ហេតុអ្វី ហុងគ្រី និងប៉ូឡូញ វេតូប្រឆាំងផែនការជំរុញ សេដ្ឋកិច្ច របស់គណៈកម្មការអឺរ៉ុប?
ចុះផ្សាយនៅថ្ងៃ៖
ស្តាប់ - ០៧:០៨
ហុងគ្រី និងប៉ូឡូញ បានបង្កើតការភ្ញាក់ផ្អើល កាលពីថ្ងៃចន្ទទី ១៦ វិច្ឆិកា ដោយបានបោះឆ្នោត វេតូ ប្រឆាំង ផែនការផ្តល់សន្ទុះសេដ្ឋកិច្ច ដែលអឺរ៉ុបធ្លាប់បានចរចាយ៉ាងស្វិតស្វាញកាលពីខែកក្កដា ដើម្បីជំរុញកំណើនសេដ្ឋកិច្ច ដែលរងគ្រោះដោយសារវិបត្តិកូវីដ១៩។ ដោយសារតែវេតូរបស់ហុងគ្រី និងប៉ូឡូញ ផែនការផ្តល់សន្ទុះសេដ្ឋកិច្ច នៅក្រោយវិបត្តិកូវីដ ប្រមាណ ៧៥០ពាន់លានអឺរ៉ូ នឹងត្រូវជាប់គាំង ជាថ្មីម្តងទៀត។
នៅក្នុងកិច្ចប្រជុំរបស់ឯកអគ្គរដ្ឋទូត ប្រចាំសហភាព អឺរ៉ុប នៅថ្ងៃចន្ទ ទី ១៦វិច្ឆិកា ឯកអគ្គរដ្ឋទូតហុងគ្រី និងប៉ូឡូញ បានលើកដៃ វេតូ មិនឲ្យគេអាចអនុម័តកញ្ចប់ថវិកាពីរ។ ទីមួយ គឺ អនាគត កញ្ចប់ថវិកា ១០៧ម៉ឺនលានអឺរ៉ូ ដែលអឺរ៉ុប ត្រូវចំណាយ ពី ឆ្នាំ២០២១ ដល់ឆ្នាំ ២០២៧ ហើយនិងមួយទៀត គឺ កញ្ចប់ថវិកា ៧៥០ពាន់លានអឺរ៉ូ ដែលគេត្រូវប្រើសម្រាប់ស្តារសេដ្ឋកិច្ច របស់ប្រទេសអឺរ៉ុប ដែលកំពុងរងគ្រោះដោយសារវិបត្តិកូវីដ។
គេនៅចាំបានថា កាលពី ៤ខែ មុន ប្រទេសសមាជិកសហភាពអឺរ៉ុបទាំង ២៧ បានចរចាគ្នា យ៉ាងស្វិតស្វាញ ទម្រាំនិយាយចុះសម្រុងព្រមព្រៀងគ្នា ឲ្យមានកញ្ចប់ថវិកា ៧៥០ពាន់លានដុល្លារ សម្រាប់ដោះស្រាយវិបត្តិកូវីដ។ ប៉ុន្តែ នៅទីបំផុត កញ្ចប់ថវិកាដែលគេត្រូវការសម្រាប់យកផ្តល់សន្ទុះសេដ្ឋកិច្ចអឺរ៉ុប ក៏ត្រូវជាប់គាំង ទៅវិញ ដោយសារការបោះឆ្នោតវេតូរបស់ហុងគ្រី និងប៉ូឡូញ។
បើតាមអ្នកនាំពាក្យរបស់រដ្ឋាភិបាលប៉ូឡូញ ប៉ូឡូញ បោះឆ្នោតវេតូ ព្រោះថា ផែនការជំរុញកំណើនសេដ្ឋកិច្ច មានភ្ជាប់មកជាមួយនូវលក្ខខណ្ឌ “នីតិរដ្ឋ”។
សូមបញ្ជាក់ថា ដើម្បីទទួលបានប្រាក់ជំនួយ ប្រទេស មួយចំនួន ត្រូវគោរព ត្រូវគោរពឲ្យបានខ្ជាប់ខ្ជួន នីតិរដ្ឋ និងតម្លៃរបស់អឺរ៉ុប ពិសេសត្រូវការពារផលប្រយោជន៍រួម។ កាលពីដើមខែវិច្ឆិកានេះ សភាអឺរ៉ុប រួមទាំងគណៈកម្មការអឺរ៉ុបបានសម្រេចបង្កើតយន្តការមិនផ្តល់មូលនិធិដល់ប្រទេសណាដែលមិនគោរព នីតិរដ្ឋ ដូចជាតុលាការមិនឯករាជ្យ និងការមិនគោរពសិទ្ធិជាមូលដ្ឋានជាដើម។ យន្តការមួយ ដែលមានតួនាទីជាអ្នកតាមឃ្លាំមើលលើការគោរពលក្ខខណ្ឌទាំងអស់នេះ និងមានការពិន័យ បើមានការបំពាន។
ប៉ូឡូញ និងហុងគ្រី ដឹងថា ខ្លួន ខាតប្រយោជន៍ ប៉ុន្តែ នៅតែ បោះឆ្នោត វេតូ
ទៅតាមផែនការផ្តល់សន្ទុះសេដ្ឋកិច្ច ប៉ូឡូញ ត្រូវទទួលបានប្រាក់ ២៣ពាន់លានអឺរ៉ូ ចំណែក ហុងគ្រី នឹងបាន៦ពាន់លានអឺរ៉ូ សម្រាប់ យកទៅ ជួយសង្រ្គោះសេដ្ឋកិច្ច ដែលរងប៉ះពាល់ដោយសារវិបត្តិកូវីដ។ នេះគេនៅមិនទាន់និយាយពីកញ្ចប់ប្រាក់ រាប់ពាន់លានអឺរ៉ូ ផ្សេងទៀត ដែលហុងគ្រី និងប៉ូឡូញ ត្រូវទទួលបានរៀងរាល់ឆ្នាំ ពីកញ្ចប់ថវិកាអឺរ៉ុប ជាង ១០៧ម៉ឺនលានអឺរ៉ូផង។
ប៉ុន្តែ សម្រាប់រដ្ឋមន្រ្តីក្រសួងយុត្តិធម៌ប៉ូឡូញ កញ្ចប់ថវិកាអឺរ៉ុប ដែលមានភ្ជាប់មកជាមួយនូវលក្ខខណ្ឌ ការគោរពនីតិរដ្ឋ យ៉ាងដូច្នេះ គឺជាការប៉ះពាល់ដល់អធិបតេយ្យភាពរបស់ប្រទេសសមាជិក ដូចជាប៉ូឡូញ ជាដើម។
គេវាយតម្លៃថា ប្រទេសហុងគ្រី និងប៉ូឡូញ បដិសេធ មិនគាំទ្រឲ្យមានកញ្ចប់ថវិកា ភ្ជាប់ទៅដោយ លក្ខខណ្ឌ គោរពនីតិរដ្ឋ ក៏ព្រោះ ថា កន្លងមក ប្រទេសទាំងពីរ ធ្លាប់បានរងការរិះគន់ចាស់ដៃពីគណៈកម្មការ អឺរ៉ុបក្នុងបទរំលោភ សេរីភាពព័ត៌មាន ឬធ្វើកំណែទម្រង់ នយោបាយ ដែលអាចរំលោភបំពានឯករាជ្យភាពរបស់ប្រព័ន្ធតុលាការជាដើម។
កិច្ចព្រមព្រៀងជាប្រវត្តិសាស្រ្តដែលកំពុងដើរដល់ផ្លូវទ័ល
កញ្ចប់ទឹកប្រាក់ទាំង ៧៥០ ពាន់លានអឺរ៉ូជាប្រាក់កម្ចីដែលគណៈកម្មការអឺរ៉ុបជាអ្នកចេញមុខខ្ចីក្នុងនាមសមាជិកអឺរ៉ុបទាំង ២៧ប្រទេស។ វាជាលើកទី១ ក្នុងប្រវត្តិសាស្រ្ត ដែលប្រទេសសមាជិកអឺរ៉ុប យល់ព្រមឲ្យមានប្រាក់បំណុលរួម យ៉ាងដូច្នេះ។ ទឹកប្រាក់ ៧៥០ ពាន់លានអឺរ៉ូនេះ នឹងត្រូវអឺរ៉ុបយកទៅប្រើក្រោមរូបភាពពីរ គឺមួយ ជាប្រាក់ជំនួយដែលមានចំនួន ៣៩០ ពាន់លានអឺរ៉ូ និងមួយទៀត ជារូបភាព ប្រាក់កម្ចីដែលមានចំនួន ៣៦០ ពាន់លានអឺរ៉ូ។ ប្រាក់កម្ចីនេះនឹងផ្តល់ទៅឲ្យប្រទេសសមាជិកណាដែលត្រូវការខ្ចីតាមចំនួនដែលខ្លួនចង់បាន ហើយគឺប្រទេសដែលខ្ចី ដែលជា អ្នកសង គ្រាន់តែថា សងជាមួយ អត្រាការប្រាក់ទាប ដោយសារវាជាបំណុលដែលគណៈកម្មការអឺរ៉ុបបានចេញមុខទៅ ខ្ចីជំនួស។
ចំណែកប្រាក់ជំនួយវិញ នឹងត្រូវបែងបែកឲ្យគ្រប់ប្រទេសសមាជិកដោយផ្អែកលើស្ថានការណ៍សេដ្ឋកិច្ចជាក់ស្តែងរបស់ប្រទេសសមាជិកនីមួយៗ។ តែប្រទេសដែលអាចទទួលបានច្រើនជាងគេ គឺប្រទេសដែលបានរងគ្រោះដោយកូវីដ-១៩ ខ្លាំងជាងគេ ពិសេសអ៊ីតាលី និងអេស្ប៉ាញ។ ចំណែក ប៉ូឡូញ និងហុងគ្រី ដែលកំពុងលង់ខ្លួន ក្នុងវិបត្តិកូវីដ ក៏នឹងអាចទទួលបានប្រាក់ជំនួយ និងប្រាក់កម្ចី ពីកញ្ចប់ថវិកា ៧៥០ពាន់លានអឺរ៉ូរបស់គណៈកម្មការអឺរ៉ុបដែរ។
នៅក្នុងកាលៈទេសៈ ដែល អឺរ៉ុបកំពុងត្រូវការថវិកា ខ្លាំង ដោយសារ តែកំពុងរួបរឹតដោយវិបត្តិសេដ្ឋកិច្ច និងវិបត្តិសុខភាព ដោយសារតែជំងឺកូវីដ យ៉ាងដូច្នេះ ការលើកដៃវេតូរបស់ហុងគ្រី និងប៉ូឡូញ ពេលនេះ គឺជាដំណឹងអាក្រក់មួយ សម្រាប់ប្រទេសសមាជិកអឺរ៉ុបទាំងមូល។ អ្នកតំណាងអាល្លឺម៉ង់ ដែលដឹកនាំ សហភាពអឺរ៉ុបឆ្នាំនេះ បានសំដែងការខកចិត្ត និងបានអំពាវនាវឲ្យ មេដឹកនាំអឺរ៉ុប ទាំងអស់រកដំណោះស្រាយបន្ទាន់ ព្រោះថា គេបានខាតពេលច្រើនណាស់មកហើយ ហើយក៏កំពុងលង់ខ្លួន កាន់តែខ្លាំងណាស់ដែរទៅក្នុងវិបត្តិកូវីដ។
បើសិន គ្មានវេតូរបស់ហុងគ្រី និងប៉ូឡូញ គណៈកម្មការអឺរ៉ុបអាចចេញមុខទៅខ្ចីលុយ ហើយអាចចាប់ផ្តើម អនុវត្តផែនការជំរុញសេដ្ឋកិច្ច ផ្តល់ប្រាក់ជំនួយ ឬកម្ចី ដល់ប្រទេសសមាជិក ចាប់ពីខែ មេសា ប៉ុន្តែ ដោយសារតែការខកខាន គ្មានការបោះឆ្នោត ដោយសារតែវេតូរបស់ហុងគ្រី និងប៉ូឡូញ ជំនួយរបស់អឺរ៉ុបសម្រាប់ដោះស្រាយវិបត្តិកូវីដ នឹងអាចរូបរាង នៅពាក់កណ្តាលឆ្នាំ ក្រោយឯណោះ។
នៅក្រោយ វេតូ របស់ហុងគ្រី និងប៉ូឡូញ ការពិភាក្សារវាងប្រទេសសមាជិកអឺរ៉ុបទាំង ២៧ ត្រូវជជែកគ្នា នៅក្នុងកិច្ចប្រជុំមួយទៀត នៅព្រុចសែល នៅថ្ងៃ អង្គារ។ គេសង្ឃឹមថា នៅក្នុងជំនួបកំពូលអឺរ៉ុប នៅថ្ងៃព្រហស្បតិ៍ ទី ខាងមុខ មេដឹកនាំប្រទេសបារាំង និងអាល្លឺម៉ង់ នឹងអាចបញ្ចុះបញ្ចូលនាយករដ្ឋមន្រ្តីរបស់ហុងគ្រី និងប៉ូឡូញ ឲ្យផ្លាស់ប្តូរជំហររបស់ខ្លួនឡើងវិញ ព្រោះថា ចង់ ឬមិនចង់ កញ្ចប់ថវិកាអឺរ៉ុប នឹងប្រើសម្រាប់ផលប្រយោជន៍ និងស្រោចស្រង់សេដ្ឋកិច្ច របស់គ្រប់ប្រទេសសមាជិក ដែលរួមមានទាំងប៉ូឡូញ និងហុងគ្រីផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ