផង ក៏កំពុងតែទស្សនាការប្រកួតបាល់ទាត់ រវាងក្រុមជម្រើសជាតិបារាំង និង អាល្លឺម៉ង់។
នៅពេលនោះ ពួកជនជីហាត បានបំផ្ទុះគ្រាប់បែកសម្លាប់ខ្លួន នៅក្បែរច្រកទ្វារចូលពហុកីឡាដ្ឋាន។ ហើយក្រោយមក បានបន្តិច ក៏មានការចាប់ចំណាប់ខ្មាំងក្នុងសាលប្រគំតន្ត្រីបាតាក់ឡង់ (Batacklan) ហើយនិងការបាញ់រះនៅតាមហាងមួយចំនួន ដែលក្នុងនោះ ក៏មានទាំងភោជនីយដ្ឋានខ្មែរ ឈ្មោះ Le Petit Cambodge មួយផង។ ព្រឹត្តិការណ៍ទាំងអស់នោះ កើតឡើងដោយបានគ្រោងរៀបចំទុកជាមុន និងដែលបានផ្ទុះឡើងដំណាលៗគ្នា ប្រហែលខុសពេលតែបួនម្ភៃនាទី ពីកន្លែងមួយទៅកន្លែងតែប៉ុណ្ណោះ។ ហេតុការណ៍គួរឲ្យតក់ស្លុតនេះ បានបណ្តាលឲ្យ បាត់បង់ជីវិតមនុស្ស ចំនួន១៣០នាក់ ហើយ ៣៥០ នាក់រងរបួស។
យោងតាមការអង្កេតរបស់សមត្ថកិច្ចបារាំង អំពើភេរវកម្មនេះ គឺជាស្នាដៃ របស់បណ្តាញភេរវកម្មអ៊ីស្លាមនៅប៊ែលហ្សិក និងនៅបារាំង ហើយដែលជាប់ពាក់ព័ន្ធ ជាមួយនឹងបណ្តាញជីហាតអង្គការរដ្ឋអ៊ីស្លាម នៅអ៊ីរ៉ាក់ និងស៊ីរី ផង។
នៅថ្ងៃកើតហេតុនេះ គឺអាចមានភេរវជន ជាជនដៃដល់ ចំនួន១០នាក់។ ៩នាក់ បានត្រូវស្លាប់អស់ ដោយសារតែបំផ្ទុះគ្រាប់បែកអត្តឃាត និងត្រូវប៉ូលីសបាញ់ស្លាប់ គឺសល់តែម្នាក់គត់ដែលនៅរស់រានមានជីវិត សាឡា អាប់ដេស្លាម (Salah Abdeslam) នេះឯង។
សវនាការកាត់ទោស ជាប្រវត្តិសាស្ត្រក្នុងប្រព័ន្ធជម្រះក្តីព្រហ្មទណ្ឌបារាំង។
សវនាការកាត់ទោស បានបើកធ្វើឡើងតាំងតែពីរដូវក្តៅឆ្នាំមុន រហូតដល់រដូវក្តៅឆ្នាំនេះ។ សរុបពេល ប្រមាណ១០ខែ បើគិតជាថ្ងៃបើកសវនាការ មានចំនួន១៤៩ថ្ងៃ ហើយដែលត្រូវគេចាត់ទុកថា ជា«សវនាការប្រវត្តិសាស្ត្រ» មុនខុសទេ ។ ការជម្រះក្តីមួយដ៏ធំមិនធ្លាប់ជួប និងដែលត្រូវគេថតទុកជាឯកសារប្រវត្តិសាស្ត្រ។ ការកាត់ទោសវិញ ក៏ធ្ងន់ធ្ងរមិនធ្លាប់មានដែរ។ តុលាការបារាំងផ្នែកប្រឆាំងនឹងបទល្មើសភេរវកម្ម បានសម្រេចកាត់ទោស សាឡា អាប់ដេស្លាម ឲ្យជាប់ពន្ធនាគារអស់មួយជីវិត គឺទោសនេះ កន្លងមក ធ្លាប់ត្រូវតុលាការបារាំង សម្រេចដាក់ទោសចំពោះជនល្មើសតែបួនដងតែប៉ុណ្ណោះ។ ហើយរាល់លើក គឺសម្រាប់ករណីរំលោភសម្លាប់និងធ្វើទារុណកម្មទៅលើកូនក្មេង។ ពោលគឺចន្លោះពីឆ្នាំ ២០០៧ ដល់២០១៣។
ចំពោះសំណុំរឿងភេរវកម្ម១៣វិច្ឆិកា២០១៥ ក្រោយពេលបើកការស៊ើបអង្កេត គឺ នគរបាលប្រឆាំងអំពើភេរវកម្ម បានចាប់ខ្លួន មេគំនិត អ្នកផ្សំគំនិត ជនជាប់ពាក់ព័ន្ធជាច្រើនផ្សេងទៀត ហើយ រដ្ឋអាជ្ញាបារាំងខាងប្រឆាំងភេរវកម្ម បានបើកបទចោទប្រកាន់ក្នុងសំណុំរឿងតែមួយ ចំពោះជនសង្ស័យ ចំនួន២០នាក់ សរុបទាំង សាឡា អាប់ដេស្លាម នេះដែរ។
សាឡា អាប់ដេស្លាម មានសញ្ជាតិបារាំង និង មានអាយុ៣២ឆ្នាំ។ កាលពីសប្តាហ៍មុន មេធាវីការពារក្តី ឲ្យ សាឡា អាប់ដេស្លាម បកស្រាយចំពោះមុខអង្គជំនុំជម្រះថា កូនក្តីរបស់ខ្លួន ជាមនុស្សនៅមានចិត្តធម៌ គឺថា នៅមានភាពជាមនុស្ស មានមនុស្សធម៌ ព្រោះពុំបានសម្រេចចិត្តទាញបំផ្ទុះអាវបំពាក់គ្រាប់បែក។ ក៏ប៉ុន្តែ ចំណុចនេះ ត្រូវតុលាការរកឃើញថា មិនដូច្នោះទេ ជននេះមិនអាចបំផ្ទុះអាវបំពាក់គ្រាប់បែក ក៏ព្រោះតែវាខូចមិនដំណើរ។ នៅពេលស្តាប់ការប្រកាសសាលក្រម ពីថ្ងៃម្សិលមិញ សាឡា អាប់ដេស្លាម គឺត្រូវអ្នកកាសែតសង្កេតឃើញ បុគ្គលនេះ នៅរក្សាទឹកមាំ ទំនងជាមិនស្លត់ពេកទេ។ កាលពីសវការអាទិត្យមុន បុគ្គលនេះថែមទាំងអះអាងថា ខ្លួនពុំមែនជា ឧក្រិដ្ឋជន ឡើយ។ ទោះជាដូច្នេះក្តី បុគ្គលនេះ បានសុំទោសចំពោះជនរងគ្រោះ។
ក្នុងចំណោមអ្នកផ្សំគំនិត គឺទទួលការដាក់ទោសឲ្យជាប់ពន្ធនាគារ ដោយមានកម្រិតឆ្នាំត្រូវជាប់ឃុំខុសៗគ្នា។ ក្នុងនោះ គឺមានម្នាក់ អាចនឹងត្រូវដោះលែង។ តើហេតុអ្វី ?
រដ្ឋអាជ្ញាបារាំងខាងប្រឆាំងភេរវកម្ម បានចោទប្រកាន់និងស្នើសុំឲ្យផ្តន្ទាទោសធ្ងន់ធ្ងរ ឲ្យដាក់ពន្ធនាគារអស់មួយជីវិត ចំពោះជនជាប់ចោទជាច្រើននាក់ដែរ ក្នុងចំណោមបុគ្គលទាំង២០នាក់នោះ។ តែទីបំផុត តុលាការព្រហ្មទណ្ឌពិសេសផ្នែកភេរវកម្ម បានវែកញែកស្ថានទម្ងន់អំពើល្មើសខុសគ្នា និងត្រូវកាត់ទោសដោយមានទម្ងន់ទោសខុសៗគ្នាដែរ។ ជនជាប់ចោទ ដែលនគរបានប្រឆាំងភេរវកម្ម ចាប់ឃាត់ខ្លួន ក្រោយពេលកើតហេតុ គឺមានទាំងអ្នកដែលចូលរួមជួយជួលឡាន និងជួយសម្រួលផ្ញើលុយកាក់សម្រាប់រៀបចំមធ្យោបាយ ហើយនិងអ្នកជួយធ្វើលិខិតឆ្លងដែនក្លែងក្លាយ ជាដើម។
ស្ថានទម្ងន់ទោស របស់អ្នកទាំង១៩ផ្សេងទៀតនោះ មាន ២ឆ្នាំ ក្នុងគុក ៤- ៦-៨ឆ្នាំ មានអ្នកខ្លះត្រូវដេកគុក១៥-១៦ឆ្នាំ និង២២ឆ្នាំ រហូតដល់ ៣០ឆ្នាំ។ លើកលែងតែម្នាក់ប៉ុណ្ណោះ ឈ្មោះ Farid Karkache ដែលត្រូវគេចាត់ទុកថាអ្នកជួយអន្តរាគមន៍ជួយធ្វើលិខិតស្នាមក្លែងក្លាយឲ្យភេរវជន។ ក៏ប៉ុន្តែ ប្រធានអង្គជំនុំជម្រះ បានសម្រេចសេចក្តី ថា គ្មានធាតុផ្សំណាដែលអាចសន្និដ្ឋានថាបុគ្គលនេះនិងអំពើរបស់គាត់ ទាក់ទងនឹងដើមហេតុស្នូលនៃអំពើភេរវកម្មនោះទេ។ តែគាត់ត្រូវជាប់ទោសពីបទក្លែងបន្លំវិញ។ ដោយ ជាប់ឃុំច្រើនឆ្នាំរួចមកហើយ បុគ្គលនេះ អាចនឹងមានសេរីភាពចេញពីតុលាការ។
តុលាការបារាំងខាងប្រឆាំងអំពើភេរវកម្ម បានសម្រេចទុកពេលចំនួន១០ថ្ងៃ សម្រាប់អ្នកពាក់ព័ន្ធ, ពិរុទ្ធជននិងមេធាវីការពារក្តី ដែលចង់ប្តឹងទាស់នឹងសាលក្រម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ