ធនាគារពិភពលោកកាត់បន្ថយអត្រាកំណើនសេដ្ឋកិច្ចចិននិងអាស៊ីបូព៌ាក្នុងការព្យាករណ៍ឆ្នាំ២០១៤ និង២០១៥
នៅថ្ងៃចន្ទនេះ ធនាគារពិភពលោកបានចេញផ្សាយនូវរបាយការណ៍ថ្មីមួយ ស្តីពីការព្យាករណ៍កំណើនសេដ្ឋកិច្ច ដោយបានកាត់បន្ថយអត្រាកំណើនសេដ្ឋកិច្ចរបស់ប្រទេសចិន និងតំបន់អាស៊ីបូព៌ា សម្រាប់ឆ្នាំ២០១៤ និងឆ្នាំ២០១៥ ក្នុងនោះចំណាប់អារម្មណ៍ត្រូវបានគេផ្តោតខ្លាំងជាងគេ ទៅលើការថយចុះនៃអត្រាកំណើនសេដ្ឋកិច្ចចិន។
ចុះផ្សាយនៅថ្ងៃ៖
ស្តាប់ - ០២:០៥
យោងតាមការព្យាករណ៍ថ្មីរបស់ធនាគារពិភពលោក អត្រាកំណើនសេដ្ឋកិច្ចមធ្យមនៅតំបន់អាស៊ីបូព៌ា និងប៉ាស៊ីហ្វិក នៅឆ្នាំ២០១៤ និង២០១៥ខាងមុខនេះ មានត្រឹមតែ ៦,៩% ប៉ុណ្ណោះ ពោលគឺ ទាបជាងអត្រា ៧,១% ដែលគេបានព្យាករ កាលពីខែមេសាកន្លងទៅ។
ព្យាករណ៍កំណើនសេដ្ឋកិច្ចចិន ដែលជាមហាអំណាចសេដ្ឋកិច្ចអាស៊ី និងជាមហាអំណាចសេដ្ឋកិច្ចពិភពលោកលំដាប់ទី២ ក៏មានការថយចុះផងដែរធៀបនឹងការព្យាករណ៍ពីមុន គឺ អត្រាកំណើនឆ្នាំ២០១៤ ថយចុះពី ៧,៦% មកនៅត្រឹម ៧,៤% ហើយអត្រាកំណើនឆ្នាំ២០១៥ ថយចុះ ពី ៧,៥% មកនៅត្រឹម ៧,២%។ គួររំឭកឡើងវិញថា អត្រាកំណើនសេដ្ឋកិច្ចចិន កាលពីឆ្នាំ២០១៣កន្លងទៅ មានដល់ទៅ ៧,៧%។
ជាទូទៅ ការថយចុះនៃកំណើនសេដ្ឋកិច្ចចិនតែងតែធ្វើឲ្យគេបារម្ភអំពីផលប៉ះពាល់ទៅដល់សេដ្ឋកិច្ចក្នុងតំបន់ ដោយសារតែតម្រូវការទីផ្សារចិនមានការថយចុះ។ ក៏ប៉ុន្តែ អ្នកជំនាញសេដ្ឋកិច្ចអាស៊ីរបស់ធនាគារពិភពលោកបានអះអាងថា ការធ្លាក់ចុះនៃអត្រាកំណើនសេដ្ឋកិច្ចចិន នៅឆ្នាំ២០១៤ និងឆ្នាំ២០១៥នេះ នឹងមិនបង្កផលប៉ះពាល់ធ្ងន់ធ្ងរចំពោះសេដ្ឋកិច្ចអាស៊ីនោះទេ ដោយសារតែការធ្លាក់ចុះនៃកំណើនសេដ្ឋកិច្ចចិនមិនមែនកើតឡើងដោយគំហុក។ ម្យ៉ាងទៀត គេរំពឹងថា ថ្វីដ្បិតតែតម្រូវការទីផ្សារចិនត្រូវថយចុះ ក៏ប៉ុន្តែ ការវិនិយោគចិនវិញអាចនឹងកើនឡើងទៅវិញ នៅក្នុងប្រទេសមួយចំនួន នៅអាស៊ី។
ធនាគារពិភពលោកក៏បានកាត់បន្ថយការព្យាករអត្រាកំណើនសេដ្ឋកិច្ច សម្រាប់តំបន់អាស៊ានផងដែរ សម្រាប់ឆ្នាំ២០១៤ ក៏ប៉ុន្តែ ខុសពីតំបន់អាស៊ីបូព៌ា អត្រាកំណើនសេដ្ឋកិច្ចអាស៊ាននឹងចាប់ផ្តើមមានសន្ទុះឡើងវិញ នៅឆ្នាំ២០១៥ខាងមុខ។
យោងតាមការព្យាករណ៍ សេដ្ឋកិច្ចរបស់មហាអំណាចសេដ្ឋកិច្ចធំៗទាំង ៥ របស់អាស៊ាន គឺឥណ្ឌូណេស៊ី ម៉ាឡេស៊ី ហ្វីលីពីន ថៃ និងវៀតណាម នឹងមានអត្រាកំណើនមធ្យម ៤,៥% នៅឆ្នាំ២០១៤ តិចជាងអត្រាកំណើន ៥% កាលពីឆ្នាំ២០១៣កន្លងទៅ។ ក៏ប៉ុន្តែ អត្រាកំណើននេះនឹងកើនឡើងមកដល់ ៥% វិញ នៅឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ