ធនាគារពិភពលោកថាកំណើនសេដ្ឋកិច្ចចិននឹងបន្តធ្លាក់ចុះ
កំណើនសេដ្ឋកិច្ចនៃប្រទេសចិននឹងបន្តធ្លាក់ចុះនៅឆ្នាំ២០១២នេះ ដោយហេតុតែផលវិបាកអវិជ្ជមាននៃវិបត្តិសេដ្ឋកិច្ចនៅអឺរ៉ុបជាពិសេស។ នេះជាការបញ្ជាក់អះអាងនៅថ្ងៃពុធទី២៣ឧសភានេះរបស់ធនាគារពិភពលោកដែលបានអំពាវនាវឱ្យចិនព្រមទាំងបណ្តាប្រទេសអាស៊ីដទៃផ្សេងពង្រឹងទីផ្សារផ្ទៃក្នុងរបស់ពួកគេរៀងៗខ្លួន ដើម្បីជួយទ្រទ្រង់កំណើនសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
តើរាត្រីទឹកឃ្មុំរវាងប្រទេសចិននិងអត្រាកំណើនសេដ្ឋកិច្ចខ្លាំងក្លា ប្រហែលជាជិតចប់ហើយឬ? យ៉ាងណាក៏ដោយ តាមរយៈរបាយការណ៍ប្រចាំត្រីមាសរបស់ខ្លួនដែលចេញផ្សាយនៅថ្ងៃនេះ ធនាគារពិភពលោកអះអាងថា អត្រាកំណើនសេដ្ឋកិច្ចនៃមហាយក្សចិននឹងបន្តធ្លាក់ចុះតទៅទៀត ធ្លាក់ចុះមកនៅត្រឹម៨,២%នៅឆ្នាំ២០១២នេះ ទល់នឹង៩,២%នៅឆ្នាំ២០១១ និង១០,៤%នៅឆ្នាំ២០១០។
មូលហេតុធំ បើយោងទៅតាមធនាគារពិភពលោក គឺមកពីចិនដែលជាមហាអំណាចសេដ្ឋកិច្ចពិភពលោកទី២ កំពុងបន្តទទួលរងការធ្លាក់ចុះនៃការបញ្ជាទិញពីអឺរ៉ុប និងពីសហរដ្ឋអាមេរិក។ ម្ល៉ោះហើយបានជាធនាគារពិភពលោកអំពាវនាវឱ្យចិនបង្កើនប្រាក់ចំណាយ ក្នុងគោលដៅពង្រីកនិងពង្រឹងទីផ្សារផ្ទៃក្នុង។
នៅក្នុងរបាយការណ៍របស់ខ្លួន ធនាគារពិភពលោកក៏ទាញសញ្ញាអាសន្នព្រមានប្រាប់ជាមុនថា ការធ្លាក់ចុះនៃកំណើនសេដ្ឋកិច្ចចិននឹងជះចំហាយអវិជ្ជមានទៅលើសេដ្ឋកិច្ចនៃបណ្តាប្រទេសអាស៊ីដទៃ។ ស្ថាប័នហិរញ្ញវត្ថុពិភពលោកមួយនេះព្យាករថា អត្រាកំណើនសេដ្ឋកិច្ចនៃតំបន់អាស៊ីប៉ាស៊ីហ្វិកនឹងអាចធ្លាក់មកនៅត្រឹមតែ៧,៦% ប៉ុណ្ណោះក្នុងឆ្នាំ២០១២នេះ ទល់នឹង៨,២%នៅឆ្នាំទៅមិញ២០១១។ ដូចគ្នាអ៊ីចឹងដែរ ធនាគារពិភពលោកអំពាវនាវឱ្យបណ្តាប្រទេសអាស៊ីប៉ាស៊ីហ្វិកគាំទ្រទីផ្សារផ្ទៃក្នុងរបស់ពួកគេរៀងៗខ្លួន តាមរយៈការបង្កើនវិនិយោគសាធារណៈ ជាអាទិ៍នៅក្នុងវិស័យហេដ្ឋារចនាសម្ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ