លោកម៉ាក្រុងទៅបាកដាត ដឹកនាំសន្និសីទ ដើម្បីប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម
ចុះផ្សាយនៅថ្ងៃ៖
ស្តាប់ - ០៧:០២
នៅក្រោយការត្រលប់មកកាន់អំណាច របស់ក្រុមតាលីបង់ នៅអាហ្វហ្កានីស្ថាន មានការព្រួយបារម្ភកាន់តែខ្លាំងឡើងៗ ថាក្រុមតាលីបង់អាចនឹងគ្មានសមត្ថភាពគ្រប់គ្រង ធ្វើឲ្យអាហ្វហ្កានីស្ថានក្លាយជាដែនជំរកធំ របស់ក្រុមភេរវកម្មជីហាតអង្គការដ្ឋអ៊ីស្លាម។ ជាក់ស្តែងក្រុមនេះ បានបង្កអំពើភេរវកម្មនៅព្រលានយន្តហោះក្រុងកាប៊ុល បណ្តាលឲ្យស្លាប់មនុស្សជាង៨០នាក់ កាលពីថ្ងៃព្រហស្បតិ៍កន្លងទៅ។ គឺដោយក្តីបារម្ភនេះហើយ នៅថ្ងៃសៅរ៍នេះ លោកម៉ាក្រុង ប្រធានាធិបតីបារាំង បានទៅដល់ទីក្រុងបាកដាត ប្រទេសអ៊ីរ៉ាក់ ដើម្បីបើកសន្និសីទមួយ និយាយគ្នាជាមួយមេដឹកនាំប្រទេសក្នុងតំបន់នេះ លៃលករកវិធី ធ្វើយ៉ាងណាប្រយុទ្ធប្រឆាំងនឹងក្រុមជីហាតអង្គការដ្ឋអ៊ីស្លាម ឲ្យមានប្រសិទ្ធភាព។
លោកម៉ាក្រុង រួមជាមួយលោក Moustafa al-Kazimi នាយករដ្ឋមន្ត្រីអ៊ីរ៉ាក់ បានដឹកនាំសន្និសីទមួយ ដើម្បីជជែកអំពីការរួមកម្លាំងគ្នា រៀបចំយុទ្ធសាស្ត្រប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម។ បន្ទាប់មកទៀតនៅថ្ងៃអាទិត្យ លោកម៉ាក្រុង នឹងធ្វើដំណើរទៅកាន់តំបន់ គួកដីស្ថានអ៊ីរ៉ាក់ដើម្បីថ្លែងអំណរគុណចំពោះក្រុមគួក ដែលបានប្រឹងប្រែងប្រយុទ្ធជាមួយក្រុមជីហាតអង្គការរដ្ឋអ៊ីស្លាម។ លោកម៉ាក្រុង ក៏នឹងបន្តដំណើរទៅកាន់តំបន់មូស៊ូល ដែលធ្លាប់ជាអតីតមូលដ្ឋានធំរបស់ក្រុមភេរវកម្មនេះដែរ។ ជាដំណើរទស្សនកិច្ច ប្រកបដោយការយាមកាមសន្តិសុខដ៏តឹងតែងបំផុត ដោយលោកម៉ាក្រុង ព្រមទាំងគណប្រតិភូរអមដំណើរ ត្រូវធ្វើដំណើរតាមរថយន្តពាសដែក បង្ការក្រែងមានការវាយប្រហារណាមួយ។
ការគំរាមកំហែងរបស់ក្រុមជីហាតអង្គការរដ្ឋអ៊ីស្លាម គឺជាតថៈភាពពិតជាក់ស្តែង
ទាក់ទិននឹងសន្និសីទនៅទីក្រុងបាកដាត ក្រៅពីលោកម៉ាក្រុង និងលោកនាយករដ្ឋមន្ត្រីអ៊ីរ៉ាក់ Moustafa al-Kazimi គឺមានការចូលរួមពី ព្រះចៅអាប់ដាឡាទី២ របស់ប្រទេសហ្សកដានី លោកប្រធានាធិបតីអេហ្ស៊ីប Abdel Fattah al-Sissi រួមទាំងរដ្ឋមន្ត្រីការបរទេសអ៊ីរ៉ង់ និង អារ៉ាប៊ីសាអ៊ូឌីតដែរ។ ពោលគឺសុទ្ធតែជាប្រទេសធំៗ ដែលមានតួនាទីសំខាន់ក្នុងកិច្ចការសន្តិសុខក្នុងតំបន់ដើមបូព៌ានេះ។ ដោយឡែក បើតាមប្រភពពីវិមានប្រធានាធិបតីបារាំង លោក អ៊ែរដូហ្កាន់ ប្រធានាធិបតីតួកគី ក៏ត្រូវបានគេអញ្ជើញឲ្យចូលរួមដែរ តែមិនបានផ្តល់ដំណឹងថាចូលទេ។
តាមពិតសន្និសីទនេះ ត្រូវគេគ្រោងទុកយូរមកហើយ តែស្ថានការណ៍នៅអាហ្វហ្កានីស្ថាន គឺបានមកបន្ថែមអត្ថន័យ និងជំរៅខ្លឹមសារសំខាន់ ឲ្យដល់សន្និសីទនេះ កាន់តែខ្លាំងឡើង។ ការព្រួយបារម្ភ និងតថៈភាពជាក់ស្តែងគឺវាមានពិតមែន ថាក្រុមជីហាតអង្គការរដ្ឋអ៊ីស្លាម នៅតែជាគ្រោះថ្នាក់ដ៏ធំ គំរាមដល់តំបន់ដើមបូព៌ា។
យ៉ាងណាមិញ នៅក្នុងពេលបើកសន្និសីទ លោក ម៉ាក្រុង បានថ្លែងថា « មិនត្រូវប្រហែសជាដាច់ខាតជាមួយនឹងក្រុមជីហាតអង្គការរដ្ឋអ៊ីស្លាម »។ ការពិតជាក់ស្តែង ក្រុមនេះបាត់បង់ដែនដីគ្រប់គ្រងមែន តែវានៅមានកូនក្រុមចល័ត និងធ្វើសកម្មភាពជារឿយៗ មិនថានៅអ៊ីរ៉ាក់ ឬនៅស៊ីរី ហើយនិងនៅអាហ្វហ្កានីស្ថានទៀត។
ក្រុមជីហាតអង្គការរដ្ឋអ៊ីស្លាម ប្រជែងនឹងក្រុមតាលីបង់
មិនមែនមានន័យថា ក្រុមតាលីបង់ នឹងបើកដៃ ឲ្យក្រុមជីហាតអង្គការរដ្ឋអ៊ីស្លាម ប្រមូលកម្លាំងនៅអាហ្វហ្កានីស្ថាននោះទេ។ យោងតាមការពន្យល់របស់ លោក Rasha al-Aqeedi អ្នកស្រាវជ្រាវម្នាក់នៅ Newlines Institute គឺក្រុមតាលីបង់ និងក្រុមជីហាតអង្គការរដ្ឋអ៊ីស្លាម នេះ គឺជាសត្រូវនឹងគ្នា ជាគូប្រជែងនឹងគ្នា ដែលមានមនោគមវិជ្ជាអ៊ីស្លាមផ្តាច់ការខុសគ្នា។
អ្វីដែលគេព្រួយបារម្ភនោះ គឺថា ក្រុមតាលីបង់គ្មានសមត្ថភាពគ្រប់គ្រង ដឹកនាំប្រទេសអាហ្វហ្កានីស្ថាន ធ្វើឲ្យក្រុមជីហាតអង្គការរដ្ឋអ៊ីស្លាម វាយលុកដណ្តើមយកដែនដីគ្រប់គ្រងបាន កាន់តែធំទៅៗ។ យ៉ាងណាមិញ អំពើែភេរវកម្មកាលពីថ្ងៃព្រហស្បតិ៍កន្លងទៅ នៅព្រលានយន្តហោះក្រុងកាប៊ុល ដែលបានផ្តាច់ជីវិតមនុស្សជាង៨០នាក់ ក្នុងនោះមានទាហានអាមេរិក១៣នាក់ផងនោះ បានស្តែងឲ្យឃើញទៅហើយ ពីភាពចលាចល ព្រមទាំងសមត្ថភាពដ៏ស្តួចស្តើងក្នុងការរក្សាសន្តិសុខ របស់ក្រុមតាលីបង់។
ហើយមួយវិញទៀត គឺដោយសារភាពប្រជែងគ្នានេះ ក្រុមជីហាតអង្គការរដ្ឋអ៊ីស្លាម នឹងប្រឹងប្រែង ជំរុញសន្ទុះរបស់ពួកគេកាន់តែខ្លាំងនៅឯអ៊ីរ៉ាក់ និងស៊ីរី ដើម្បីរៀបចំដែនដី បង្អួតក្រុមតាលីបង់។ យោងតាមលោក Colin Clarke នាយកផ្នែកស្រាវជ្រាវនៅមជ្ឈមណ្ឌល Soufan មានមូលដ្ឋាននៅក្រុងញូយ៉ក បានឲ្យដឹងថា ក្រុមជីហាតអង្គការរដ្ឋអ៊ីស្លាម មានសល់លុយរាប់សិបលានដុល្លារទៀត។ ដូច្នេះក្រុមនេះ អាចនឹងឆក់ឱកាសប្រមូលកម្លាំង រៀបបណ្តាញ វាយលុករៀបចំដែនដីឡើងវិញ នៅអ៊ីរ៉ាក់ និងនៅស៊ីរី ប្រសិនបើមានការប្រហែស។
បារាំងជំរុញនិងគាំទ្រអ៊ីរ៉ាក់ ឲ្យដើរតួសំខាន់
ការដែលលោកម៉ាក្រុង ប្រមែរប្រមូលប្រទេសសំខាន់ៗក្នុងតំបន់ដើមបូព៌ា មានដូចជាអ៊ីរ៉ាក់ អ៊ីរ៉ង់ ហ្សកដានី អេហ្ស៊ីបជាដើម ឲ្យមកចូលរួមសន្និសីទនៅបាកដាតនេះ គឺវាជារឿងសំខាន់ និងជាជំហានចាប់ផ្តើមដ៏ល្អរួចទៅហើយ។ តាមពិត មិនមែនបារាំង ជាអ្នកចេញមុខចាត់ចែងទេ តែការពិត គឺបារាំងគាំទ្រលើកទឹកចិត្តរដ្ឋាភិបាលអ៊ីរ៉ាក់ ដែលជាអ្នកនៅកណ្តាល ក្នុងចំណោមប្រទេសសំខាន់ៗ ក្នុងតំបន់ដើមបូព៌ា។
យោងតាមមន្ត្រីវិមានប្រធានាធិបតីបារាំង អ៊ីរ៉ាក់បច្ចុប្បន្ននេះ គឺប្រៀបបីដូចជាចង្កូត របស់តំបន់ដើមបូព៌ា។ ជាក់ស្តែងនៅក្នុងបញ្ហាជម្លោះរវាងអ៊ីរ៉ង់ និងអារ៉ាប៊ីសាអ៊ូឌីត គឺអ៊ីរ៉ាក់ ជាអ្នកនាំសារ ជាអ្នកធ្វើអាជ្ញាកណ្តាល ឲ្យមានការផ្សះផ្សារគ្នា។ ដរាបណាប្រទេសធំៗក្នុងតំបន់នេះ ដែលប្រកាន់មនោគមវិជ្ជាអ៊ីស្លាមខុសគ្នា នៅតែមិនចុះសម្រុងនឹងគ្នា នោះគឺវានឹងបើកទ្វារចំហរឲ្យក្រុមជីហាតភេរវកម្មអាចមានផ្លូវកើនកម្លាំង។ ហេតុដូច្នេះហើយ បានជាបារាំង គាំទ្រ ជំរុញអ៊ីរ៉ាក់ ឲ្យរៀបចំការផ្សះផ្សារ ធ្វើជាអាជ្ញាកណ្តាលរវាងអារ៉ាប៊ីសាអ៊ូឌីត និងអ៊ីរ៉ង់។
តែយ៉ាងណា ទាល់តែអ៊ីរ៉ាក់ មានភាពរឹងមាំខ្លួនឯងដែរ មិនថានយោបាយ សេដ្ឋកិច្ច នឹងសន្តិសុខ ទើបអាចមានទំងន់ ប្រមែរប្រមូលគេឯងបាន។ បច្ចុប្បន្ននេះ មានទាហានបារាំង ប្រចាំការនៅអ៊ីរ៉ាក់ ប្រមាណ៦០០នាក់ ដែលចាំជួយកងទ័ពអ៊ីរ៉ាក់ ផ្នែកផ្លូវអាកាស។ ហើយបើតាមសន្ទុះនៃការប្រឹងប្រែងនេះ គឺបារាំងនឹងបន្តរក្សាកម្លាំង ឬក៏អាចបន្ថែមជំនួយអ្វីទៀតដល់អ៊ីរ៉ាក់ថែមទៀតផង។
ចំណែកអាមេរិកវិញ មានកម្លាំងប្រមាណ២៥០០នាក់ តែមិនមែនកម្លាំងប្រយុទ្ធទេ។ អាមេរិកនៅជួយអ៊ីរ៉ាក់ផ្នែក ផ្តល់ប្រឹក្សាយុទ្ធសាស្ត្រយោធា និងការហ្វឹកហាត់។ លោក Rasha al-Aqeedi លើកឡើងថា ថ្វីបើសមត្ថភាពរបស់កងទ័ពអ៊ីរ៉ាក់ នៅមិនទាន់រឹងមាំក្តី តែយ៉ាងណា អាមេរិកគិតថាកងទ័ពអ៊ីរ៉ាក់នឹងមិនធ្លាក់ដុនដាប ដូចកាលពីឆ្នាំ២០១៤ ដែលធ្វើឲ្យក្រុមជីហាតអង្គការរដ្ឋអ៊ីស្លាម វាយយកឈ្នះបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ