អាស៊ី

របាយការណ៍ UN ស្តីពីឧក្រិដ្ឋកម្មសង្គ្រាមនៅស្រីលង្កា ពន្យាពេលប្រកាសរហូតដល់ខែកញ្ញា

របាយការណ៍ចោទប្រកាន់ប្រទេសស្រីលង្កា ស្តីពីឧក្រិដ្ឋកម្មសង្គ្រាម ដែលគេរង់ចាំអស់រយៈពេលជាយូរមកហើយនោះ ត្រូវបានពន្យាពេលប្រកាសរហូតដល់ខែកញ្ញា ឆ្នាំ២០១៥ ខាងមុខនេះ។ នេះបើតាមអង្គការសហប្រជាតិបាននិយាយនៅថ្ងៃអង្គារនេះ។

ចុះផ្សាយនៅថ្ងៃ៖ 17/02/2015 - 07:24កែប្រែថ្ងៃទី៖ 17/02/2015 - 12:22

ផ្សាយពាណិជ្ជកម្ម

រដ្ឋាភិបាលស្រីលង្កាថ្មីបានស្វាគមន៍ចំពោះការពន្យាពេលប្រកាសរបាយការណ៍ស្តីពីឧក្រិដ្ឋកម្មសង្គ្រាមនៅក្នុងប្រទេសរបស់ខ្លួន។ ហើយថាវានឹងបង្កលក្ខណៈងាយស្រួលក្នុងកិច្ចសហប្រតិបត្តិការណ៍ជាមួយគ្នាទៅលើបញ្ហាសិទ្ធិមនុស្សនៅស្រីលង្កា។

កងយោធាស្រីលង្កាបានយកឈ្នះទៅលើក្រុមឧទ្ទាមបំបែកខ្លួនខ្លាតាមិល កាលពីខែឧសភា ឆ្នាំ ២០០៩ បន្ទាប់ពីមានសង្គ្រាមស៊ីវិលអស់រយៈពេល២៦ ឆ្នាំ។ ហើយភាគីទាំងពីរត្រូវបានចោទប្រកាន់ពីបទប្រពឹត្តិឧក្រិដ្ឋកម្មសង្គ្រាម។

ក្រុមប្រឹក្សាសិទ្ធិមនុស្សរបស់អង្គការសហប្រជាជាតិបានថ្លែងប្រាប់ក្រុមអ្នកកាសែតថា កាលពីឆ្នាំមុន ថាខ្លួននឹងធ្វើការស៊ើបអង្កេតពីភស្តុតាងនៃឧក្រិដ្ឋកម្មសង្គ្រាម ប៉ុន្តែលោកប្រធានាធិបតី Mahinda Rajapaksa ដែលបានចាញ់នៅក្នុងការបោះឆ្នោតកាលពីខែមករាកន្លងទៅនេះ បានបដិសេដមិនសហការនៅក្នុងការស៊ើបអង្កេតនេះ។

រដ្ឋាភិបាលថ្មីរបស់លោកប្រធានាធិបតី Maithripala Sirisena បានសុំពេលបន្ថែមដើម្បីត្រៀបរៀបចំខ្លួន មុននឹងរបាយការណ៍ឧក្រិដ្ឋកម្មសង្គ្រាមត្រូវបានប្រកាស។ តាមគម្រោងរបាយការណ៍នេះ នឹងត្រូវប្រកាសនៅខែក្រោយនេះ ប៉ុន្តែត្រូវបានពន្យាពេលទៅខែកញ្ញាវិញ។
រដ្ឋាភិបាលស្រីលង្កាបាននិយាយថាខ្លួនត្រូវការពេលបន្ថែមដើម្បីបង្កើតតុលាការស៊ើបអង្កេតមួយដោយខ្លួនឯង មុននឹងរបាយការណ៍ត្រូវបានចេញផ្សាយ។

រដ្ឋមន្ត្រីការបរទេសស្រីលង្កាបាននិយាយថា ការពន្យាពេលនេះ នឹងផ្តល់ពេលវេលាបន្ថែមដើម្បីធ្វើការស៊ើបអង្កេតនៅក្នុងស្រុក។ ជាមួយគ្នានេះ បេសកជនជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស Al Hussein បានស្វាគមន៍ចំពោះការពន្យាពេលនេះ ហើយនិយាយថា ការពន្យាពេលនេះ នឹងអាចអនុញ្ញាតិឲ្យមានការបញ្ចូលព័ត៌មានសំខាន់ៗបន្ថែមទៀត ទៅក្នុងរបាយការណ៍ឧក្រិដ្ឋកម្មសង្គ្រាម។

សូមបញ្ជាក់ថានៅថ្ងៃចន្ទម្សិលមិញ លោកប្រធានាធិបតីស្រីលង្កា ទើបតែបានបំពេញទស្សនៈកិច្ចជាផ្លូវការទៅកាន់ប្រទេសឥណ្ឌា។ នៅទីនោះលោកប្រធានាធិបតីបានពិភាក្សាពីបញ្ហាទំនាក់ទំនងអន្តរជាតិ និងបញ្ហាព្រំដែនជាមួយនិងលោកនាយករដ្ឋមន្ត្រីឥណ្ឌា ណារ៉េនត្រា មូឌី។