ប្រទេសជាសមាជិកទំាង២៧ប្រទេសបានអនុម័តមូលនិធិបម្រុងមានទឹកប្រាក់ ៧៥ម៉ឺនលានអឺរ៉ូ
រដ្ឋមន្រ្តីក្រសួងហិរញ្ញវត្ថុទំាង២៧ រូបរបស់សហភាពអឺរ៉ុបដែលបានជួបប្រជុំគ្នាកាលពីយប់ថ្ងៃចន្ទ ទី៧ មិថុនា ឆ្នំា ២០១០ នៅក្នុងប្រទេសលុចសំបួរ បានអនុម័តមូលនិធិបម្រុងមានទឹកប្រាក់ ៧៥ម៉ឺនលានអឺរ៉ូ និងព្រមព្រៀងគ្នាបង្កើតឲ្យមានអភិបាលកិច្ចសេដ្ឋកិច្ចរួមមួយ។ គោលដៅ គឺដើម្បីព្យាយាមជួយស្រោចស្រង់តម្លៃប្រាក់អឺរ៉ូដែលកំពុងបន្តចុះ ថ្លៃនៅចំពោះមុខប្រាក់ដុល្លារអាមេរិកំាង និងរំងាប់ភាពជ្រួលច្របល់នៅលើទីផ្សារភាគហ៊ុន។ ជាមួយគ្នានេះ អឺរ៉ុបក៏គ្រោងនឹងដាក់ទណ្ឌកម្មលើសមាជិកណាដែលមិនព្រមគោរពតាម សន្ធិសញ្ញារួមរបស់អឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
បន្ទាប់ពីបានជជែកដេញដោលគ្នាយ៉ាងតានតឹងអស់ជាច្រើនម៉ោង មក រដ្ឋមន្រ្តីក្រសួងហិរញ្ញវត្ថុទំាង២៧រូបរបស់សហភាពអឺរ៉ុបបាន ព្រមព្រៀងគ្នាបង្កើតឲ្យមានអភិបាលកិច្ចសេដ្ឋកិច្ចរួមមួយ។ ដំបូង មានសមាជិកជាច្រើន ពិសេស ប្រទេសដែលចាយប្រាក់អឺរ៉ូមិនចង់ឲ្យមាន ភិបាលកិច្ចសេដ្ឋកិច្ចរួមទេ។ តែកាលៈទេសៈនៃស្ថានភាពប្រាក់អឺរ៉ូ និងស្ថានភាពហិរញ្ញអឺរ៉ុបបានបង្ខំឲ្យទំាងអស់គ្នាទទួលយក។ យ៉ាងណាក៏ដោយ អភិបាលកិច្ចសេដ្ឋកិច្ចរួមនៅតែជាគ្រោងឆ្អឹងនៅឡើយ ព្រោះគេនៅមិនទាន់បានលំអិតអំពីខ្លឹមសារ របៀបវារៈ កាលវិភាគ និងសមាសភាព។
និយាយពីចំណុចវិជ្ជមានវិញ កិច្ចប្រជុំបានអនុម័តជាផ្លូវការលើកិច្ចព្រមព្រៀងក្នុងការបង្កើត មូលនិធិរួមមួយដែលមានទឹកប្រាក់បម្រុងចំនួន ៧៥ម៉ឺនលានអឺរ៉ូ និងដែលគេឲ្យឈ្មោះជាផ្លូវការថា « មូលនិធិដើម្បីស្ថិរភាពហិរញ្ញវត្ថុអឺរ៉ុប »។ គឺជាប្រាក់បម្រុងទុកសម្រាប់ជួយសង្គ្រោះប្រទេសសមាជិកនៅក្នុង តំបន់ចាយប្រាក់អឺរ៉ូដែលជួបវិបត្តិខ្វះប្រាក់បង្វិល។
នៅក្នុងចំនួនទឹកប្រាក់ទំាង ៧៥ម៉ឺនលានអឺរ៉ូ មាន ៥០ម៉ឺនលានអឺរ៉ូជាការរួមចំណែករបស់ប្រទេសសមាជិកសហភាពអឺរ៉ុប និងនៅសល់ ២៥ម៉ឺនលានអឺរ៉ូ ជាការរួមចំណែករបស់មូលនិធិរូបិយវត្ថុអន្តរជាតិ។ មូលនិធិរួមរបស់សហភាពអឺរ៉ុបដែលមានទឹកប្រាក់ចំនួន ៥០ម៉ឺនលានអឺរ៉ូត្រូវបានគេចែកចេញជាពីរផ្នែក ទីមួយ៖ គឺទឹកប្រាក់ចំនួន ៦ម៉ឺនលានអឺរ៉ូដែលជាប្រាក់កម្ចីរបស់គណៈកម្មការអឺរ៉ុប និងចំនួន ៤៤ម៉ឺនលានអឺរ៉ូ ជាការរួមចំណែករបស់ប្រទេសសមាជិកនៅក្នុងតំបន់ចាយប្រាក់អឺរ៉ូ។
ជាគោលការណ៍ « មូលនិធិដើម្បីស្ថិរភាពហិរញ្ញវត្ថុអឺរ៉ុប » នឹងអាចចាប់ផ្តើមអនុវត្តន៍ក្នុងរង្វង់ខែមិថុនា និងតាមគម្រោង ប្រទេសចាយប្រាក់អឺរ៉ូដែលកំពុងជួបវិបត្តិក្ស័យធនអាចនឹងទទួលបាន ប្រាក់កម្ចីរហូតដល់ ៤៤លានអឺរ៉ូ។ ជាប្រាក់កម្ចីដែលមានការប្រាក់ និងមានលក្ខខណ្ឌត្រឹមត្រូវ។
ទណ្ឌកម្មថ្មី ចំពោះសមាជិករឹងរូស
ជាមួយនឹងកិច្ចព្រមព្រៀងថ្មី សហភាពអឺរ៉ុបបានចាប់បង្ខំឲ្យសមាជិកគោរពតាមសន្ធិសញ្ញារួមដែលមាន ស្រាប់។ រដ្ឋមន្រ្តីក្រសួងហិរញ្ញវត្ថុទំាង២៧រូបបានព្រមព្រៀងគ្នាបង្កើត ឲ្យមានទណ្ឌកម្មថ្មីៗទៀតប្រឆំាងនឹងសមាជិកណាដែលទុកបណ្តោយឲ្យ ឱនភាពថវិកានិងបំណុលរបស់ខ្លួនកើនជ្រុសហួស។ គេនៅមិនទាន់បានកំណត់ច្បាស់អំពីប្រភេទទណ្ឌកម្មថ្មីទេ តែរដ្ឋមន្រ្តីក្រសួងហិរញ្ញវត្ថុទំាង២៧រូបបានដាក់សំណើមួយចំនួនទៅ កាន់គណៈកម្មការអឺរ៉ុបមានដូចជា បញ្ឈប់ ឬមួយក៏ព្យួរប្រាក់ឧបត្ថម្ភធនដល់សមាជិករឹងរូសដែលបន្តរំលោភលើ សន្ធិសញ្ញារួមអឺរ៉ុប។ មួយវិញទៀត រដ្ឋមន្រ្តីក្រសួងហិរញ្ញវត្ថុទំាង២៧រូបក៏បានផ្តល់សិទ្ធិឲ្យ គណៈកម្មការអឺរ៉ុបត្រួតពិនិត្យមើលគម្រោងថវិកាជាតិរបស់ប្រទេសជា សមាជិកនីមួយៗជាមុនសិន មុននឹងសភារបស់ប្រទេសនោះអនុម័តទទួលយក។ នេះជារឿងថ្មីមួយដែលពីពេលមុន មានប្រទេសមួយចំនួន ពិសេសអាឡឺម៉ង់ និងបារំាងធ្លាប់បានជំទាស់យ៉ាងខ្លំាង។ ទីក្រុងប៉ារីសធ្លាប់បានប្រកាសក្តែងៗថា មិនមែនគណៈកម្មការអឺរ៉ុបទេ ជាអ្នកសម្រេចគម្រោងថវិកាជាតិរបស់ប្រទេសបារំាងនោះ។
ជារួមទៅ សហភាពអឺរ៉ុបរិះរកវិធានការគ្រប់បែបយ៉ាងដើម្បីចាប់បង្ខំប្រទេសជា សមាជិកឲ្យវិលមកគោរពតាមកតិកាសញ្ញាស្ថិរភាពរួមរបស់អឺរ៉ុប។ កតិកាសញ្ញាស្ថិរភាពបានចែងយ៉ាងច្បាស់ថា ប្រទេសសមាជិកនីមួយៗមិនត្រូវឲ្យមានឱនភាពថវិកាលើសពី ៣%នៃផលិតផលក្នុងស្រុកសរុបនិងក៏មិនត្រូវឲ្យមានប្រាក់បំណុលលើស ពី៦០%នៃផលិតផលក្នុងស្រុកសរុប។ គួរជម្រាបជូនថា ជាង ១០ឆ្នំាកន្លងទៅនេះ ប្រទេសអឺរ៉ុបសឹងតែទំាងអស់មិនបានអនុវត្តន៍ត្រឹមត្រូវនូវ គោលការណ៍រួមនោះទេ។ មានប្រទេសជាច្រើនបានទុកបណ្តោយឲ្យឱនភាពថវិការបស់ខ្លួនបន្តកើនឡើង និងចាយលុយហួសពីសមត្ថភាពរបស់ខ្លួនរហូតដល់ជំពាក់បំណុលគេវ័នក គ្មានលទ្ធភាពសង ដូចករណីប្រទេសក្រិកនាពេលបច្ចុប្បន្ន។
ឃើញថា តាមរយៈវិធានការថ្មីចុងក្រោយនេះបានធ្វើឲ្យតម្លែប្រាក់អឺរ៉ូនៅ ថ្ងៃអង្គារ ទី ៨ មិថុនា ឆ្នំា ២០១០ ងើបឡើងវិញបន្តិច (១អឺរ៉ូដូរបាន ១ដុល្លារ ២០សេន) បើប្រៀបនឹងថ្ងៃម្សិលមិញ រីឯស្ថានភាពនៅផ្សារភាគហ៊ុនក៏ហាក់ដូចជាគ្រាន់បើបន្តិចដែរ។ សំណួរដែលចោទ តើវិធានការទំាងអស់នឹងអាចផ្តល់ប្រសិទ្ធិភាពកំរិតណា ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ