វិបត្តិកូវីដ១៩៖ បាតុកម្មដ៏ហិង្សានៅហូឡង់ ដើម្បី ប្រឆាំងនឹងវិធានការបម្រាមគោចរ
ចុះផ្សាយនៅថ្ងៃ៖
ស្តាប់ - ០៨:០៥
បាតុកម្មដ៏ហិង្សា ដែលកើតឡើង ២ថ្ងៃផ្ទួនៗគ្នា នៅ ប្រទេសហូឡង់ បានធ្វើឲ្យគេភ្ញាក់ផ្អើលជាខ្លាំង។ នៅ យប់ថ្ងៃអាទិត្យ និងថ្ងៃចន្ទ ទី ២៥ មករា បាតុកម្មបានផ្ទុះឡើង នៅតាមទីក្រុងជាច្រើនរបស់ប្រទេសហូឡង់ ដើម្បី ប្រឆាំងនឹងបម្រាមគោចរដែលរដ្ឋាភិបាល បានប្រកាសអនុវត្ត សម្រាប់ ទប់ស្កាត់ការឆ្លងរាលដាលមេរោគបំប្លែងខ្លួនថ្មី។ បាតុកម្ម អំពើហិង្សាប្រឆាំងនឹងវិធានការរឹតបន្តឹងរបស់រដ្ឋាភិបាល កើតមានផងដែរនៅ ចុងសប្តាហ៍មុននេះ នៅ ប្រទេស ដាណឺម៉ាក អ៊ីស្រាអែល អេស្ប៉ាញ លីបង់ ជាដើម។ បាតុកម្មចាប់ផ្តើមកក្រើកឡើង នៅក្នុងពេលប្រទេសអឺរ៉ុបជាច្រើន ដូចជាបារាំង ជាដើម កំពុងពិចារណា ចង់បិទខ្ទប់ប្រទេសជាលើកទី ៣ ដើម្បីទប់ទល់នឹងការឆ្លងរាលដាលរបស់មេរោគបំប្លែងខ្លួនថ្មី ឬមេរោគអង់គ្លេស។
ប្រទេសហូឡង់បានជួប បាតុកម្មដ៏ហិង្សា២ថ្ងៃផ្ទួនៗគ្នា ដើម្បីប្រឆាំងនឹងបម្រាមគោចររបស់រដ្ឋាភិបាល ដែលចាប់ចូលជាធរមាន តាំងពីថ្ងៃសៅរ៍ទី ២៣មករា។ រដ្ឋាភិបាលហូឡង់ ធ្លាប់បានប្រកាសបិទខ្ទប់ប្រទេសម្តងហើយ ដល់ទៅ ៣សប្តាហ៍ កាលពី ខែធ្នូកន្លងទៅ ដើម្បី ទប់ស្កាត់ការឆ្លងរាលដាលជំងឺកូវីដ១៩។
ចាប់តាំងពីមានវិធានការរឹតបន្តឹងរបស់រដ្ឋាភិបាលហូឡង់ ដូចជា ការប្រកាសបិទខ្ទប់ ប្រទេស កន្លងមក ដើម្បីទប់ស្កាត់ការចម្លងរាលដាលជំងឺកូវីដ ធ្លាប់មានដែរ បាតុកម្មប្រឆាំង ប៉ុន្តែ មិនដែលកើតមានអំពើហិង្សានោះទេ។ នេះជាលើកទី១ ដែលបាតុកម្មប្រឆាំងវិធានការរឹតបន្តឹង របស់រដ្ឋាភិបាល បានប្រែក្លាយទៅជាបាតុកម្មហិង្សា ឬកុប្បកម្មហិង្សាផងដែរសម្រាប់ក្រសែភ្នែករបស់រដ្ឋាភិបាល។
ត្រូវដឹងថា នៅក្រោយរដ្ឋាភិបាល បណ្តោះអាសន្នរបស់ហូឡង់ប្រកាសដាក់អនុវត្ត បម្រាមគោចរ ចាប់ពី ថ្ងៃសៅរ៍ ទី ២៣មករា រហូត ថ្ងៃទី ៩កុម្ភៈ បាតុកម្មប្រឆាំងវិធានការរបស់រដ្ឋាភិបាលបានផ្ទុះឡើង នៅតាមទីក្រុងធំៗរបស់ហូឡង់ ដែលមានតាំង ពី Amsterdam Rottadam ជាដើម។ នៅក្នុងបាតុកម្ម ហិង្សា នៅថ្ងៃអាទិត្យ និងនៅ ថ្ងៃចន្ទ មន្ទីរពេទ្យ រងការវាយប្រហារ ពីក្រុមបាតុករ។ កន្លែងធ្វើតេស្ត រកមេរោគកូវីដ ក៏ត្រូវគេដុតបំផ្លាញ ចំណែក ប៉ូលិស និងអ្នកកាសែត ដែលបាតុករចោទថា ជាដៃជើងរបស់រដ្ឋាភិបាល បានរងការគំរាមកំហែង វាយប្រហារ ពីសំណាក់បាតុករ។
បម្រាមគោចរ លើកនេះ មានរយៈពេលខ្លី និងមានលក្ខណៈធូស្រាល ជាងប្រទេសផ្សេងទៀត ដូចជាប្រទេសបារាំង ជាដើម ដែលចាប់អនុវត្ត តាំងពីម៉ោង ៦ល្ងាច រហូតដល់ម៉ោង ៦ព្រឹក។ នៅ ហូឡង់ បម្រាមគោចរ នឹងចាប់មានត្រឹមពីម៉ោង ៩យប់ ទៅដល់ ម៉ោង ៤កន្លះភ្លឺ តែប៉ុណ្ណោះ ប៉ុន្តែ សម្រាប់ ប្រជាជនហូឡង់ នេះជារឿងមួយដែលគេមិនអាចទទួលយកបានទេ។ ទី ១ រឿងបម្រាមគោចរជារឿងរសើប និងទើបមានជាលើកទី ១ នៅ ហូឡង់ ចាប់តាំងពីចប់សង្រ្គាមលោកលើកទី ២មក។ ទី ២ ទាក់ទងនឹងការអនុវត្តបម្រាមគោចរលើកនេះ គឺមានការខ្វែងគំនិតគ្នា សូម្បីក្នុងរដ្ឋាភិបាល ហូឡង់ផ្ទាល់។ អ្វីដែលប្រជាជនហូឡង់ មិនយល់ នៅត្រង់ថា ករណីឆ្លងជំងឺកូវីដបានធ្លាក់ថយចុះ នៅក្នុងប្រទេស ប៉ុន្តែ ហេតុអ្វី បានជារដ្ឋាភិបាល សម្រេច ដាក់បម្រាមគោចរ ដែលនឹងអាចប៉ះពាល់ដល់សិទ្ធិសេរីភាពរស់នៅ របស់ប្រជាជនធ្វើអ្វី? អ្នកដែលចូលរួមក្នុងបាតុកម្មលើកនេះ ភាគច្រើន ជាយុវជន ដែលមិនសប្បាយចិត្តនឹងវិធានការរឹតបន្តឹង ការដើរហើរ សម្រេចដោយរដ្ឋាភិបាល។ មានផងដែរ ក្រុមអ្នកប្រឆាំងនឹងវ៉ាក់សាំង អ្នកនយោបាយ ប្រឆាំងរដ្ឋាភិបាល ហើយនិងសកម្មជនការពារសិទ្ធិសេរីភាព។
សម្រាប់នាយករដ្ឋមន្រ្តីហូឡង់ បាតុកម្ម កាលពី ថ្ងៃអាទិត្យ គ្មានទាក់ទងនឹងការទាមទារសេរីភាពនោះទេ។ គេត្រូវរួមគ្នាប្រយុទ្ធប្រឆាំង នឹងមេរោគកូវីដ។ បើមិនដូច្នេះទេ គេមិនអាចទទួលបានសេរីភាពវិញនោះបានទេ។” នេះជាប្រសាសន៍របស់នាយករដ្ឋមន្រ្តីហូឡង់ លោក Mark Rutte។
នៅហូឡង់ អ្នកឆ្លងសរុប មានចំនួនជាង ៩៥២៩៥០នាក់ ដោយមានអ្នកឆ្លងប្រមាណ៤០១៧នាក់ ក្នុងមួយថ្ងៃ និងមនុស្សស្លាប់ សរុប ១៣ ៥៧៩នាក់។
ជារួម ប៉ូលិសបានចាប់ខ្លួន មនុស្ស សរុប ៣២០នាក់ នៅក្នុងបាតុកម្ម ទូទាំងប្រទេស នៅរយៈពេល ២ថ្ងៃ។
បាតុកម្មផ្ទុះនៅប្រទេសជាច្រើន ដើម្បីប្រឆាំងវិធានការរឹតបន្តឹង ដើម្បីបង្ការការឆ្លងរាលដាលជំងឺកូវីដ ១៩
ប្រឈមនឹងគំរាមកំហែងនៃការឆ្លងរាលដាលលឿនរបស់មេរោគកូវីដ បំប្លែងខ្លួនថ្មី រដ្ឋាភិបាលរបស់ប្រទេសជាច្រើន បានចាត់វិធានការ រឹតបន្តឹង ជាច្រើន ដូចជាការដាក់បម្រាមគោចរ ឬបិទខ្ទប់ប្រទេសជាដើម។ ដូច្នេះ បាតុកម្ម ប្រឆាំងវិធានការរឹតបន្តឹងរបស់រដ្ឋាភិបាល បានកើតមានជាហូរហែ នៅតាមប្រទេសជាច្រើន។ នៅអេស្ប៉ាញ ក្រុមដែលមិនជឿថា មានមេរោគកូវីដ ពិតប្រាកដ បានធ្វើបាតុកម្មប្រឆាំង វិធានការរឹតបន្តឹងរបស់រដ្ឋាភិបាល។ នៅ លីបង់ ការប៉ះទង្គិចគ្នារវាង ប៉ូលិសហើយ និងយុវជនដែលជាបាតុករ បានធ្វើឲ្យមានមនុស្សរបួស ៣០នាក់។ លីបង់ដែលមានប្រជាជន តែ ៦លាននាក់ ករណីឆ្លង ជំងឺកូវីដ មានដល់ទៅ ជិត ៣សែននាក់។ ដើម្បីជួយសម្រាលបន្ទុក របស់មន្ទីរពេទ្យ ដែលគ្មានគ្រែ ឧបករណ៍គ្រប់គ្រាន់ រដ្ឋាភិបាលលីបង់ បានសម្រេចបិទខ្ទប់ប្រទេស ចាប់តាំងពីថ្ងៃចន្ទម្សិលមិញ រហូតដល់ថ្ងៃទី ៨កុម្ភៈ។
នៅ អ៊ីស្រាអែលឯណោះវិញ ក្រុមសាសនានិយមជ្រុលក៏បានធ្វើបាតុកម្មប្រឆាំងនឹងវិធានការរបស់រដ្ឋាភិបាល ដែលបានសម្រេចបិទសាលារៀនដែរ។ សម្រាប់អ្នកដែលធ្វើបាតុកម្មតវ៉ា សាលារៀនមិនថា សាលារៀនទូទៅ ឬសាលា បង្រៀនសាសនានោះទេ ជាកន្លែងសំខាន់ ដែលគេមិនត្រូវបិទនោះទេ។ ម្យ៉ាង ពួកសិស្សនៅ សាលាសាសនាជាច្រើននាក់ ធ្លាប់បានឆ្លង និងមានប្រព័ន្ធការពារ សម្រាប់ទប់ទល់ នឹងជំងឺកូវីដរួចហើយ ដូច្នេះ រដ្ឋាភិបាលមិនគួរបិទទាំងអស់នោះទេ។
នៅក្រោយវិបត្តិកូវីដ មួយឆ្នាំមកនេះ វិធានការបិទខ្ទប់ប្រទេសជារឿងដែលប្រជាជនលែងទទួលយកបាន
ប្រឈមនឹងមេរោគកូវីដបំប្លែងខ្លួនថ្មី ឬមេរោគអង់គ្លេស ដែលល្បីខាងឆ្លងលឿនជាងមេរោគទម្រង់ដើម រដ្ឋាភិបាលបារាំង កំពុងនៅ រារែក មិនទាន់សម្រេចថា តើត្រូវចាត់វិធានការបិទខ្ទប់ប្រទេសជាលើកទី ៣ដែរឬទេ។ នៅចំពោះមុខនៃការគំរាមកំហែងរបស់មេរោគកូវីដបំប្លែងខ្លួនថ្មី មេរោគអង់គ្លេស ក្រុមវិទ្យាសាស្រ្តបានជំរុញ ឲ្យរដ្ឋាភិបាល សម្រេចបិទខ្ទប់ប្រទេសឲ្យបានឆាប់បំផុត ដើម្បីកុំឲ្យធ្លាក់ក្នុងស្ថានភាពដុនដាប ដូចអង់គ្លេសសព្វថ្ងៃ។
ប៉ុន្តែ វិធានការបិទខ្ទប់ប្រទេសជាលើកទី ៣ មិនមែនជារឿងងាយស្រួល នោះទេ។ រដ្ឋាភិបាលត្រូវថ្លឹងថ្លែងមែនទែន ជាពិសេស ការខាតបង់សេដ្ឋកិច្ច។ វិធានការបិទខ្ទប់លើកទី ១កាលពីខែមីនាឆ្នាំមុនបានធ្វើផលិតផលក្នុងស្រុកសរុបបារាំង ធ្លាក់ថយចុះ អស់ ៣០ភាគរយ ចំណែក វិធានការបិទខ្ទប់ប្រទេសលើកទី ២នៅខែតុលាកន្លងទៅ បានធ្វើឲ្យផលិតផលក្នុងស្រុកសរុប ថយចុះ អស់ ១២ភាគរយ។
រាល់វិធានការបិទខ្ទប់ ប្រទេសម្តង ធ្វើឲ្យរដ្ឋាភិបាលបារាំងខាតបង់ ១១ពាន់លានអឺរ៉ូ ក្នុងមួយខែ នោះ ក៏ដោយសារតែ ភោជនីយដ្ឋាន ហាងទំនិញ ដែលមិនចាំបាច់ ត្រូវបិទទ្វារ ចំណែកសកម្មភាពវប្បធម៌ គ្មានសោះតែម្តង។ វិធានការបិទខ្ទប់ប្រទេស មិនត្រឹមតែប៉ះពាល់ដល់សេដ្ឋកិច្ចតែប៉ុណ្ណោះទេ ប៉ុន្តែ វាបានជះឥទ្ធិពលអាក្រក់ច្រើនមកហើយ ទៅលើសង្គម។ យុវជន និស្សិតបារាំង បានត្អូញត្អែរពីវិបត្តិផ្លូវចិត្ត អស់សង្ឃឹម ក្នុងជីវិត ដោយសារតែសាលារៀន បិទទ្វា រៀនមិនបានជាប់លាប់ ហើយក្រុមហ៊ុនជាច្រើនបានបិទទ្វារ ឬក៏កាត់បន្ថយបុគ្គលិក។
នៅ ថ្ងៃចន្ទ មន្រ្តីរដ្ឋាភិបាលបារាំង ពន្លយឲ្យដឹងថា លោកប្រធានាធិបតី បារាំង នឹងមិនប្រកាសអ្វី នៅក្រោយកិច្ចប្រជុំក្រុមប្រឹក្សាយោធា នៅថ្ងៃពុធ សប្តាហ៍នេះទេ ដែលជាហេតុធ្វើឲ្យគេជឿថា រដ្ឋាភិបាលបារាំង នឹងមិនប្រកាសបិទខ្ទប់ប្រទេសជាលើកទី ៣នៅ សប្តាហ៍នេះ ដូចពាក្យចចាមអារ៉ាម កន្លងមកនោះទេ។
ប្រជាជនបារាំង ជាច្រើន ជាពិសេស យុវជន ហាក់លែងទទួលយកបានហើយ វិធានការបិទខ្ទប់ប្រទេស។ វិធានការបិទខ្ទប់ប្រទេស ជាលើកទី ៣ នឹងអាចជម្រើសដ៏ចុងក្រោយបំផុត ដែលរដ្ឋាភិបាល ត្រូវជ្រើសរើស។ ក្នុងពេលនេះ រដ្ឋាភិបាលបារាំង ទំនងផ្តល់អាទិភាពលើយុទ្ធនាការចាក់វ៉ាក់សាំង និងរង់ចាំងមើលលទ្ធផលនៃ វិធានការអនុវត្ត បម្រាមគោចរ ជាមុន សិន នៅមុន នឹង សម្រេចបិទខ្ទប់ប្រទេស ជាលើកទី ៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ