ឡេតូនី ប្រទេសអតីតសហភាពសូវៀតក្លាយជាប្រធានផ្លាស់វេនសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៤:៥៥
តាំងពីថ្ងៃទី ១ មករា ២០១៥មក ឡេតូនី បានទទួលតួនាទី ជាប្រធានផ្លាស់វេនសហភាព បន្តពីប្រទេសអ៊ីតាលី សម្រាប់រយៈពេល៦ខែ។ សម្រាប់ប្រទេសជាអតីតសហភាពសូវៀត ការងារដឹកនាំសហភាពមានទំហំ ធំធេងណាស់។ តើអ្វីជាមេរៀនដែលអឺរ៉ុបត្រូវទាញពីឆ្នាំ២០១៤ ? តើនឹងត្រូវដឹកនាំអឺរ៉ុបយ៉ាងណានៅឆ្នាំថ្មីនេះ ? តើអ្វីថ្មីខ្លះសម្រាប់អឺរ៉ុបឆ្នាំ២០១៥ ?
ត្រីមាសទីមួយឆ្នាំ ២០១៤ ដែលប្រធានផ្លាស់វេនជាតំណាងប្រទេសទន់ខ្សោយជាងមួយក្នុងសហភាពនិងកំពុងឆ្លងកាត់វិបត្តិក្រិក។ ពេលនេះសហភាពអឺរ៉ុបបានសម្គាល់ដោយព្រឹត្តិការណ៍បោះឆ្នោតសភាអឺរ៉ុប ដែលមានការចូលរួមយ៉ាងតិចតួច និងការស្ទុះឡើងនៃកម្លាំងមិនចូលចិត្ត ឬកម្លាំងប្រឆាំងនឹងសហភាពអឺរ៉ុប។
ត្រីមាសទីពីរ សហភាពអឺរ៉ុបត្រូវគ្រប់គ្រងដោយអ៊ីតាលី។ មានប្រមុខដឹកនាំប្រទេសថ្មី រដ្ឋាភិបាលអន្តរកាលអ៊ីតាលី បានបង្ហាញអំពីមហិច្ឆតាដ៏ពុះកញ្ជ្រោលសម្រាប់ប្រទេសនិងអឺរ៉ុប តែមានសណ្ឋានដូចអណ្តាតភ្លើងឆេះតែមួយឆាប រួចក៏រលត់បាត់ ប្រាំមួយខែក្រោយ សហភាពអឺរ៉ុបនៅនឹងមួយកន្លែង។ លើសមរភូមិរិតត្បិតថវិកា អ៊ីតាលីបានត្រឹមរិះគន់ លើផែនការផ្តល់សន្ទុះ មិនមែនជាកិច្ចការរបស់អ៊ីតាលីជាប្រធានផ្លាស់វេន តែជាបន្ទុកលោក Jean Claude Juncker! អ្វីដែលប្រមុខរដ្ឋាភិបាលអ៊ីតាលី ទទួលជោគជ័យពិតប្រាកដនិងតែមួយគត់គឺកិច្ចព្រមព្រៀងស្តីពីអាកាសធាតុ។
ការងារល្អិតល្អន់
ប្រធានផ្លាស់វេនបន្ត គឺឡេតូនី ! មរតកបន្សល់ទុកដោយប្រធានមុខៗ សុទ្ធតែជាបញ្ហាធំៗ ដែលឡេតូនីផ្ទាល់គ្មានមធ្យោបាយអាចដោះស្រាយបានសោះ ៖ វិបត្តិក្រិក អសន្តិសុខផ្នែកថាមពល ភេរវកម្មអ៊ីស្លាមនិយមជ្រុល ស្តារទំនាក់ទំនងអឺរ៉ុប-អង់គ្លេស និងពិសេសត្រូវចាត់ចែងភាពប្រឈមរវាងសហភាពអឺរ៉ុបជាមួយរុស្ស៊ី ដែលធ្លាប់ជាអតីតអាណាព្យាបាលផង។
នេះគឺជាលើកទីមួយហើយដែល ប្រទេសឡេតូនីនៃតំបន់បាល់ទិក មានព្រំប្រទល់ខាងជើងជាប់អេស្តូនី និងខាងត្បូងជាប់លីទុយអានី ជាសមាជិកសហភាពអឺរ៉ុប តាំងពីឆ្នាំ ២០០៤ ចូលក្នុងតំបន់ចាយប្រាក់អឺរ៉ូ នៅឆ្នាំ២០១៤ បានទទួលនាទីជាប្រធានផ្លាស់វេនសហភាពអឺរ៉ុប។ សន្ធិសញ្ញាក្រុងលីស្បូន ឆ្នាំ២០០៩ បានកំណត់ឱ្យមានប្រធានអចិន្ត្រៃយ៍ដឹកនាំសហភាពអឺរ៉ុប ប្រធានក្រុមប្រឹក្សាអឺរ៉ុប (លោកដូណាល់ តួស្ក Donald Tusk)មែន ប៉ុន្តែគោលការណ៍ប្រធានផ្លាស់វេនអឺរ៉ុបនៅតែរក្សាទុកដដែល។
ជាប្រធានផ្លាស់វេន មិនមែនត្រឹមតែជាភារកិច្ចគិតគូរលើសមភាគទេ តែត្រូវចូលប្រលូកនិងបញ្ចេញសកម្មភាព ដើរតួនាទីជាអ្នកដឹកមុខ ជាអ្នកផ្តួចផ្តើមយោបល់ក្នុងការដ្ឋាននៅក្រុមប្រឹក្សា តែក្នុងអត្ថន័យបន្តឥតដាច់ពីកម្មវិធីរបស់សហភាពអឺរ៉ុប និងរក្សាបាននូវដំណើរការយ៉ាងរលូន ស៊ីចង្វាក់គ្នា និងមានកិច្ចសហប្រតិបត្តិការល្អរវាងប្រទេសជាសមាជិកនីមួយ។ ដើម្បីសម្រេចការងារនេះបាន ប្រធានផ្លាស់វេនត្រូវដើរតួនាទីជាអ្នកកណ្តាល រឹងប៉ឹង និងអព្យាក្រិត្យ។ ត្រូវដាក់ផែនការប្រជុំថ្នាក់រដ្ឋមន្ត្រីអឺរ៉ុប និងការប្រជុំត្រៀម ដោយមានតំណាងអចិន្ត្រៃយ៍ទាំង២៨ប្រទេសចូលរួម។
ជាការងារដ៏ល្អិត ដែលត្រូវការកម្លាំងច្រើន ដោយមិនអាចមើលបានឡើយ ជាពិសេសសម្រាប់ឡេតូនី ប្រទេសតូចមានប្រជាជនតែ២លាននាក់។ ឡេតូនីបានចាប់ផ្តើមជ្រើសរើសអ្នកមានសមត្ថភាពពីខាងក្រៅ ដើម្បីជាជំនួយ និងដើម្បីរំលែងការងារខ្លះ។ ប្រទេសតូច មានដៃតិច ប៉ុន្តែបើមធ្យ័តលើការងារ លទ្ធផលចុងក្រោយនឹងមានជោគជ័យជាក់ជាមិនខាន ដូចដែលសុភាសិតខ្មែរថាគ្នាច្រើនអន្សមខ្លោចដូច្នោះ។ នេះជាសំអាងរបស់ក្រុមប្រឹក្សាអឺរ៉ុប។
បង្ហាញខ្លួន
ធ្វើការច្រើននិងហត់បន្តិចមែន ប៉ុន្តែជាឱកាសដែលមិនអាចរំលងបាន ! បានទទួលនាទីជាប្រធានផ្លាស់វេន ប្រទេសមានឱកាសបង្ហាញពីឆន្ទៈរបស់ខ្លួនចំពោះសហភាពអឺរ៉ុប រុញច្រានផលប្រយោជន៍របស់ប្រទេសឱ្យចូលកាន់តែកៀកនឹងស្ថាប័នដឹកនាំកំពូលរបស់អឺរ៉ុប។ យ៉ាងណាមិញ ឡេតូនី ក៏អាចប្រើនាមជាប្រធានផ្លាស់វេនសហភាពអឺរ៉ុប ដើម្បីឱ្យគ្រប់គ្នាស្គាល់ប្រទេសរបស់ខ្លួនកាន់តែច្បាស់ ព្រោះរហូតមកទល់ពេលនេះ គណៈកម្មការអឺរ៉ុបស្គាល់ឡេតូនី តិចតួចណាស់ ស្គាល់ត្រឹមអន្តរការីតំណាងប្រទេស អនុប្រធានគណៈកម្មការអឺរ៉ុបទទួលបន្ទុកប្រាក់អឺរ៉ូ និងចរចាសង្គម លោកValdis Dombrovskis ដែលធ្លាប់ជានាយករដ្ឋមន្ត្រីឡេតូនី ពីឆ្នាំ ២០០៩-២០១៤ ឧស្សាហ៍ចុះឡើងមកទីស្នាក់ការអឺរ៉ុបជាងគេ ល្បីឈ្មោះខាងហ្មត់ចត់ និងច្បាស់ការណ៍ តែមាត់ច្រើនទៅកាន់ប្រព័ន្ធសារព័ត៌មាន។
ជាក់ស្តែង កាលអ៊ីតាលីជាប្រធានផ្លាស់វេន ! ប្រមុខដឹកនាំអ៊ីតាលី ដែលជាបុគ្គលប្រកបដោយថាមពល បានស្ទុះស្ទារខ្លាំងណាស់ ទាមទារឱ្យអឺរ៉ុបប្តូរផ្លាស់ដើម្បីប្រយោជន៍អ៊ីតាលីផ្ទាល់ខ្លួនផង គឺបន្ធូរបន្ថយនយោបាយរិតត្បិត ផ្តល់អាទិភាពកំណើនសេដ្ឋកិច្ច និងការងារ។ ថ្វីបើមិនមែនជាគំនិតរបស់អ៊ីតាលីមែនតែនៅទីបំផុត ក្រុមប្រឹក្សាអឺរ៉ុបបានព្រមព្រៀងគ្នាយ៉ាងឆាប់រហ័សជាលើកទីមួយ នៅក្នុងជំនួបចុងក្រោយអនុម័តទទួលយកផែនការផ្តល់សន្ទុះសេដ្ឋកិច្ច ៣១៥ពាន់លានអឺរ៉ូរបស់លោក Jean Claude Juncker ។
ប៉ុន្តែអ៊ីតាលី បានបន្សល់ទុកសំណុំរឿងសំខាន់ៗ និងស្មុគស្មាញជាច្រើនទៀតឱ្យឡេតូនី មានជាអាទិ៍ គម្រោងយកពន្ធលើការផ្ទេរប្រាក់ ទិសដៅអព្យាក្រិត្យប្រព័ន្ធអ៊ីនធ័រនែត ការពារទិន្នន័យបុគ្គល ។ល។ និង។ល។ តែសំណុំរឿងដែលធំនិងសំខាន់ខ្លាំង គឺទំនាក់ទំនងអឺរ៉ុប-រុស្ស៊ី។ អឺរ៉ុបចង់ឃើញទំនាក់ទំនងនេះមានភាពធូរស្រាលនឹងគ្នាឡើងវិញ។ ជាប្រធានបទដែលអាចនឹងធ្វើឡេតូនី តឹងសរសៃក្បាលបន្តិច ព្រោះ៤០%នៃបណ្តាជនឡេតូនីនិយាយភាសារុស្ស៊ី និង១០%គ្មានសញ្ជាតិឡេតូនី ត្រូវបញ្ជូនត្រលប់ទៅរុស្ស៊ីជាប្រទេសកំណើតផង។
លើផ្នែកសេដ្ឋកិច្ចវិញ ឡេតូនី កំពុងសំឡឹងមើលអ្នកជិតខាងរស្ស៊ី ក្នុងក្រសែភ្នែកសង្ស័យបំផុត និងចង់យកចំណេញពីតួនាទីជាប្រធានផ្លាស់វេនអឺរ៉ុបនេះ សម្រាប់រុញច្រានសំណុំរឿង “ដៃគូខាងកើត” ដែលប្រទេសអតីតសហភាពសូវៀតចង់ភ្ជាប់ជាមួយអឺរ៉ុប។ ក្រុងរីហ្កា ត្រៀមរៀបចំសន្និសីទមួយនៅថ្ងៃ២២ឧសភា២០១៥ ដែលអាចនឹងធ្វើឱ្យរុស្ស៊ី និងដៃគូអឺរ៉ុបមួយចំនួនក្រញាញ់មុខដាក់គ្នា ឬមិនទៅចូលរួមផង បើយោលទៅលើស្ថានការណ៍ភូមិសាស្ត្រនយោបាយបច្ចុប្បន្ន។
នៅក្នុងរបៀបវារៈការងារដែរ គឺការដាក់ឱ្យដំណើរផែនការវិនិយោគរបស់លោក Juncker ដែលឡេតូនី ត្រូវរិះរេធ្វើយ៉ាងឱ្យអត្ថបទច្បាប់ត្រូវអនុម័ត និងអាចប្រើបានចាប់ពីខែមិថុនា២០១៥ទៅ។ ឡេតូនី ក្នុងនាមជាប្រធានក៏ត្រូវតែធ្វើការលើសំណុំរឿងផ្តល់សន្ទុះចរចាជាមួយសហរដ្ឋអាមេរិកស្តីអំពីសន្ធិសញ្ញាដោះដូរសេរីអន្តរអាត្លង់ទិក ព្រោះអឺរ៉ុបចង់សម្រេចឱ្យបាននៅចុងឆ្នាំ២០១៥។ ជាកម្មវត្ថុប្រកបដោយមហិច្ឆតាបំផុត បើមើលទៅភាពស្មុគស្មាញនៃសំណុំរឿង និងភាពរសើបនៃមតិសាធារណៈអឺរ៉ុប ដោយមិនគិតពីឆន្ទៈដៃគូម្ខាងទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ