ទូរទស្សន៍BBC បញ្ឈប់ការផ្សាយនៅភូមា ក្នុងផ្ទៃនៃវិបត្តិរ៉ូហ៊ីងយ៉ា
ទូរទស្សន៍BBCជាភាសាភូមា នឹងលែងធ្វើការផ្សាយក្នុងកញ្ចក់ទូរទស្សន៍ជាតិភូមា MNTVទៀតហើយ ព្រោះតែមានគំនាប និងបម្រាបហាមឃាត់ច្រើនពេកពីរដ្ឋាភិបាល។ បើតាមការបរិហាររបស់BBC នៅថ្ងៃចន្ទនេះ រាល់គ្រប់ប្រធានបទដែលទាក់ទងនឹងសហគមន៍ជនជាតិភាគតិចរ៉ូហ៊ីងយ៉ា ត្រូវហាមឃាត់ស្ទើរទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
BBC ជាភាសាភូមា បានបង្កើតការិយាល័យរបស់ខ្លួននៅទីក្រុងរ៉ង់ហ្គូន តាំងពីខែមេសា២០១៤មក និងផលិតកម្មវិធីព័ត៌មានប្រចាំថ្ងៃ ផ្សាយតាមទូរទស្សន៍MNTV ដោយមានអ្នកតាមដានមើលប្រមាណជាង៣,៧លាននាក់ជាប្រចាំ។
ប៉ុន្តែនៅថ្ងៃចន្ទនេះ BBC បានធ្វើសេចក្តីប្រកាសបញ្ឈប់កិច្ចសហប្រតិបត្តិការជាមួយទូរទស្សន៍ជាតិភូមា ដោយហេតុតែស្ថាប័នទូរទស្សន៍នេះបានបដិសេធមិនព្រមចាក់ផ្សាយកម្មវិធីជាច្រើនរបស់ក្រុមការងារBBC តាំងពីខែមីនាមក។ ទង្វើបែបនេះគឺជាការជ្រៀតជ្រែក និងជាត្រួតត្រាហាមឃាត់ដែលBBC មិនអាចទទួលយកបាន ព្រោះវានឹងធ្វើឱ្យទូរទស្សនិកជនបាត់បង់ទំនុកចិត្ត។ នេះបើតាមសេចក្តីថ្លែងការណ៍របស់BBC។
អ្នកទទួលខុសត្រូវជាន់ខ្ពស់ទូរទស្សន៍ជាតិភូមា ដែលសុំមិនបញ្ចេញឈ្មោះបានបញ្ជាក់ថា ជម្លោះជាមួយក្រុមBBC បណ្តាលមកពីការពាក្យ “រ៉ូហ៊ីងយ៉ា” ដែលមិនស៊ីចង្វាក់នឹងនយោបាយរបស់ទូរទស្សន៍។
ពលរដ្ឋភូមាអាចបន្តមើលកម្មវិធីព័ត៌មានរបស់BBC ជាភាសាភូមាបានតាមរយៈវិបសៃត៍របស់ក្រុមហ៊ុនទូរទស្សន៍អង់គ្លេស។ វិបសៃត៍ដែលធ្លាប់ជាប្រភពផ្តល់ព័ត៌មានសម្រាប់លោកស្រីអ៊ុងសានស៊ូជី កាលនៅជាប់ឃុំឃាំងក្នុងគេហដ្ឋាន។
លោកស្រីអ៊ុងសានស៊ូជី ជ័យលាភីរង្វាន់ណូបែលសន្តិភាព ដែលកំពុងដឹកនាំរដ្ឋាភិបាលភូមាស៊ីវិលតាំងពីឆ្នាំ២០១៦មក មិនដែលប្រើពាក្យ “រ៉ូហ៊ីងយ៉ា”ទេ (ភូមាហៅ ពួកគេជាជនបង់ក្លាដែស)។ លោកស្រីបានរងការរិះគន់យ៉ាងខ្លាំងពីអន្តរជាតិក្នុងចំណាត់ការសំណុំរឿងជនជាតិភាគតិចរ៉ូហ៊ីងយ៉ានេះ។
រ៉ូហ៊ីងយ៉ា ជនជាតិភាគតិចកាន់សាសនាអ៊ីស្លាម ប្រមាណជាងមួយលាននាក់រស់នៅរាប់ជំនាន់ក្នុងទឹកដីភូមា ប៉ុន្តែគ្មានសិទ្ធិ គ្មានសេរីភាព គ្មានប្រទេសគ្មានសញ្ជាតិ និងរងការធ្វើទុកបុកម្នេញឥតល្ហែ។ តាំងតែពីជាច្រើនថ្ងៃចុងក្រោយនេះ អំពើហិង្សាមរណៈបានផ្ទុះឡើងជាថ្មី ជនរ៉ូហ៊ីងយ៉ាងជិត៩ម៉ឺននាក់បានរត់ភៀសខ្លួនទៅបង់ក្លាដែស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ