ជំនួបប្រជុំនៃរដ្ឋមន្ត្រីក្រសួងហិរញ្ញវត្ថុនៃតំបន់អឺរ៉ូដើម្បីជួយអៀរឡង់
រដ្ឋមន្ត្រីក្រសួងហិរញ្ញវត្ថុនៃតំបន់អឺរ៉ូជួបប្រជុំគ្នានៅ ថ្ងៃអង្គារទី១៦និងថ្ងៃពុធទី១៧វិច្ឆិកានៅទីក្រុងBruxellesដើម្បី រិះរកជួយដោះស្រាយបញ្ហាហិរញ្ញវត្ថុនៃប្រទេសអៀរឡង់ដែលបានធ្លាក់ចុះ ដុនដាបខ្លាំងឡើងៗ ហើយនិងដើម្បីបញ្ចៀសកុំឲ្យមានការឆ្លងរាលដាលទៅប្រទេសអឺរ៉ុបឯទៀតៗ ដែលនៅទន់ខ្សោយដូចជាប្រទេសព័រទុយហ្កាល់និងប្រទេសក្រិក។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
ជំនួបប្រជុំនៃរដ្ឋមន្ត្រីក្រសួងហិរញ្ញវត្ថុនៃតំបន់អឺរ៉ូនឹងត្រូវចាប់ផ្តើមនៅម៉ោង១៧ម៉ោងក្នុងស្រុកត្រូវជាម៉ោង១៦ម៉ោងសកលនៅថ្ងៃអង្គារទី១៦វិច្ឆិកានេះនៅទីក្រុងBruxellesនៃប្រទេសបែលហ្ស៊ិកហើយនៅថ្ងៃពុធទី១៧វិច្ឆិកាស្អែក ជំនួបប្រជុំនេះនឹងត្រូវពង្រីកទៅដល់រដ្ឋមន្ត្រីក្រសួងហិរញ្ញវត្ថុនៃប្រទេសសមាជិកទូទាំងសហភាពអឺរ៉ុប។
រដ្ឋមន្ត្រីក្រសួងហិរញ្ញវត្ថុនៃតំបន់អឺរ៉ូជួបប្រជុំគ្នានេះដើម្បីជួយរិះរកដោះស្រាយបញ្ហាហិរញ្ញវត្ថុឲ្យប្រទេសអៀរឡង់ដែលកំពុងតែជួបនឹងវិបត្តិដ៏សែនធ្ងន់ធ្ងរនៅក្នុងវិស័យធនាគារ បន្ទាប់ពីសកម្មភាពទិញលក់អចលនទ្រព្យអៀរឡង់បានដួលរលំធ្លាក់ទៅក្នុងជ្រោះវិបត្តិហៀបនឹងស្គាល់ការក្ស័យធន។
ក្រៅពីមានគោលបំណងចង់ជួយប្រទេសអៀរឡង់ ជំនួបប្រជុំនៃរដ្ឋមន្ត្រីក្រសួងហិរញ្ញវត្ថុនៃតំបន់អឺរ៉ូនៅទីក្រុងBruxelles នេះ ក៏មានកម្មវត្ថុផងទៀត៖
-ជួយធ្វើឲ្យទីផ្សារហិរញ្ញវត្ថុមានទំនុកចិត្តកក់ក្តៅ។
-ជួយបញ្ចៀសកុំឲ្យវិបត្តិសេដ្ឋកិច្ចនិងវិបត្តិហិរញ្ញវត្ថុឆ្លងរាលដាលដូចកាលនៅនិទាឃៈរដូវមុននាឱកាសវិបត្តិហិរញ្ញវត្ថុនៅប្រទេសក្រិកដែលហៀបតែធ្វើឲ្យតំបន់អឺរ៉ូស្គាល់ការរង្គោះរង្គើសឹងតែក្សិនក្ស័យ។ តំបន់អឺរ៉ូដែលបានចាប់កកើតនៅឆ្នាំ១៩៩៩។
បច្ចុប្បន្ននេះ រដ្ឋាភិបាលអៀរឡង់នៅតែពុំយល់ព្រមទទួលយកជំនួយពីសហភាពអឺរ៉ុប។ ហអៀរឡង់ឆ្លៀតឱកាសមានជំនួបប្រជុំនៃរដ្ឋមន្ត្រីក្រសួងហិរញ្ញវត្ថុនៃតំបន់អឺរ៉ូនៅទីក្រុងBruxelles នៅថ្ងៃអង្គារនេះដើម្បីធ្វើឲ្យទីផ្សារហិរញ្ញវត្ថុមានទំនុកចិត្តកក់ក្តៅឡើងវិញ។
មូលហេតុដែលនាំឲ្យរដ្ឋាភិបាលអៀរឡង់ពុំចង់បានជំនួយពីសហភាពអឺរ៉ុបមានពីរ៖
ទី១-អ្នកដឹកនាំប្រទេសអៀរឡង់យល់ថា គេនៅមានសមត្ថភាពគ្រប់គ្រាន់នឹងដោះស្រាយបញ្ហាហិរញ្ញវត្ថុដោយខ្លួនឯងដោយពុំចាំបាច់ត្រូវការជំនួយពីបរទេស។
ទី២- រដ្ឋាភិបាលអៀរឡង់យល់ថា មានអន្តរាគមន៍ពីបរទេសអាចធ្វើឲ្យទីក្រុងDublin បាត់បង់អធិបតេយ្យរបស់ខ្លួនដែលជាការមួយពិបាកទទួលយកបានសម្រាប់ប្រទេសអៀរឡង់។
សូមគូសបញ្ជាក់ថា កាលពីសប្តាហ៍មុន គេបានឃើញអត្រាការប្រាក់បំណុលអៀរឡង់បានស្ទុះកើនឡើងដល់កម្រិតមួយដ៏សែនខ្ពស់ពុំដែលកើតមាន។ អ្នកវិនិយោគទុនឯកជនបាននាំគ្នាលក់ចេញនូវប័ណ្ណរតនាគារអៀរឡង់ ដោយហេតុតែពូកគេមានការបារម្ភភ័យខ្លាចរដ្ឋាភិបាលអៀរឡង់គ្មានលទ្ធភាពនឹងរិះរកដំណោះស្រាយឲ្យបញ្ហាប្រាក់បំណុលសាធារណៈអៀរឡង់ដែលមានចំនួនច្រើនមហិមា។ បច្ចុប្បន្ននេះ ប្រាក់បំណុលសាធារណៈអៀរឡង់មានដល់ទៅ៣២%នៃផលិតផលដុលក្នុងប្រទេស ទាំងនេះដោយហេតុតែរដ្ឋអៀរឡង់បានយកប្រាក់យ៉ាងច្រើនសន្ធឹកសន្ធាប់ទៅធ្វើអន្តរាគមន៍ជួយទប់ទល់កុំឲ្យធនាគារអៀរឡង់ជួបនឹងសភាពក្ស័យធន។
គួរកត់សម្គាល់ថា ប្រទេសសមាជិកនៃតំបន់អឺរ៉ូកំពុងជួយបារម្ភយ៉ាងខ្លាំងពីស្ថានភាពហិរញ្ញវត្ថុនៃប្រទេសជាសមាជិកខ្លះដូចជាប្រទេសព័រទុយហ្កាល់ ប្រទេសក្រិក ឬប្រទេសអេស្ប៉ាញដែលមានប្រាក់បំណុលសាធារណៈយ៉ាងច្រើនមហិមាពុំសូវខុសពីស្ថានភាពអៀរឡង់ឡើយ។ នៅពេលថ្មីៗនេះ រដ្ឋមន្ត្រីក្រសួងហិរញ្ញវត្ថុនៃប្រទេសព័រទុយហ្កាល់ លោកFernando Teixeira dos Santos បានថ្លែងឲ្យដឹងពីស្ថានភាពហិរញ្ញវរ្ថុដ៏ដុនដាបនៃប្រទេសព័រទុយហ្កាល់ហើយបានបញ្ជាក់ថាព័រទុយហ្កាល់ត្រូវតែសុំជំនួយពីសហភាពអឺរ៉ុបដើម្បីគេចចៀសឲ្យផុតពីវិបត្តិ។
ចំណែកឯប្រទេសក្រិកឯណោះវិញ កំពុងធ្វើការចរចាជាមួយម្ចាស់បំណុលអឺរ៉ុបសុំពន្យារពេលសម្រាប់សងប្រាក់បំណុលរបស់ខ្លួន។ ប្រាក់បំណុលដែលប្រទេសក្រិកបានសុំខ្ចីកាលពីខែឧសភាមុនពីតំបន់អឺរ៉ូនិងពីមូលនិធិរូបិយវត្ថុអន្តរជាតិFMI ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ