អ៊ីរ៉ង់៖លោកហាសាន រ៉ូហានីច្រានចោលអំពើហិង្សា និងបរិហារលើពាក្យរិះគន់របស់លោកដូណាល់ ត្រាំ
នៅក្នុងប្រទេសអ៊ីរ៉ង់ លោកប្រធានាធិបតីហាសាន រ៉ូហានីបានចេញមុខអន្តរាគមន៍ជាលើកទី១ទាក់ទងនឹងបាតុកម្មដែលបានផ្ទុះតាំងពី ៤ថ្ងៃ។ នៅក្នុងបទអន្តរាគមន៍នាយប់ថ្ងៃអាទិត្យ ទី៣១ ធ្នូ លោករ៉ូហានីបានច្រានចោលរាល់ទង្វើហិង្សា និងការបំផ្លិចបំផ្លាញទ្រព្យសម្បត្តិសាធារណៈ។ តែស្របគ្នានេះ លោករ៉ូហានីក៏បានបញ្ជាក់ពីការយល់ព្រមបង្កើតឲ្យមានឱកាសសម្រាប់ក្រុមសកម្មជនបដិវត្ត និងពលរដ្ឋទូទៅអាចសម្តែងក្តីបារម្ភប្រចាំថ្ងៃរបស់ខ្លួនដែរ។ បន្ទាប់មក លោករ៉ូហានីមិនភ្លេចបរិហារលើពាក្យរិះគន់របស់សមភាគីអាមេរិកលោកដូណាល់ ត្រាំ។
ចុះផ្សាយនៅថ្ងៃ៖
ស្តាប់ - ០១:៥៥
៤ថ្ងៃក្រោយបាតុកម្មប្រឆាំងនឹងរដ្ឋាភិបាល និងផលវិបាកផ្នែកសេដ្ឋកិច្ចដែលបានកើតមានឡើងនៅក្នុងខេត្តជាច្រើន និងក្នុងទីក្រុងតេហេរ៉ង់មក លោកប្រធានាធិបតីហាសាន រ៉ូហានីបានបញ្ចេញប្រតិកម្មជាលើកដំបូងដោយច្រានចោលអំពើហិង្សា និងយល់ព្រមបង្កើតឲ្យមានបរិយាកាស និងលក្ខខណ្ឌសម្រាប់ពលរដ្ឋដើម្បីឲ្យពួកគេអាចសម្តែងមតិរិះគន់បាន។ តែលោករ៉ូហានីបានបន្ថែមថា បរិយាកាស និងលក្ខខណ្ឌក្នុងការសម្តែងមតិរិះគន់នឹងត្រូវធ្វើឡើងសម្រាប់តែការតវ៉ាតាមក្បួនបាតុកម្ម និងការជួបជុំទាំងឡាយដែលច្បាប់បានអនុញ្ញាត។ លោករ៉ូហានីបានទាត់ចោលលើការប្រើអំពើហិង្សា និងទង្វើបំផ្លិចបំផ្លាញទ្រព្យសម្បត្តិសាធារណៈ។
« ប្រជាជនមានសិទ្ធិសេរីភាពពេញលេញក្នុងការសម្តែងមតិរិះគន់ តែជាមតិរិះគន់ក្នុងន័យស្ថាបនា និងអាចអនុញ្ញាតចូលរួមជួយលើកដំកើងស្ថានភាពប្រទេសជាតិ និងជីវភាពរស់នៅរបស់ប្រជាជន » នេះជាការព្រមានរបស់លោករ៉ូហានីនៅក្នុងកិច្ចប្រជុំគណៈរដ្ឋមន្រ្តី។ ដោយឡែក លោករដ្ឋមន្រ្តីក្រសួងមហាផ្ទៃបានព្រមានចំលើពួកបាតុករដែលបានប្រើអំពើហិង្សានៅក្នុងក្បួនបាតុកម្ម។ ក្រៅពីព្រមានលើទង្វើហិង្សារបស់ពួកបាតុករ រដ្ឋអំណាចក៏បានកម្រិតការប្រើបណ្តាញសង្គមដើម្បីបញ្ជៀសការអំពាវនាវឲ្យមានក្បួនបាតុកម្មថ្មីៗទៀត។
ដោយឡែក លោកប្រធានាធិបតីរ៉ូហានីក៏មិនញញើតនឹងបរិហារលើពាក្យរិះគន់របស់លោកប្រធានាធិបតីអាមេរិកដូណាល់ ត្រាំដែលបានលើកឡើងថា រដ្ឋាភិបាលអ៊ីរ៉ង់ត្រូវតែគោរពសិទ្ធិរបស់បាតុករ។ « លោកនេះនៅអាមេរិកចង់បង្ហាញពីសមានចិត្តចំពោះប្រជាជនអ៊ីរ៉ង់ តែគាត់ហាក់ភ្លេចថាគាត់បានចាត់ទុកប្រជាជនអ៊ីរ៉ង់ជាភេរវជន »នេះជាការថ្លែងរបស់លោករ៉ូហានី មុននឹងវ៉ៃប្រហារចំៗថា « ត្រាំគ្មានសិទ្ធិអាណិតអាសូរជាមួយប្រជាជនអ៊ីរ៉ង់ឡើយ »។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ