តើសវនាការស្តីពីភេរវកម្មថ្ងៃទី ១៣វិច្ឆិកា២០១៥ នៅប៉ារីស មានទម្រង់យ៉ាងដូចម្តេច ?
ចុះផ្សាយនៅថ្ងៃ៖
ស្តាប់ - ០៦:១៨
៦ឆ្នាំក្រោយហេតុការណ៍ និងបន្ទាប់ពីបានចំណាយពេលរៀបចំអស់ពេលពីរឆ្នាំ សវនាការជំនុំជម្រះករណីភេរវកម្ម១៣វិច្ឆិកា២០១៥ ត្រូវចាប់បើកនៅថ្ងៃនេះ ថ្ងៃពុធទី ៨ កញ្ញា នៅទីក្រុងប៉ារីស។ ជាសវនាការដែលមានការរៀបចំនិងទំហំធំប្លែកខុសប្រក្រតី និងដែលគេចាត់ទុកជាសវនាការប្រវត្តិសាស្ត្រ។
ជនជាប់ចោទ២០នាក់
តុលាការត្រូវជំនុំជម្រះជនជាប់ចោទចំនួន២០នាក់។ ១១នាក់ កំពុងជាប់ឃុំឃាំងក្នុងពន្ធនាគារស្រេចទៅហើយ។ ជនជាប់ចោទក្រុមនេះនឹងត្រូវបង្ហាញ ខ្លួននៅក្នុងរង្វង់ក្រចកសេះ ដែលការពារដោយកញ្ចក់បាំងជិត។ បីនាក់ ដែលស្ថិតនៅក្រោមការត្រួតពិនិត្យនិងតាមដានរបស់ប៉ូលិស នឹងត្រូវបង្ហាញខ្លួនដូចជនជាប់ចោទធម្មតា។ ៦នាក់ ដែលជាប់ដីកាតាមចាប់ខ្លួនអន្តរជាតិ នឹងត្រូវកាត់ទោសដោយកំបាំងមុខ (គ្មានវត្តមាន) ក្នុងនោះមាន៥នាក់ សង្ស័យថាបានស្លាប់នៅ ក្នុងប្រទេសស៊ីរីបាត់ទៅហើយ។
ជនទាំងអស់នេះសុទ្ធតែជាប់ចោទថាបានរួម-ផ្សំគំនិត រួមចំណែកផ្តល់សម្ភារៈបរិក្ខារមធ្យោបាយធ្វើភេរវកម្មថ្ងៃទី ១៣វិច្ឆិកា២០១៥ ដែលបានបណ្តាលមានអ្នកស្លាប់១៣០នាក់ និងជាង៣៥០នាក់រងរបួស។ ជនជាប់ចោទដែលល្បីជាងគេ គឺ សាឡា អាបដេស្លាម Salah Abdeslam។ មានអាយុ៣១ឆ្នាំ សាឡាអាបដេស្លាមជាកងកម្មង់ដូរ តែម្នាក់គត់ដែលនៅមានជីវិត ក្នុងចំណោមភេរវជនដៃដល់សរុប១០នាក់។ កងកម្មង់ដូរ៩នាក់ផ្សេងទៀតបានស្លាប់ ពេលធ្វើបំផ្ទុះគ្រាប់ធ្វើភេរវកម្មអត្តឃាត ខ្លះត្រូវបានប៉ូលិសសម្លាប់ក្នុងថ្ងៃកើតហេតុការណ៍ ឬក្នុងប្រតិបត្តិការតាមចាប់ខ្លួន។
សវនាការ៩ខែ
ទម្រង់ និងការរៀបចំ ក៏មានលក្ខណៈធំធេង ខ្លាំងជាពិសេស ខុសប្លែកពីសវនាការដទៃ។ សវនាការភេរវកម្ម១៣វិច្ឆិកានេះត្រូវបានគេចាត់ទុកជាសវនាការប្រវត្តិសាស្ត្រសម្រាប់បារាំង។ ខុសប្លែកពិសេសនោះមិនមែនសំដៅលើដំណើការនីតិវិធីទេ តែពិសេសត្រង់ថា សវនាការធ្វើការជំនុំជម្រះក្តីដែលមានជនរងគ្រោះច្រើនសម្បើមបំផុត ដោយមានតំណាងភាគីស៊ីវិលដល់ទៅជិត ១៨០០នាក់ មេធាវី ជាង៣៣០នាក់ ព្រមទាំងអ្នកសារព័ត៌មានជាតិនិងអន្តរជាតិរាប់រយនាក់ ដែលបានទៅចុះឈ្មោះជាមុនដើម្បីបានចូលតាមដានព្រឹត្តិការណ៍។ នេះមិនទាន់រាប់ចំនួនសាធារណជនចូលស្តាប់សវនាការផង។ បើតាមការប៉ាន់ស្មាន ក្នុងថ្ងៃដែលមានសវនាការសំខាន់ខ្លាំង អ្នកចូលរួមអាចឡើងដល់ទៅ៣ពាន់នាក់។
គ្រាន់តែសំណុំឯកសារប្រមូលបានចងក្រងជាសៀវភៅ មានដល់ទៅជាង៥០០ក្បាល គិតជាទំព័រជាងមួយលានទំព័រ ហើយបើតម្រៀបគ្នាទៅមានប្រវែង៥៣ម៉ែត្រ។
សវនាការប្រើរយៈពេលវែងដល់ទៅ ១៤៥ថ្ងៃ (៩ខែ)។ បើអ្វីប្រព្រឹត្តទៅបានដូចការគ្រោងទុក តុលាការនឹងចេញសាលក្រមនៅថ្ងៃទី ២៤-២៥ឧសភាឆ្នាំ២០២២។
ប្រឈមនឹងសន្ធឹកនិងទំហំនៃសវនាការ អាជ្ញាធរបានរៀបចំបង្កើតសាលសវនាការថ្មី ឱ្យធំ សក្តិសមអាចទទួលមនុស្សបានច្រើន និងសាលតាមដានសវនាការចំនួន១៣បន្ថែមទៀត។ ជាសាលដ៏ធំ ទំហំ៧៥០ម៉ែត្រការ៉េ ប្រវែង៤៥ម៉ែត្រទទឹង១៥ម៉ែត្រ អាចទទួលមនុស្សបាន៥៥០នាក់ និងមានបំពាក់អេក្រង់យក្សចំនួន៨ ព្រមទាំងកាម៉េរ៉ាចំនួន១០ចាំថតដំណើរការសវនាការទាំងស្រុង សម្រាប់ទុកជាឯកសារប្រវត្តិសាស្ត្រទៀត។ សាធារណជនអាចរកមើលឯកសារវីដេអូនេះបាននៅ៥០ឆ្នាំក្រោយ។ នេះជាសវនាការលើកទី១៣ហើយដែលមានការថតទុកយ៉ាងដូច្នេះ។
ពង្រឹងសន្តិសុខអតិបរិមា
សវនាការជំនុំជម្រះករណីភេរវកម្ម ប្រព្រឹត្តទៅក្នុងពេលដែលប្រទេសកំពុងស្ថិតក្នុងការគំហែងភេរវកម្មខ្ពស់ខ្លាំង ដូច្នេះផែនការការពារសន្តិសុខក៏ត្រូវខ្លាំងជាអតិបរិមាដែរ។ រៀងរាល់ថ្ងៃ ជនជាប់ចោទនឹងត្រូវដឹកចេញពីពន្ធនាគារតាមឡានពាសដែក បញ្ជូនមកចូលតុលាការតាមផ្លូវពិសេស និងការពារដោយឧទ្ធាគចក្រពីលើអាកាសទៀត។ ចរាចរណ៍ជុំវិញតុលាការដែលស្ថិតនៅលើកោះកណ្តាលទីក្រុងប៉ារីស នឹងត្រូវហាមឃាត់រហូតដល់ម៉ោង១២កន្លះ ជារៀងរាល់ថ្ងៃបើកសវនាការ រយៈពេល៩ខែនេះ។
សវនាការនេះចំណាយអស់ច្រើនលានខ្លាំងណាស់។
ហេតុអ្វីបើកសវនាការដ៏សម្បើម ?
សវនាការនេះសំខាន់ខ្លាំងណាស់ ! ជាសវនាការប្រកបដោយនិម្មិត្តរូបបំផុត ព្រោះតាំងពីសង្គ្រាមលោកលោកទីពីរមក បារាំងពុំដែលរងការវាយប្រហារកណ្តាលក្រុងបណ្តាលឱ្យស្លាប់ជនស៊ីវិលជាច្រើននាក់ ពីសំណាក់ក្រុមឬអង្គការមួយដូច្នេះទេ។ បើមានហេតុការណ៍កើតឡើងហើយ មានជនរងគ្រោះនិងជនជាប់ចោទ គេចាំបាច់ត្រូវតែបើកសវនាការ ដើម្បីស្វែងរកយុត្តិធម៌ឱ្យគ្រប់ភាគី និងដើម្បីបានដឹងការពិត។ ការពិតសម្រាប់ប្រវត្តិសាស្ត្របារាំងផង និងការពិត សម្រាប់គ្រួសារជនរងគ្រោះផង។
ក្តីសង្ឃឹមមួយទៀតពីសវនាការ គឺការដឹងចម្លើយពីជនជាប់ចោទ។
ថ្វីបើនៅក្នុងការអង្កេត គេអាចកំណត់សកម្មភាពរបស់ពួកភេរវជន ចាប់ពីឆ្នាំ២០១៤ ដល់ថ្ងៃធ្វើភេរវកម្មនិងតួនាទីរបស់ពួកគេម្នាក់ក្នុងសកម្មភាពធ្វើភេរវកម្មបានមែន ប៉ុន្តែនៅមានចំណុចអាថ៌កំបាំងសេសសល់ជាច្រើនផ្សេងទៀត មានជាអាទិ៍និងដំបូងគេ គឺតួនាទីរបស់ សាលា អាបដេស្លាម។ ហេតុអ្វីបានជននេះមិនចុចបំផ្ទុះគ្រាប់បែកជាប់នឹងខ្លួន? ហេតុអ្វីអង្គការរដ្ឋអ៊ីស្លាមបានប្រកាសថាមានភេរវកម្មនៅក្នុងសង្កាត់ទី១៨ ដែលពុំមានកើតឡើង ? ហេតុអ្វី មេកម្មង់ដូរដែលប៉ូលិសសម្លាប់បានតាមក្រោយ អាចចូលមកទឹកបារាំងបាន ? ។ល។ និង។ល។
សង្ឃឹមថាលើកនេះជនជាប់ចោទអាបដេស្លាម នឹងសហការជាមួយតុលាការព្រមទម្លាយការពិត។ តាំងពីថ្ងៃចាប់ខ្លួនបានមក សាលាអាបដេស្លាមនិយាយតែម្តងគត់ជាមួយមេធាវីប៊ែលហ្សិក រួចបិទមាត់ឈឹងរហូត។ ហើយក្រៅពីជនជាប់ចោទរូបនេះ គេនឹងអាចបានចម្លើយពីជនជាប់ចោទផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ