កម្លំាងសម្ព័ន្ធមិត្តបានបើកការវាយប្រហារលើពួកជីហាតក្នុងប្រទេសស៊ីរីជាលើកទី១
ចុះផ្សាយនៅថ្ងៃ៖
ស្តាប់ - ០៧:២១
នៅថ្ងៃយប់ថ្ងៃចន្ទឆ្លងចូលថ្ងៃអង្គារ ទី២៣ កញ្ញានេះ ទ័ពអាមេរិកំាងរួមជាមួយកម្លំាងទ័ពរបស់ប្រទេសដៃគូមួយចំនួននៅក្នុងតំបន់បានបើកការវាយប្រហារតាមផ្លូវអាកាស និងផ្លូវទឹកជាលើកទី១ លើទីតំាងរបស់ពួកជីហាតនៅក្នុងប្រទេសស៊ីរី។ ប្រទេសដៃគូដែលបានចូលរួមនៅក្នុងប្រតិបត្តិនោះសុទ្ធសឹងជាប្រទេសអារ៉ាប់ក្នុងតំបន់ និងដែលប្រតិបត្តិការនោះត្រូវបានសំដៅពិសេសលើតំបន់រ៉ាក់កា (Raqqa) ដែលជាជម្រករបស់ពួកជីហាតនៅក្នុងប្រទេសស៊ីរី។ អ្វីជាការកត់សម្គាល់ ប្រតិបត្តិការវាយប្រហារពួកជីហាតក្នុងប្រទេសស៊ីរីពេលនេះបានធ្វើឡើង មួយថ្ងៃបន្ទាប់ពីចលនាភេរវនិយមមួយនេះបានអំពាវនាវឲ្យមានការសម្លាប់ជនបរទេសក្នុងប្រទេសណាដែលបានចូលរួមវាយប្រហារពួកជីហាតនៅអ៊ីរ៉ាក់ និងស៊ីរី។
ការដែលអាមេរិក និងប្រទេសដៃគូមួយចំនួនបានបើកការវាយប្រហារស៊ីរីពេលនេះត្រូវបានគេចាត់ទុកជារឿងគួរឲ្យភ្ញាក់ផ្អើលផង និងជាការរង់ចំាផង។ រង់ចំាព្រោះពួកជីហាតមិនមែនមានមូលដ្ឋានតែនៅក្នុងប្រទេសអ៊ីរ៉ាក់ប៉ុណ្ណោះទេ តែក៏មាននៅក្នុងប្រទេសស៊ីរីដែរ។ តាមការប្រមើលមើល ដែនដីដែលពួកជីហាតកំពុងកាន់កាប់សព្វថ្ងៃមានទំហំប្រហាក់ប្រហែលនឹងផ្ទៃដីរបស់ប្រទេសអង់គ្លេសដែលក្នុងនោះ មួយភាគស្ថិតក្នុងប្រទេសអ៊ីរ់ាក់ និងមួយភាគទៀតស្ថិតក្នុងប្រទេសស៊ីរីប៉ែកខាងជើង។ ចលនាភេរវនិយមមួយនេះមានកម្លំាងជិត ៥០ ០០០នាក់នៅស៊ីរី និងពី ៨ ០០០ ទៅ ១០ ០០០នាក់នៅអ៊ីរ៉ាក់។ យោងតាមតួលេខរបស់ក្រសួងការបរទេសអាមេរិក មានយុទ្ធជនជីហាតប្រមាណជា ១២ ០០០នាក់ ជាជនបរទេសមកពី៥០ប្រទេសខុសគ្នា ក្នុងនោះមានជនជាតិអាមេរិកប្រមាណជា ១០០នាក់បានធ្វើដំណើរទៅកាន់ប្រទេសស៊ីរី តំាងពីថ្ងៃមានការងើបបះបោរប្រឆំាងនឹងរដ្ឋាភិបាលស៊ីរីកាលពីឆ្នំា ២០១១។
ម្យ៉ាងទៀត លោកប្រធានាធិបតីអាមរិកអូបាម៉ាក៏ធ្លាប់បានប្រកាសនៅក្នុងសុន្ទរកថាកាលពី ១០ថ្ងៃមុនរួចហើយថា យុទ្ធនាការកំចាត់ពួកជីហាតនឹងត្រូវធ្វើឡើងនៅគ្រប់ទីកន្លែងទំាងអស់ ដោយរាប់បញ្ចូលទំាងប្រទេសស៊ីរីផង។ រីឯរឿងភ្ញាក់ផ្អើលវិញដោយសារគេនឹកស្មានមិនដល់ថា ហេតុអ្វីបានជាអាមេរិកបានសម្រេចវាយប្រហារពួកជីហាតក្នុងប្រទេសស៊ីរីយ៉ាងទាន់ហន់របៀបនេះ។ តែអ្វីជាការកត់សម្គាល់ ការវាយប្រហារស៊ីរីពេលនេះបានធ្វើឡើង មួយថ្ងៃបន្ទាប់ពីអ្នកនំាពាក្យរបស់ពួកជីហាតបានអំពាវនាវឲ្យមានការសម្លាប់ជនជាតិបារំាង អាមេរិកំាង កាណាដា និងជនជាតិរបស់ប្រទេសសម្ព័ន្ធមិត្តផ្សេងទៀតដែលបានលូកដៃវ៉ៃពួកជីហាត។ ទំាងនេះមិនភ្លេចនិយាយពីការដែលពួកភេរវជនក្នុងប្រទេសអាល់ហ្សេរីទើបចាប់ជនជាតិបារំាងម្នាក់ធ្វើជាថ្នូរ និងដែលពួកភេរវជនគំរាមសម្លាប់ក្នុងរយៈពេល ២៤ម៉ោង បើបារំាងមិនបញ្ឈប់វាយប្រហារពួកជីហាតនៅអ៊ីរ៉ាក់ទេ។
មានតែប្រទេសអារ៉ាប់ដែលបានចូលរួមជាមួយអាមេរិក
ប្រតិបត្តិការវាយប្រហារពួកជីហាតក្នុងប្រទេសស៊ីរីពេលនេះមិនមានការចូលរួមពីប្រទេសលោកខាងលិចទេ ពោលគឺមានតែអាមេរិក និងប្រទេសអារ៉ាប់មួយចំនួន ៥ ក្នុងនោះមាន បារ៉ែន ហ្សកដានី អេមីរ៉ាតអារ៉ាប់រួម កាតា និងប្រទេសអារ៉ាប៊ីសាអូឌីត។ ព័ត៌មាននេះត្រូវបានបញ្ជាក់ដោយអ្នកនំាពាក្យកងទ័ពអាមេរិក ឧត្តមសេនីយគៀប៊ី និងក្រសួងការពារជាតិអាមេរិក។ ការចូលរួមរបស់ប្រទេសអារ៉ាប៊ីសាអូឌីតមិនបានធ្វើឲ្យគេភ្ញាក់ផ្អើលទេ ព្រោះនរណាក៏ដឹងដែរថា រាជាណាចក្រស្តេចប្រេងកាតមួយនេះចង់តែដើរតួនាទីសំខាន់នៅក្នុងតំបន់ ទំាងនៅក្នុងវិស័យការទូត និងយោធា។ ចូរកុំភ្លេចថា អារ៉ាប៊ីសាអូឌីតជាប្រទេសដែលមានថវិកាយោធាប្រចំាឆ្នំារហូតដល់ទៅ ៦០ ០០០លានដុល្លារ ស្ថិតក្រោយប្រទេសរុស្ស៊ី និងមានកម្លំាងទ័ព ២០ម៉ឺននាក់ ព្រមទំាងបំពាក់ដោយគ្រឿងសព្វាវុធទំនើបៗ។
មួយវិញទៀត រដ្ឋាភិបាលទីក្រុងរីយ៉ាដក៏បានរង់ចំាការវាយប្រហារស៊ីរីពីសំណាក់អាមេរិកជាយូរខែហើយ ព្រោះខ្លួនក៏មានបំណងចង់សំពងរដ្ឋាភិបាលស៊ីរីសព្វថ្ងៃដែរ។ គួររម្លឹកជូនថា តំាងពីមានផ្ទុះវិបត្តិក្នុងប្រទេសស៊ីរីមក អារ៉ាប៊ីសាអូឌីតបានចេញមុខគំាទ្រពួកបះបោរដើម្បីប្រឆំាងនឹងរបបស៊ីរីរបស់លោកប្រធានាធិបតីអាសាដ។ ក្រៅពីអាមេរិក នៅមិនទាន់មានប្រទេសលោកខាងលិចណាផ្សេងចូលរួមទេ។
រដ្ឋាភិបាលស៊ីរីបានប្រកាសគំាទ្រចំពោះយុទ្ធនាការវាយប្រហារពួកជីហាតក្នុងទឹកដីខ្លួន
គម្រោងវាយប្រហារស៊ីរីនេះត្រូវបានអាមេរិក និងបារំាងចង់ធ្វើម្តងហើយ តែកាលណោះ គឺសំដៅទម្លាក់របបស៊ីរីរបស់លោកប្រធានាធិបតីស៊ីរីអាសាដ។ តែនៅពេលនោះត្រូវបានផ្អាកទៅវិញ ដោយសារតែមានដំណោះស្រាយស្នើឡើងដោយប្រទេសរុស្ស៊ី។ នៅលើកនេះ ការវាយប្រហារបានសំដៅលើតែពួកជីហាតដែលកំពុងជ្រកកោនក្នុងទឹកដីស៊ីរីប៉ែកខាងជើងជាប់ព្រំដែននឹងប្រទេសអ៊ីរ៉ាក់។ ក្រសួងការបរទេសស៊ីរីទើបបានប្រកាសឲ្យដឹងថ្ងៃនេះថា ខ្លួនត្រូវបានអាមេរិកជូនដំណឹងមុន និងថែមទំាងបានប្រកាសគំាទ្រចំពោះយុទ្ធនាការវាយប្រហារនេះ។ នៅខាងរុស្ស៊ីដែលមិនបានចូលរួមជាមួយកម្លំាងសម្ព័ន្ធមិត្តវាយប្រហារពួកជីហាតត្រូវបានលោកប្រធានាធិបតីពូទីនបញ្ជាក់ថា គេត្រូវតែសុំការអនុញ្ញាតពីរដ្ឋាភិបាលស៊ីរីជាមុនសិន មុននឹងបើកការវាយប្រហារ។ ចូរកុំភ្លេចថា ពួកជីហាតនៅក្នុងប្រទេសស៊ីរីនេះក៏ជាសត្រូវរបស់រដ្ឋាភិបាលស៊ីរីសព្វថ្ងៃដែរ និយាយឲ្យស្រួលយល់ អាមេរិក និងស៊ីរីកំពុងប្រយុទ្ធទល់នឹងសត្រូវរួមដូចគ្នា។
តែអ្វីដែលកំពុងចោទខ្លំាងពេលនេះគឺថា តើរបបស៊ីរីរបស់លោកអាសាដមិនមែនកំពុងធ្លាក់ក្នុងអន្ទាក់របស់អាមេរិកទេ ឬយ៉ាងណា ព្រោះចង់ ឬមិនចង់ ការវាយប្រហារពួកជីហាតពេលនេះអាចជាលេសមួយដើម្បីបន្តវាយប្រហារលើរដ្ឋាភិបាលស៊ីរីទៀតក៏ថាបាន និងដែលនេះ ក៏ជាការចង់បានរបស់ក្រុមបះបោរស៊ីរីសព្វថ្ងៃដែរ។ តែគេក៏អាចនិយាយផ្ទុយទៅវិញថា ការប្រយុទ្ធទល់នឹងសត្រូវរួមដូចគ្នានេះអាចធ្វើឲ្យអាមេរិកបង្ខំចិត្តចាប់ដៃជាមួយលោកអាសាដ ព្រោះនៅពេលនេះ ស៊ីរីកំពុងក្លាយជាតួអង្គមួយមិនអាចខ្វះបានដើម្បីប្រឈមទប់នឹងការគំរាមកំហែងរបស់ពួកជីហាត។ ដូច្នេះវាជាឱកាសល្អសម្រាប់លោកអាសាដដើម្បីទាមទារឲ្យសហគមន៍អន្តរជាតិបញ្ឈប់ការប្រឆំាងខ្លួន និងធានាថា ក្រោយពីបានវាយប្រហារលើពួកជីហាតក្នុងទឹកដីស៊ីរីរួចហើយ ស៊ីរីនឹងមិនក្លាយជាផ្ទំាងស៊ីបបន្ទាប់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ