សម្តេចប៉ាបជំរុញឲ្យមានការគោរពសិទ្ធិមនុស្សនៅស្រីលង្កា
សម្តេចប៉ាប ហ្វ្រង់ស័រ បានជំរុញឲ្យមានការគោរពសិទ្ធិមនុស្ស នៅក្នុងប្រទេសស្រីលង្កា ហើយបានអំពាវនាវឲ្យស្វែងរកការពិត បន្ទាប់ពីមានសង្គ្រាមស៊ីវិលយ៉ាងយូរមក នៅខណៈដែលព្រះអង្គបានទៅដល់ប្រទេសដែនកោះមួយនេះ នៅថ្ងៃអង្គារ ទី ១៣មករានេះ។ នេះគឺជាលើកទីមួយហើយ ដែលប្រមុខដឹកនាំសាសនាកាតូលិករូបនេះ ធ្វើដំណើរទស្សនកិច្ចនៅក្នុងប្រទេសស្រីលង្កា ក្នុងរយៈពេល ២ទសវត្សរ៍មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
សម្តេចប៉ាប ហ្វ្រង់ស័រ ដែលបានធ្វើដំណើរទស្សនកិច្ចនៅក្នុងប្រទេសស្រីលង្កា បានមានបន្ទូលថា ដំណើរការនៃការផ្សះផ្សារក៏ត្រូវការការស្វែងរកការពិតដែរ។ គោលបំណងរបស់ព្រះអង្គនៅពេលនេះ គឺដើម្បីបង្រួបបង្រួមប្រទេសនេះជាថ្មី បន្ទាប់ពីមានជម្លោះអស់រយៈពេល ៣៧ឆ្នាំ រវាងក្រុមបំបែកខ្លួនខ្លាតាមិល និងកងទ័ពរដ្ឋាភិបាល។
ព្រះអង្គមានព្រះបន្ទូលថា រាល់សមាជិកនៅក្នុងសង្គមត្រូវតែធ្វើការរូមគ្នា ហើយគ្រប់គ្នាគឺមានសម្លេង។ គ្រប់គ្នាត្រូវតែមានសិទ្ធិសេរីភាពក្នុងការបង្ហាញពីក្តីព្រួយបារម្ភ តម្រូវការ បំណងប្រាថ្នា និងភាពភ័យខ្លាចរបស់ពួកគេ។ ព្រះអង្គបន្តថា ការងារនៃការកសាងឡើងវិញបន្ទាប់ពីជម្លោះនោះគឺ ត្រូវតែរួមបញ្ជូលទាំងការគោរពសិទ្ធិមនុស្សផងដែរ។
នៅក្នុងដំណើរទស្សនកិច្ចនេះ សម្តេចប៉ាប ហ្វ្រង់ស័រ នឹងជួបជាមួយនិងប្រធានាធិបតីស្រីលង្កាថ្មី គឺលោក Maithripala Sirisena មុនទៅជួបជាមួយនិងមេដឹកនាំសាសនាព្រះពុទ្ធ សាសនាហិណ្ឌូ និងសាសនាមូស្លីមនៅក្នុងទីក្រុងកូឡុំបូ។
លោកប្រធានាធិបតីថ្មី Sirisena បានសន្យាថា និងការពារសេរីភាពសាសនា និងបង្កើតឲ្យមានវប្បធម៌សន្តោសប្រណីថ្មីនៅលើដែនកោះ ដែលមានជម្លោះជាមួយនិងជនជាតិភាគតិចខ្លាតាមិលអស់រយៈពេល ៣៧ឆ្នាំមកហើយនេះ។
អ្នកកាន់សាសនាកាតូលិកនៅក្នុងប្រទេសស្រីលង្កាមានចំនួនតែ ៦ភាគរយតែប៉ុណ្ណោះ ក្នុងចំណោមប្រជាជន ២០លាននាក់។ ប៉ុន្តែនៅប៉ុន្មានឆ្នាំថ្មីៗនេះ គេសង្កេតឃើញថា ប្រជាជនអ្នកកាន់សាសនាព្រះពុទ្ធបានបង្កឲ្យមានអំពើហិង្សាសាសនានៅក្នុងប្រទេសនេះ។ ជាមួយគ្នានេះដែរ ព្រះអង្គក៏នឹងផ្តោតសំខាន់ទៅលើតួនាទីរបស់គ្រឹស្តសាសនា ក្នុងការ ផ្សះផ្សារសង្គមពីរផ្សេងគ្នានេះដែរ។
គួរជម្រាបជូនថា ដំណើរទស្សនកិច្ចនេះ ត្រូវបានធ្វើឡើងតែប៉ុន្មានថ្ងៃ បន្ទាប់ពីការបោះឆ្នោតជ្រើសរើសប្រធានាធិបតីនៅស្រីលង្កាបានបញ្ចប់។ បន្ទាប់ពីប្រទេសស្រីលង្កា សម្តេចប៉ាប ក៏នឹងយាងទៅកាន់ប្រទេសហ្វីលីពីនជាបន្ត។ ហ្វីលីពីនជាកន្លែងមួយដែលពោរពេញទៅដោយអ្នកកាន់សាសនាគ្រឹស្ត ហើយក៏ជាកន្លែងមួយដែលមានការប្រមូលផ្តុំដ៏ធំ ដើម្បីទទួលប្រមុខដឹកនាំសាសនាកាតូលិកសម្តេចប៉ាប ហ្វ្រង់ស័រ ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ