ធនាគារពិភពលោកផ្តល់ជំនួយដល់ភូមាជាលើកដំបូងក្នុងរយៈពេល២៥ឆ្នាំ
នៅថ្ងៃសុក្រនេះ ធនាគារពិភពលោកបានសម្រេចផ្តល់ជំនួយជាទឹកប្រាក់ចំនួន ៨០លានដុល្លារ ដល់ភូមា ដើម្បីជួយអភិវឌ្ឍផ្នែកសង្គមកិច្ច និងហេដ្ឋារចនាសម្ព័ន្ធ និងជួយជំរុញឲ្យការធ្វើកំណែទម្រង់នយោបាយរៀបចំធ្វើដោយលោកប្រធានាធិបតីថេន សេន។ នេះគឺជាលើកដំបូងបង្អស់ ដែលធនាគារពិភពលោកបានចាប់ផ្តើមផ្តល់ជំនួយដល់ប្រទេសភូមាឡើងវិញ ក្រោយពីបានបិទការិយាល័យ និងបញ្ឈប់រាល់ជំនួយទៅភូមា អស់រយៈពេល ២៥ឆ្នាំ។
ចុះផ្សាយនៅថ្ងៃ៖
ស្តាប់ - ០២:០១
នៅក្នុងសេចក្តីថ្លែងការណ៍ ចេញផ្សាយ នៅថ្ងៃសុក្រនេះ លោកជីម យ៉ុង គីម (Jim Yong Kim) អគ្គនាយកធនាគារពិភពលោកបានថ្លែងថា ការធ្វើកំណែទម្រង់ ដែលរដ្ឋាភិបាលភូមាបានធ្វើនៅពេលនេះ គឺជារឿងល្អមួយ ដែលធនាគារពិភពលោកចាំបាច់ត្រូវតែលើកទឹកចិត្តឲ្យភូមាបន្តធ្វើតទៅទៀត។ លោកបានបញ្ជាក់ថា ជំនួយ ៨០លានដុល្លារ ដែលធនាគារពិភពលោកផ្តល់ទៅឲ្យភូមា នៅពេលនេះ នឹងត្រូវយកទៅប្រើជាអាទិភាពទៅលើគម្រោងកសាងហេដ្ឋារចនាសម្ព័ន្ធ នៅតាមភូមិក្រីក្រ ទៅលើវិស័យអប់រំ សុខាភិបាល និងវិស័យឯកជន ដើម្បីបង្កើតការងារដល់ប្រជាជន។
គួររំឭកឡើងវិញថា ធនាគារពិភពលោកបានបិទការិយាល័យនៅភូមា កាលពីឆ្នាំ១៩៨៧ ព្រមទាំងសម្រេចបញ្ឈប់រាល់ជំនួយទាំងអស់ទៅភូមា ក្រោយពីរបបសឹកភូមាបដិសេធមិនសងបំណុលចាស់ ដែលមានទំហំជាទឹកប្រាក់រាប់រយលានដុល្លារ។
ក្រោយពីរដ្ឋាភិបាលរបស់លោកថេន សេន បានរៀបចំធ្វើកំណែទម្រង់នយោបាយសំខាន់ៗ រហូតនាំឲ្យសហគមន៍អន្តរជាតិបន្ធូរបន្ថយទណ្ឌកម្ម ធនាគារពិភពលោកក៏បានចាប់បើកការិយាល័យរបស់ខ្លួនឡើងវិញ នៅក្នុងប្រទេសភូមា កាលពីខែសីហាកន្លងទៅ។ ធនាគារពិភពលោកកំពុងតែធ្វើការជាមួយនឹងធនាគារអភិវឌ្ឍអាស៊ី និងជប៉ុន ដើម្បីរកវិធីជម្រះបំណុលចាស់របស់ភូមាឲ្យបាន នៅក្នុងឆ្នាំ២០១៣នេះ។
គួរបញ្ជាក់ថា ក្រៅពីបំណុលដែលជំពាក់ធនាគារពិភពលោក នៅមានបំណុលប្រមាណជា ៥០០លានដុល្លារទៀត ដែលភូមាជំពាក់ធនាគារអភិវឌ្ឍអាស៊ី។ ចំណែកបំណុល ដែលជំពាក់ជប៉ុន ចំនួនជិត ៤ពាន់លានដុល្លារ ត្រូវបានជប៉ុនសម្រេចលុបចោល កាលពីខែមេសាកន្លងទៅ។
ការគ្រប់គ្រងតាមរបៀបផ្តាច់ការយោធា និងទណ្ឌកម្មពីសហគមន៍អន្តរជាតិ បានធ្វើឲ្យភូមាក្លាយជាប្រទេសដ៏ក្រីក្របំផុតមួយ នៅអាស៊ី។ ក៏ប៉ុន្តែ ក្រោយពីមានការធ្វើកំណែទម្រង់នយោបាយ និងការបន្ធូរបន្ថយទណ្ឌកម្ម ភូមា ដែលជាប្រទេសសម្បូរទៅដោយធនធានធម្មជាតិ កំពុងតែទាក់ទាញចំណាប់អារម្មណ៍ពីអ្នកវិនិយោគបរទេសយ៉ាងខ្លាំង។
ដើម្បីឲ្យអ្នកវិនិយោគបរទេសមានទំនុកចិត្ត ទាក់ទាញទុនវិនិយោគចូលមកក្នុងប្រទេសភូមា រដ្ឋាភិបាលភូមាក៏បានខិតខំរៀបចំឲ្យមានជាក្របខ័ណ្ឌគតិយុត្តិមួយ សម្រាប់គ្រប់គ្រងការធ្វើវិនិយោគនៅភូមា។ ច្បាប់វិនិយោគនេះ ទើបនឹងត្រូវបានរដ្ឋសភាភូមាអនុម័ត កាលពីថ្ងៃព្រហស្បតិ៍ម្សិលមិញ ហើយដែលលោកប្រធានាធិបតីថេន សេន គ្រោងនឹងចុះហត្ថលេខាប្រកាសឲ្យប្រើ ក្នុងរយៈពេលប៉ុន្មានថ្ងៃខាងមុខទៀតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ