ចិនខ្លាចប្រជាជនម៉ុងហ្គោលីធ្វើបដិវត្តន៍ដូចនៅពិភពអារ៉ាប់?
នៅថ្ងៃអាទិត្យ ទី ២៩ ឧសភា រដ្ឋអំណាចចិនបានពង្រាយកម្លាំងប៉ូលិសច្រើនដើម្បីទប់ស្កាត់ កុំឲ្យបាតុកម្មរបស់ប្រជាជនម៉ុងហ្គោលី រីករាលដាលកាន់តែធំ។ ប៉ុន្តែ នៅថ្ងៃអង្គារទី ៣១ ឧសភា ទីក្រុងប៉េកាំងបាននិយាយថា ខ្លួនត្រៀមខ្លួនក្នុងការឆ្លើយតបរាល់ការទាមទារសមស្របរបស់ប្រជាជនម៉ុងហ្គោលីខាងក្នុង។ ក្រសួងការបរទេសចិនវិញមិនភ្លេចចោទប្រកាន់ជននៅបរទេសថា ជាអ្នកដែលញុះញង់ ឲ្យមានបាតុកម្ម បង្កភាពវឹកវរនៅក្នុងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥២
រដ្ឋអំណាចចិនធ្លាប់មានបទពិសោធន៍បង្រ្កាបខ្លាំងលើការតវ៉ារបស់ប្រជាជនភាគតិច ដូចជាប្រជាជនទីបេ និងជនជាតិភាគតិចអ៊ុយហ្គួរ ប៉ុន្តែ លើកនេះ ជាមួយ ជនជាតិម៉ុងហ្គោលីរស់ក្នុងប្រទេសចិន អាជ្ញាធរចិនហាក់ប្រកាន់ជំហរទន់ភ្លន់។ បើតាមអ្នកកាសែត និងរូបភាពបញ្ជូនចេញដោយបាតុករតាមអ៊ិនធ័រណេត គេឃើញមានអាវុធ និងកម្លាំងទាហានពង្រាយច្រើន ដើម្បីចាំយាមស្ទាក់កុំឲ្យបាតុកម្មរបស់ប្រជាជនម៉ុងហ្គោលី រីករាលដាលខ្លាំង។ ប៉ុន្តែ រហូតមកដល់ពេលនេះ គេមិនឃើញមានការបង្រ្កាបខ្លំាង ដូចដែលគេធ្លាប់តែឃើញ នៅក្នុងការបង្រ្កាបលើការតវ៉ារបស់ប្រជាជនទីបេ ឬ បាតុកម្មរបស់ជនជាតិ អ៊ុយហ្គួរ នៅឆ្នាំ ២០០៩ទេ។
ដើមហេតុដំបូង បង្កឲ្យ ប្រជាជនម៉ុងហ្គោលីមានកំហឹង និងធ្វើបាតុកម្ម មកដល់ថ្ងៃអាទិត្យនេះ គឺ កម្មករអណ្តូងរ៉ែជនជាតិហានបានបើកឡាន បុកទម្លាយហ្វូងបាតុករ និងសម្លាប់ អ្នកចិញ្ចឹមសត្វចៀមម៉ុងហ្គោលីម្នាក់។ អ្នកចិញ្ចឹមសត្វម៉ុងហ្គោលីទាំងនេះតវ៉ា ថា ការជីកយករ៉ែធ្យូងថ្ម បំផ្លាញកន្លែងចិញ្ចឹមសត្វរបស់ពួកគេ។
ក្នុងរឿងប្រជាជនម៉ុងហ្គោលី រដ្ឋអំណាចចិន គ្រប់ជាន់ថ្នាក់ បានចេញមុខ អន្តរាគម។ នៅមួយថ្ងៃ ក្រោយកើតហេតុ ប៉ូលិសខេត្តបាននិយាយថា គេចាប់ខ្លួនបានអ្នកបើកបរជនជាតិហានទាំងពីរនាក់ និងសន្យាផ្តន្ទាទោសតាមច្បាប់។ នៅចំពោះមុខការទាមទារកាន់តែខ្លាំង របស់ប្រជាជនម៉ុងហ្គោលី ថ្នាក់ដឹកនាំបក្សចិនប្រចាំតំបន់ម៉ុងហ្គោលីខាងក្នុងបានទៅជួបគ្រួសារសពអ្នកចិញ្ចឹមចៀមដែលកម្មករបើកឡានបុកសម្លាប់។ ជាការសងជម្ងឺចិត្ត គ្រួសារសពបានទទួលប្រាក់ប្រមាណ ៦ម៉ឺន អឺរ៉ូ ពីរដ្ឋអំណាច។ គេមើលឃើញថា នេះជាទឹកប្រាក់ច្រើនសន្ធឹកសន្ធាប់ដែលមិនធ្លាប់មាន ហើយក៏ជាសំណងដើម្បីពន្លត់កំហឹងរបស់ប្រជាជនម៉ុងហ្គោលី។
ប្រជាជនម៉ុងហ្គោលីមានចំនួន២០ភាគរយ គឺ ប្រមាណ៦លាននាក់ ក្នុងចំណោមប្រជាជនចិនសរុប ជាង ២៣លាននាក់ នៅតំបន់ម៉ុងហ្គោលីខាងក្នុង។ រហូតមកដល់ពេលនេះ អាជ្ញាធរចិនមិនទាន់អាចចាត់វិធានការក្តៅអ្វីបានទេ ព្រោះ គេមិនទាន់ដឹងពីគោលដៅទាមទារពិតប្រាកដរបស់ប្រជាជនម៉ុងហ្គោលីនៅឡើយទេ។ ក្នុងបាតុកម្មកន្លងមកនេះ ប្រជាជនម៉ុងហ្គោលីបានស្រែកទាមទារឲ្យគេគោរពសិទ្ធិ និងការពារទឹកដីរបស់ពួកគេប៉ុណ្ណោះ។
ប៉ុន្តែ អាជ្ញាធរចិនព្រួយបារម្ភនៅចំពោះមុខការទាមទារនេះ ព្រោះចិនមិនដឹងច្បាស់ថា តើប្រជាជនម៉ុងហ្គោលីចង់ទាមទារត្រឹមទឹកដីចិញ្ចឹមសត្វរបស់គេ ឬក៏ចង់ទាមទារផ្តាច់ទឹកដី ដូចប្រជាជនទីបេ និងជនជាតិភាគតិចអ៊ុយហ្គួរដែរ។ ចិនខ្លាចថា បើប្រជាជនម៉ុងហ្គោលី នៅខេត្តដែលអ្នកចិញ្ចឹមចៀមត្រូវគេបុកសម្លាប់ នោះ ងើបប្រឆាំង បន្តិចម្តងៗ ប្រជាជនម៉ុងហ្គោលី នៅគ្រប់ទីកន្លែង នឹងងើបប្រឆាំងដែរ ព្រោះថា ពាក្យស្លោករបស់បាតុករដែលថា ការពារទឹកដី និងសិទ្ធិរបស់ប្រជាជនម៉ុងហ្គោលី អាចនឹងបំផុសប្រជាជនម៉ុងហ្គោលីដទៃទៀត ឲ្យងើបប្រឆាំង។ ក្នុងបរិបទបច្ចុប្បន្ន គេខ្លាចវាកាន់តែរីករាលដាល និងមានរូបរាងដូចជាបដិវត្តន៍អារ៉ាប់ ដែលកំពុងផ្ទុះនៅក្នុងប្រទេសដើមបូព៌ា និងនៅទ្វីបអាហ្រ្វិក។
បើនិយាយពីផ្នែកសេដ្ឋកិច្ច ខុសពីទីបេ និងស៊ីនជាំងរបស់ប្រជាជនអ៊ុយហ្គួរ រដ្ឋអំណាចចិនមិនអាចមើលរំលងបានទេ ពីសក្តានុពលសេដ្ឋកិច្ចរបស់ម៉ុងហ្គោលីខាងក្នុង។ កាលពីឆ្នាំមុនថ្នាក់ដឹកនាំចិនទើបចេញសេចក្តីប្រកាសចាត់ទុកតំបន់ម៉ុងហ្គោលីខាងក្នុងថា ជាជង្រុកធ្យូងថ្ម ដ៏ធំ និងសំខាន់សម្រាប់ឧស្សាហកម្ម ក្នុងប្រទេស។ បាតុកម្មរបស់ប្រជាជនម៉ុងហ្គោលី ដែលនឹងអាចរីកធំទៅជាវិបត្តិសង្គមនឹងអាចប៉ះពាល់ដល់អាជីវកម្មរករ៉ែធ្យូងថ្ម ដែលជាដង្ហើមសេដ្ឋកិច្ចរបស់ចិនមួយនេះ។ នៅថ្ងៃចន្ទម្សិលមិញ ប្រធានាធិបតី ហ៊ូ ជិនតាវក៏បាននិយាយទៅកាន់ថ្នាក់ដឹកនាំនយោបាយរបស់បក្សកុម្មុយនិស្តឲ្យគិតគូរដោះស្រាយបញ្ហានេះឲ្យបានឆាប់។ ដំណោះស្រាយ មានតែមួយគត់ គឺកាត់បន្ថយភាពតានតឹងផ្នែកសង្គម និងជម្រុញ សមភាពរវាងប្រជាជន។
វប្បធម៌ និងជីវភាពប្រជាជនម៉ុងហ្គោលីដែលរស់នៅរបៀបពនេចរ ផ្លាស់ពីកន្លែងមួយ ទៅកន្លែងមួយ និងប្រកបរបរចិញ្ចឹមសត្វត្រូវបានគំរាមកំហែង ដោយការលុកលុយចូលមករស់នៅកាន់តែច្រើន របស់ជនជាតិហាន នៅក្នុងទឹកដីម៉ុងហ្គោលី។
បាតុកម្មនៅថ្ងៃអាទិត្យ គេឃើញសម្បូរមានយុវជន និងនិស្សិតម៉ុងហ្គោលី ដែលហ៊ានធ្វើការតវ៉ាដើម្បីឲ្យគេគោរពសិទ្ធិ និងការពារទឹកដី ដែលនេះ ខុសពី ឪពុកម្តាយរបស់ពួកគេ។ ឪពុកម្តាយខ្លះ មិនហ៊ានធ្វើបាតុកម្ម ប៉ុន្តែ បានជម្រុញកូនពីក្រោយ ព្រោះសង្ឃឹមថា កូនដែលបានរៀនសូត្រចេះដឹងបានច្រើន នឹងអាចតវ៉ាបានប្រសិទ្ធិភាព នៅចំពោះមុខអាជ្ញាធរចិន។ គឺកម្លាំងយុវជននេះហើយដែលធ្វើឲ្យរដ្ឋអំណាចចិនព្រួយបារម្ភ ព្រោះកុំភ្លេចថា បដិវត្តដែលកើតមាននៅពិភពអារ៉ាប់ កើតមានដំបូងមកពីបាតុកម្មរបស់ក្រុមយុវជនដែលគ្មានការងារធ្វើ និងយុវជនដែលមិនពេញចិត្តនឹងការដឹកនាំរបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ