ហេតុអ្វីបានជាអាមេរិកដាក់បញ្ចូលកូរ៉េខាងជើងទៅក្នុងបញ្ជីខ្មៅជាថ្មីជា « រដ្ឋគាំទ្រភេរវនិយម »?
ចុះផ្សាយនៅថ្ងៃ៖
ស្តាប់ - ០៦:៥៥
នៅថ្ងៃចន្ទ ទី២០ វិច្ឆិកា លោកប្រធានាធិបតីអាមេរិកដូណាល់ ត្រាំបានដាក់បញ្ចូលកូរ៉េខាងជើងទៅក្នុងបញ្ជីខ្មៅជាថ្មីជា « រដ្ឋគាំទ្រភេរវនិយម »។ ប្រតិកម្មក្នុងថ្ងៃអង្គារ ទី២១ វិច្ឆិកានេះ ប្រទេសជប៉ុន និងកូរ៉េខាងត្បូងដែលជាសម្ព័ន្ធមិត្តរបស់អាមេរិកបានគាំទ្រ និងទះដៃសាទរការសម្រេចចិត្តរបស់អាមេរិក តែចិនដែលជាសម្ព័ន្ធមិត្តរបស់កូរ៉េខាងជើងបានបញ្ចេញប្រតិកម្មដោយអំពាវនាវឲ្យភាគីពាក់ព័ន្ធបន្តកិច្ចចរចាដោយសន្តិវិធីដើម្បីដោះស្រាយបញ្ហា។ គួររម្លឹកជូនថា កូរ៉េខាងជើងធ្លាប់បានជាប់ក្នុងបញ្ជីខ្មៅអាមេរិកពីឆ្នាំ ១៩៨៨ ដល់ឆ្នាំ ២០០៨ ជាមួយប្រទេសអ៊ីរ៉ង់ ស៊ីរី និងប្រទេសស៊ូដង់។
មានហេតុផលសំខាន់ចំនួនពីរដែលលោកដូណាល់ ត្រាំបានសម្រេចចិត្តដាក់បញ្ចូលកូរ៉េខាងជើងទៅក្នុងបញ្ជីខ្មៅជាថ្មីជា « រដ្ឋគាំទ្រភេរវនិយម » ទី១ កូរ៉េខាងជើងបាន និងកំពុងបន្តគំរាមកំហែងពិភពលោកដោយប្រើអាវុធនុយក្លេអ៊ែរ និងគ្រាប់មីស៊ីល និងទី២ កូរ៉េខាងជើងបាន និងកំពុងបន្តគាំទ្រទង្វើភេរវនិយមអន្តរជាតិ។ នៅក្នុងចំណុចទី២ នេះ លោកត្រាំបានលើកឡើងពីឃាតកម្មឆ្លងដែនតាមប្រម៉ាញ់ក្រុមប្រឆាំងនៅលើទឹកដីបរទេសដោយភ្នាក់ងារសម្ងាត់កូរ៉េខាងជើង និងមានការរៀបចំ បញ្ជាផ្ទាល់ពីមនុស្សខ្លាំងក្រុងព្យុងយ៉ាងលោកគីម ជុងអ៊ុន។ ឧទាហរណ៍ជាក់ស្តែង ឃាតកម្មសម្លាប់បងប្រុសម្តាយទីទៃខ្លួនឯងលោកគីម ជុងណាមនៅព្រលានយន្តហោះប្រទេសម៉ាឡេស៊ីកាលពីខែកុម្ភៈ និងករណីនិស្សិតអាមេរិកាំងម្នាក់ឈ្មោះ Otto Warmbier ដែលបានជាប់ឃុំក្នុងទឹកដីកូរ៉េខាងជើង ហើយបានស្លាប់ក្នុងខែមិថុនានាពេលមកដល់ទឹកដីអាមេរិកាំងដោយសន្លប់មិនដឹងខ្លួន។ តែសម្រាប់រដ្ឋបាលអាមេរិក គឺកូរ៉េខាងជើងជាអ្នកសម្លាប់និស្សិត Otto Warmbier។
សូមជម្រាបជូនថា ការសម្រេចចិត្តរបស់លោកដូណាល់ ត្រាំក្នុងការដាក់បញ្ចូលកូរ៉េខាងជើងទៅក្នុងបញ្ជីខ្មៅជាថ្មីពេលនេះបានធ្វើឡើង បន្ទាប់ពីលោកត្រាំបានត្រឡប់ពីការចូលរួមនៅក្នុងជំនួបកំពូល APEC ក្នុងប្រទេសវៀតណាម និងជំនួបកំពូលអាស៊ានក្នុងប្រទេសហ្វីលីពីន។ នាឱកាសនោះ លោកត្រាំបានសន្យាបង្កើនគំនាបលើកូរ៉េខាងជើងកាន់តែខ្លាំងដើម្បីឲ្យប្រទេសឯកោមួយនេះកាន់តែឯកោថែមទៀតនៅលើឆាកអន្តរជាតិ។ គោលដៅរបស់លោកត្រាំ គឺបង្ខំរបបក្រុងព្យុងយ៉ាងឲ្យបោះបង់ចោលកម្មវិធីនុយក្លេអ៊ែរ និងគ្រាប់មីស៊ីល រួចវិលត្រឡប់ទៅកាន់តុចរចាឡើងវិញ។ សម្រាប់លោកប្រមុខការទូតអាមេរិក Rex Tillerson ការបន្ថែមគំនាបលើកូរ៉េខាងជើងពេលនេះជាជម្រើសមួយដើម្បីដាស់តឿនក្រុងព្យុងយ៉ាងឲ្យយល់ថា ការបដិសេធមិនចូលតុចរចានឹងរឹតតែធ្វើឲ្យស្ថានការណ៍ធ្លាក់ដុនដាបកាន់តែខ្លាំង។
អាមេរិកគ្រោងពង្រឹងទណ្ឌកម្ម និងបន្ថែមទណ្ឌកម្មថ្មី
គំនាបលើកូរ៉េខាងជើងពីអាមេរិកមិនមែនកម្រិតត្រឹមការដាក់បញ្ចូលកូរ៉េខាងជើងទៅក្នុងបញ្ជីខ្មៅជារដ្ឋគាំទ្រភេរវនិយមប៉ុណ្ណោះទេ តែគ្រោងនឹងចាត់វិធានការពង្រឹងទណ្ឌកម្មដែលមានស្រាប់ និងដាក់ទណ្ឌកម្មថ្មីៗទៀតលើរបបក្រុងព្យុងយ៉ាង។ រដ្ឋបាលអាមេរិកប្រើយន្តការមួយនេះដើម្បីដាក់ទណ្ឌកម្មលើក្រុមមនុស្ស និងក្រុមប្រទេសដែលកំពុងបន្តរកស៊ីជាមួយកូរ៉េខាងជើង។ លោកប្រមុខការទូតអាមេរិក Rex Tillerson បានគូសបញ្ជាក់ថា ទណ្ឌកម្មថ្មីដែលអាមេរិកត្រូវពង្រឹងបន្ថែម និងដាក់ថ្មីលើរបបក្រុងព្យុងយ៉ាងត្រូវប្រកាសដោយក្រសួងសេដ្ឋកិច្ចអាមេរិកនៅថ្ងៃអង្គារ ទី២១ វិច្ឆិកានេះ ពិសេសប្រឆាំងនឹងធនាគារចិនមួយ។
គួររម្លឹកជូនថា កូរ៉េខាងជើងបានទទួលទណ្ឌកម្មច្រើនរាប់មិនអស់ មានទាំងទណ្ឌកម្មជាលក្ខណៈអន្តរជាតិតាមរយៈសេចក្តីសម្រេចចិត្តរបស់ក្រុមប្រឹក្សាសន្តិសុខ និងទណ្ឌកម្មជាលក្ខណៈឯកតោភាគីពីប្រទេសមួយចំនួនលើលោក ពិសេសពីអាមេរិកតែម្តង។ អាមេរិកសង្ឃឹមថា ការដាក់បញ្ចូលកូរ៉េខាងជើងជាថ្មីទៅក្នុងបញ្ជីខ្មៅជារដ្ឋគាំទ្រភេរវនិយមពេលនេះអាចនឹងជំរុញសហគមន៍អន្តរជាតិ ក៏ដូចជាប្រទេសមួយចំនួនឲ្យដាក់គំនាបកាន់តែខ្លាំងថែមទៀតលើកូរ៉េខាងជើងដើម្បីធ្វើរបបឯកោមួយនេះកាន់តែឯកោ និងទទួលយកកិច្ចចរចាជាថ្មីនៅថ្ងៃណាមួយ។
សូមរម្លឹកជូនថា អាមេរិកធ្លាប់បានដាក់កូរ៉េខាងជើងទៅក្នុងបញ្ជីខ្មៅជារដ្ឋគាំទ្រភេរវនិយមពីឆ្នាំ ១៩៨៨ ដល់ឆ្នាំ ២០០៨ ជាមួយប្រទេសអ៊ីរ៉ង់ ស៊ីរី និងសូដង់។ កាលណោះ អាមេរិកបានចោទកូរ៉េខាងជើងពីបទវាយប្រហារភេរវកម្មប្រឆាំងយន្តហោះកូរ៉េខាងត្បូងមួយគ្រឿងដែលបណ្តាលឲ្យស្លាប់មនុស្ស ១១៥នាក់ក្នុងឆ្នាំ ១៩៨៧។ តែអាមេរិកក្រោមលោកប្រធានាធិបតី George W. Bush បានសម្រេចដកកូរ៉េខាងជើងចេញពីបញ្ជីខ្មៅក្នុងឆ្នាំ ២០០៨ វិញក្នុងគោលដៅជួយផ្តល់សន្ទុះកិច្ចចរចាសន្តិភាពនៅក្នុងឧបទ្វីបកូរ៉េឡើងវិញ។
ជប៉ុន និងកូរ៉េខាងត្បូងគាំទ្រចំណាត់ការរបស់លោកត្រាំ តែចិនស្នើឲ្យបន្តកិច្ចចរចា
ខណៈនេះ កូរ៉េខាងជើងនៅមិនទាន់បានឆ្លើយតបយ៉ាងណាចំពោះចំណាត់ការរបស់លោកដូណាល់ ត្រាំទេ តែមានប្រតិកម្មពីចិន ជប៉ុន និងកូរ៉េខាងត្បូង។ ក្រុងតូក្យូ និងក្រុងសេអ៊ូលបានប្រតិកម្មគាំទ្រលើការសម្រេចចិត្តរបស់លោកដូណាល់ ត្រាំ។ ខុសពីក្រុងតូក្យូ ប្រតិកម្មរបស់ក្រុងសេអ៊ូលហាក់មានការថ្លឹងថ្លែងជាងប្រតិកម្មរបស់ក្រុងតូក្យូ។ កូរ៉េខាងត្បូងបានចាត់ទុកការសម្រេចចិត្តរបស់លោកត្រាំថាបានធ្វើឡើងនៅក្នុងក្របខ័ណ្ឌនៃកិច្ចខិតខំប្រឹងប្រែងនំាកូរ៉េខាងជើងទៅកាន់ផ្លូវគ្មានអាវុធនុយក្លេអ៊ែរនៅក្នុងឧបទ្វីបកូរ៉េ។
សម្រាប់ចិនវិញ ក្រុងប៉េកាំងមិនបានយល់ឃើញដូច្នេះទេ និងបានអំពាវនាវគ្រប់ភាគីពាក់ព័ន្ធឲ្យបន្តចាត់វិធានការគ្រប់បែបយ៉ាងដែលនាំទៅរកកិច្ចចរចាដោយសន្តិវិធី។ អ្នកនាំពាក្យក្រសួងការបរទេសចិនលោក Lu Kang បានអំពាវនាវត្រង់ទៅភាគីអាមេរិកឲ្យប្រកាន់យកជំហរសន្តិនិយមដើម្បីដោះស្រាយបញ្ហា។ គេត្រូវរង់ចាំមើលថា តើចំណាត់ការថ្មីរបស់អាមេរិកពេលនេះអាចកាច់ធ្មុងកូរ៉េខាងជើងបានឬអត់?។ តែប្រហែលជាពិបាកបន្តិច បើផ្អែកលើបទពិសោធន៍កន្លងមក នេះជាការយល់ឃើញរបស់ក្រុមអ្នកជំនាញ និងក្រុមអ្នកវិភាគ។ ពួកគេយល់ថា គ្មានផ្លូវដែលកូរ៉េខាងជើងបោះបង់ចោលកម្មវិធីអាវុធនុយក្លេអ៊ែរ និងគ្រាប់មីស៊ីលដែលជាអាយុជីវិត និងការស្លាប់រស់របស់របបកុម្មុយនិស្តឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ