ធនាគារពិភពលោក៖« កំណើនសេដ្ឋកិច្ចពិភពលោកនឹងថយចុះក្នុងឆ្នំា ២០១២ »
នៅថ្ងៃអង្គារ ទី១៧ មករា ឆ្នំា ២០១២នេះ ធនាគារពិភពលោកបានព្រមានទុកជាមុននូវការថយចុះនៃកំណើនសេដ្ឋកិច្ចពិភពលោកសម្រាប់ឆ្នំា ២០១២។ បណ្តាប្រទេសដែលនឹងត្រូវទទួលរងផលប៉ះពាល់ខ្លំាងជាងគេ គឺប្រទេសកំពុងអភិវឌ្ឍន៍។ យោងតាមតួលេខផ្តល់ដោយធនាគារពិភពលោក កំណើនសេដ្ឋកិច្ចពិភពលោកសម្រាប់ឆ្នំា ២០១២ មាន ២,៥% គឺតិចជាងឆ្នំា ២០១១ ដែលមាន ២,៧%។ យោងតាមស្ថានប័នអន្តរជាតិដដែលនេះ កំណើនសេដ្ឋកិច្ចពិភពលោកនឹងល្អប្រសើរឡើងវិញនៅឆ្នំា ២០១៣ ជាមួយនឹងអត្រា ៣,១%។
ចុះផ្សាយនៅថ្ងៃ៖
ស្តាប់ - ០២:០២
ផ្អែកតាមរបាយការណ៍របស់ធនាគារពិភពលោក សុខភាពសេដ្ឋកិច្ចពិភពលោកសម្រាប់ឆ្នំា ២០១២ នឹងត្រូវពឹងផ្អែកយ៉ាងខ្លំាងលើកំណើនសេដ្ឋកិច្ចនៅក្នុងបណ្តាប្រទេសកំពុងអភិវឌ្ឍន៍ដែលមានអត្រា ៥,៤%។ ចំណែកនៅក្នុងបណ្តាប្រទេសដែលមានចំណូលខ្ពស់ អត្រានៃកំណើនសេដ្ឋកិច្ចអាចនឹងមានត្រឹមតែ ១,៤%។ យោងតាមធនាគារពិភពលោក សហភាពអឺរ៉ុប ពិសេសបណ្តាប្រទេសប្រើបា្រក់អឺរ៉ូហាក់ដូចជាកំពុងធ្លាក់ក្នុងស្ថានភាពសេដ្ឋកិច្ចដើរថយក្រោយ ចំណែកឯបណ្តាប្រទេសដែលកំពុងមានសេដ្ឋកិច្ចរីកលូតលាស់ ដូចយ៉ាងប្រេស៊ីល ឬមួយក៏ឥណ្ឌាវិញ ក៏មានកំណើនសេដ្ឋកិច្ចថយចុះដែរក្នុងឆ្នំា ២០១២។ ក្រុមអ្នកសេដ្ឋកិច្ចនៃធនាគារពិភពលោកបានអះអាងថា ការថយចុះនៃកំណើនសេដ្ឋកិច្ចពិភពលោកត្រូវបានកត់សម្គាល់ឃើញតាមរយៈការថយចុះនៃអត្រាផ្តោះប្តូរពាណិជ្ជកម្មក្នុងលោក និងការធ្លាក់តម្លៃផលិតផលជាមូលដ្ឋាន។ យោងតាមតួលេខផ្តល់ដោយធនាគារពិភពលោក អត្រានៃការផ្តោះប្តូរពាណិជ្ជកម្មក្នុងលោកសម្រាប់ឆ្នំា ២០១២ អាចមានត្រឹមតែ ៤,៧% គឺតិចជាងឆ្នំា ២០១១ ដែលមាន ៦,៦% និង ១២,៤% កាលពីឆ្នំា ២០១០។
ធនាគារពិភពលោកបានព្រមានទុកជាមុនថា បណ្តាប្រទេសកំពុងអភិវឌ្ឍន៍នឹងត្រូវជួបហានិភ័យជាថ្មីដោយមិនអាចចៀសផុត ដោយសារតែកំណើនសេដ្ឋកិច្ចតិចតួចនៅក្នុងបណ្តាប្រទេសដែលកំពុងមានសេដ្ឋកិច្ចរីកលូតលាស់ និងការផុងខ្លួនក្នុងវិបត្តិប្រាក់បំណុលរបស់ប្រទេសអឺរ៉ុប។
យោងតាមធនាគារពិភពលោក កំណើនសេដ្ឋកិច្ចពិភពលោកសម្រាប់ឆ្នំា ២០១២ នឹងមាន ២,៥% និង ៣,១% សម្រាប់ឆ្នំា ២០១៣។ យ៉ាងណាក៏ដោយ បណ្តាប្រទេសដែលកំពុងមានសេដ្ឋកិច្ចរីកលូតលាស់នឹងមានអត្រាកំណើនសេដ្ឋកិច្ចខ្ពស់ជាងបណ្តាប្រទេសអភិវឌ្ឍន៍ ឬហៅថាក្រុមប្រទេសអ្នកមាន។ ក៏ប៉ុន្តែសម្រាប់បណ្តាប្រទេសកំពុងអភិវឌ្ឍន៍វិញ ធនាគារពិភពលោកបានប្រមើលមើលសាជាថ្មីនូវអត្រាកំណើនសេដ្ឋកិច្ចថយចុះពី ៦,២% មកនៅត្រឹម ៥,៤% សម្រាប់ឆ្នំា ២០១២ និងពី ៦,៣% មកនៅត្រឹម ៦% សម្រាប់ឆ្នំា ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ