អារ៉ាប៊ីសាអូឌីត ព្រមានជាថ្មីអំពីវិបត្តិសេដ្ឋកិច្ចដែលដរចេញពីសង្គ្រាមហ្កាហ្សា
ព្រះរាជាណាចក្រសេដ្ឋីប្រេង អារ៉ាប៊ីសាអូឌីត បានព្រមានជាថ្មីអំពីវិបត្តិសេដ្ឋកិច្ច ដែលដរចេញពីសង្គ្រាមនៅហ្កាហ្សា ហើយនិងអំពាវនាវឲ្យថ្នាក់ដឹកនាំប្រទេសទាំងឡាយ រួបរួមគ្នាទប់ស្កាត់វិបត្តិ ព្រមទាំងជំរុញស្ថិរភាពក្នុងតំបន់ដើមបូព៌ា។ សេចក្តីព្រមាននិងការអំពាវនាវរបស់អារ៉ាប៊ីសាអូឌីតនេះ ធ្វើឡើងនៅថ្ងៃអាទិត្យ ទី២៨មេសា ក្នុងនាមជាម្ចាស់ផ្ទះរៀបចំវេទិកាសេដ្ឋកិច្ចពិភពលោក។ វេទិកាសេដ្ឋកិច្ចពិភពលោក ដែលត្រូវរៀបចំធ្វើចំនួន ២ថ្ងៃ នៅរាជធានីរីយ៉ាដ។
ចុះផ្សាយនៅថ្ងៃ៖
ស្តាប់ - ០២:២៨
«តំបន់ដើមបូព៌ា ត្រូវការស្ថិរភាព»។ នេះបើតាម អារ៉ាប៊ីសាអូឌីត ក្នុងនាមជាម្ចាស់ផ្ទះរៀបចំវេទិកាសេដ្ឋកិច្ចពិភពលោក។ រដ្ឋមន្ត្រីហិរញ្ញវត្ថុអារ៉ាប៊ីសាអូឌីត លោក Mohammed al-Jadaan បានដាស់តឿនក្រើនរំឮកអំពីផលប៉ះពាល់អវិជ្ជមានចំពោះសេដ្ឋកិច្ច ដែលបង្កឡើងពីជម្លោះសង្គ្រាម រវាងអ៊ីស្រាអែលនិងក្រុមហាម៉ាស នៅតំបន់ហ្កាហ្សា។
ក្នុងសុន្ទរកថាបើកជំនួបកំពូលសេដ្ឋកិច្ចពិភពលោក នៅក្រុងរីយ៉ាដ រដ្ឋមន្ត្រីអារ៉ាប៊ីសាអូឌីត បានលម្អិតទៀតថា សង្គ្រាមនៅហ្កាហ្សា បូករួមទាំងសង្គ្រាមអូសបន្លាយនៅអ៊ុយក្រែន ព្រមទាំងជម្លោះដទៃផ្សេងទៀត សុទ្ធសឹងតែជះឥទ្ធិពលអាក្រក់ ដាក់សម្ពាធសម្បើមណាស់ដល់បរិស្ថានសេដ្ឋកិច្ច។ អាស្រ័យហេតុដូច្នេះហើយ ទើប រដ្ឋមន្ត្រីហិរញ្ញវត្ថុអារ៉ាប៊ីសាអូឌីត ប្រកាសអំពាវនាវដល់ ប្រទេសទាំងឡាយ ថ្នាក់ដឹកនាំទាំងពួង ភាគីពាក់ព័ន្ធគ្រប់គ្នា ឲ្យបង្កើនស្មារតីយកចិត្តទុក និងចូលរួមឲ្យខ្លាំង ដោះស្រាយបន្ធូរសម្រាលស្ថានការណ៍។
ជាមួយគ្នានេះដែរ ក្នុងសន្និសីទសារព័ត៌មាន លោក បឺកហ្គឺ ប្រែនដា ប្រធានវេទិកាសេដ្ឋកិច្ចពិភពលោក ជនជាតិន័រវែស្ស បានប្រកាសឯកភាពថា វេទិកាសេដ្ឋកិច្ចពិភពលោក នៅគ្រានេះ ជាឱកាសដ៏ល្អ ប្រមូលផ្តុំប្រទេសសំខាន់ៗជាគន្លឺះ ដើម្បីលើកឡើងកិច្ចពិភាក្សាគ្នា ជុំវិញការចរចាដោះលែងចំណាប់ខ្មាំង ហើយនិងបង្កើនកម្លាំងចលករបន្ថែម ដល់ការរកដំណោះស្រាយនៅហ្កាហ្សា។
ពាក់ព័ន្ធនឹងសំណុំរឿងសង្គ្រាមនៅហ្កាហ្សានេះ, សហរដ្ឋអាមេរិក អាជ្ញាធរប៉ាឡេស្ទីន ហើយនិង តំណាង ការទូតជាន់ខ្ពស់ នៃប្រទេសពាក់ព័ន្ធ ដែលនឹងត្រូវទៅចូលរួមក្នុងវេទិកាសេដ្ឋកិច្ចនៅអារ៉ាប៊ីសាអូឌីត។ ក៏ប៉ុន្តែ គ្មានវត្តមានអ៊ីស្រាអែលនោះឡើយ។
តាមប្រភពពីក្រសួងការបរទេសសហរដ្ឋអាមេរិក, ប្រមុខទូតអាមេរិក លោក អង់តូនី ប្ល៊ីងកិន ត្រូវអញ្ជើញចូលរួមពិភាក្សានៅថ្ងៃច័ន្ទ ដោយផ្តោតជាសំខាន់ទៅលើការដោះដូរចំណាប់ខ្មាំង ហើយនិងរកវិធីសាស្ត្រទប់ទល់កុំឲ្យសង្គ្រាមហ្កាហ្សារាលដាលកាន់តែខ្លាំងនៅក្នុងតំបន់មជ្ឈិមបូព៌ា។
នៅថ្ងៃអាទិត្យ ទី២៨មេសា នេះដែរ ប្រមុខដឹកនាំអាជ្ញាធរប៉ាឡេស្ទីន បានដង្ហើយហៅឲ្យ សហរដ្ឋអាមេរិក ជួយទប់ស្កាត់វិនាសកម្មនៅតំបន់រ៉ាហ្វាហ៍ ដែលបង្កឡើងពីប្រតិបត្តិការវាយលុករបស់អ៊ីស្រាអែល។ លោក ម៉ះមូដ អាបាស់ ប្រកាសថា មានតែប្រទេសអាមេរិកមួយទេ ដែលអាចហាមឃាត់អ៊ីស្រាអែល ឲ្យបញ្ជៀសឧក្រិដកម្មវិនាសកម្មនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ