តំណែងប្រធានធនាគារពិភពលោក៖ អាមេរិកប្រឈមនឹងការប្រជែងពីប្រទេសកំពុងអភិវឌ្ឍ
ប្រទេសកំពុងអភិវឌ្ឍបានសម្រេចតែងតាំងបេក្ខជន ដើម្បីប្រជែងយកតំណែងប្រធានធនាគារពិភពលោក ដែលសហរដ្ឋអាមេរិកធ្លាប់តែកាន់កាប់តាំងពីដើមមក។ អាមេរិកវិញ នៅមិនទាន់សម្រេចតែងតាំងបេក្ខជនរបស់ខ្លួនជាផ្លូវការនៅឡើយទេ នៅក្នុងពេលដែល រយៈពេលកំណត់ត្រូវដាក់ឈ្មោះបេក្ខជននឹងត្រូវផុតនៅល្ងាចថ្ងៃសុក្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ធនាគារពិភពលោកកំពុងតែរៀបចំជ្រើសរើសប្រធានថ្មី ជំនួសលោកលោករ៉ូបឺត ហ្សេលិក (Robert Zoellick) ដែលនឹងត្រូវលាឈប់ពីមុខតំណែង នៅចុងខែមិថុនាខាងមុខ។
ចាប់តាំងពីធនាគារពិភពលោកត្រូវបានបង្កើតឡើង នៅឆ្នាំ១៩៤៤ តំណែងប្រធានតែងតែត្រូវបានសហរដ្ឋអាមេរិកជាអ្នកកាន់កាប់ ទៅតាមការព្រមព្រៀងជាមួយបណ្តាប្រទេសនៅអឺរ៉ុប ដែលជាអ្នកកាន់កាប់តំណែងអគ្គនាយកមូលនិធិរូបិយវត្ថុអន្តរជាតិ។ ក៏ប៉ុន្តែ នៅពេលនេះ លំនឹងនៃអំណាចសេដ្ឋកិច្ចពិភពលោកកំពុងតែប្រែប្រួល ហើយបណ្តាប្រទេសដែលកំពុងមានសេដ្ឋកិច្ចរីកលូតលាស់ខ្លាំង (Emerging economies) កំពុងតែស្វះស្វែងបង្កើនតួនាទី នៅក្នុងស្ថានប័នហិរញ្ញវត្ថុអន្តរជាតិនេះ។
មកពីអាហ្វ្រិក បេក្ខភាពរបស់លោកស្រីរដ្ឋមន្រ្តីក្រសួងហិរញ្ញវត្ថុនីហ្សេរីយ៉ា និងជាអតីតមន្រ្តីជាន់ខ្ពស់របស់ធនាគារពិភពលោកត្រូវបានស្នើឡើងដោយប្រទេសអាហ្វ្រិកខាងត្បូង។ ចំណែកនៅអាមេរិកឡាទីនវិញ ប្រេស៊ីលគ្រោងនឹងស្នើបេក្ខភាពរបស់អតីតរដ្ឋមន្រ្តីក្រសួងហិរញ្ញវត្ថុកូឡុំប៊ី។
នៅអាមេរិកឯណោះ រដ្ឋាភិបាលរបស់លោកអូបាម៉ានៅមិនទាន់បង្ហាញឈ្មោះបេក្ខជនរបស់ខ្លួននៅឡើយទេ។ ប្រភពពីមន្រ្តីអាមេរិកឲ្យដឹងថា មានបញ្ជីឈ្មោះបេក្ខជនមួយចំនួន ដែលលោកអូបាម៉ាពិចារណាជ្រើសរើស។ ក្នុងនោះ រួមមាន លោកស្រី Susan Rice ឯកអគ្គរដ្ឋទូតអាមេរិកប្រចាំអ.ស.ប. លោកស្រី Indra Nooyi អគ្គនាយកក្រុមហ៊ុន Pepsi លោក John Kerry សមាជិកព្រឹទ្ធសភា និងលោក Lawrence Summers អតីតរដ្ឋមន្រ្តីក្រសួងហិរញ្ញវត្ថុរបស់លោកប៊ីល គ្លីនតុន អតីតទីប្រឹក្សាសេដ្ឋកិច្ចរបស់លោកអូបាម៉ា និងជាអតីតសកលវិទ្យាធិការនៃសកលវិទ្យាល័យ Harvard។
ឈ្មោះរបស់លោកស្រីហ៊ីឡារី គ្លីនតុន ក៏ធ្លាប់ត្រូវបានគេលើកឡើងជាញឹកញយណាស់ដែរ។ ក៏ប៉ុន្តែ ក្រសួងការបរទេសអាមេរិកបានប្រកាសថា លោកស្រីគ្លីនតុន មិនចង់បានតំណែងជាប្រធានធនាគារពិភពលោកនោះទេ។
រយៈពេលចុះឈ្មោះបេក្ខជនប្រធានធនាគារពិភពលោកនឹងត្រូវផុតកំណត់នៅម៉ោង ៦ល្ងាចថ្ងៃសុក្រនេះ ម៉ោងនៅទីក្រុងវ៉ាស៊ីងតោន (ត្រូវនឹងព្រឹកថ្ងៃសៅរ៍ នៅកម្ពុជា)។ ចំណែកការបោះឆ្នោតតែងតាំងនឹងត្រូវធ្វើនៅក្នុងកិច្ចប្រជុំថ្ងៃទី២១ មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ