ធនាគារពិភពលោក ៖ កម្ពុជាជាប្រទេសរីកលូតលាស់លឿនបំផុតមួយ
របាយការណ៍ស្តីពីបច្ចុប្បន្នភាពនៃប្រតិបត្តិការនិងកំណែទម្រង់សេដ្ឋកិច្ចប្រចាំខែឧសភា ឆ្នាំ២០១២ របស់របស់ធនាគារពិភពលោកដែលត្រូវបានដាក់បង្ហាញនៅថ្ងៃពុធនេះបានបង្ហាញថា សេដ្ឋកិច្ចកម្ពុជាកំពុងបន្តកើនឡើងខ្ពស់ដោយសារតែការកើនឡើងនៃវិស័យឯកជន ដូចជាវិស័យកាត់ដេរសម្លៀកបំពាក់ និងវិស័យកសិកម្មជាដើម។ កំណើនផលិតផលក្នុងស្រុកសរុបត្រូវគេរំពឹងថានឹងមានកំណើន ៦,៦ % ក្នុងឆ្នាំ២០១២នេះ។
ចុះផ្សាយនៅថ្ងៃ៖
ស្តាប់ - ០២:៣៧
កម្ពុជាជាប្រទេសមួយក្នុងចំណោមបណ្តាប្រទេសដែលកំពុងរីកលូតលាស់លឿនបំផុតនៅក្នុងពិភពលោក។ នេះជាការវាយតម្លៃប្រកបដោយភាពវិជ្ជមានរបស់ធនាគារពិភពលោកចំពោះកំណើនសេដ្ឋកិច្ចនៅកម្ពុជា។ នៅក្នុងរបាយការណ៍ស្តីពីបច្ចុប្បន្នភាពនៃប្រតិបត្តិការ និងកំណែទម្រង់សេដ្ឋកិច្ច ប្រចាំខែឧសភាឆ្នាំ២០១២ ដែលចេញផ្សាយជាសាធារណៈនៅថ្ងៃពុធនេះ ធនាគារពិភពលោកបានព្យាករណ៍ថា សេដ្ឋកិច្ចកម្ពុជានៅតែបន្តកើនឡើងក្នុងកម្រិតខ្ពស់។
របាយការណ៍បានបង្ហាញឲ្យដឹងថា ផលិតផលសរុបក្នុងស្រុកពិតរបស់កម្ពុជាបានកើនឡើង ៦,៩% ក្នុងឆ្នាំ២០១១ និងបន្តកើនក្នុងកម្រិត ៦,៦% ក្នុងឆ្នាំ ២០១២ នេះ។
ធនាគារពិភពលោកបានឲ្យដឹងទៀតថា ក្នុងរយៈពេល១០ឆ្នាំចុងក្រោយនេះសេដ្ឋកិច្ចកម្ពុជាមានកំណើនជាមធ្យម ៨% ។ ប៉ុន្តែ ចាប់ពីឆ្នាំ២០១១មក កំណើនសេដ្ឋកិច្ចកម្ពុជាមានសន្ទុះខ្លាំងបើទោះបីជាប្រទេសនេះជួបគ្រោះទឹកជំនន់ដ៏ខ្លាំងក្លាដែលធ្វើឲ្យខូចខាតវិស័យកសិកម្មយ៉ាងធ្ងន់ធ្ងរក៏ដោយ តែកំណើនសេដ្ឋកិច្ចកម្ពុជាមានកម្រិតខ្ពស់ជាងការរំពឹងទុក។ នេះជាលទ្ធផលនៃការស្តារឡើងវិញនៃវិស័យកសិកម្មក្រោយការបំផ្លិចបំផ្លាញ។ វិស័យកសិកម្មកម្ពុជាកើនឡើង ៣,៣% ក្នុងឆ្នាំ២០១១ ធៀបនឹងការព្យាករណ៍ដំបូងដែលមានត្រឹម ១,៥%។ ការកើនឡើងខ្លាំងនៃការនាំចេញខាងផ្នែកវិនិយោគឯកជននិងការប្រើប្រាស់ក៏ជាផ្នែកមួយនៃកំណើនសេដ្ឋកិច្ចដ៏ខ្លាំងដែរ។
ដោយឡែក ហានិភ័យនៃផលប៉ះពាល់ដែលបណ្តាលមកពីការស្រុតចុះនៃសេដ្ឋកិច្ចអាមេរិក និងអឺរ៉ុបដែលជាគោលដៅធំបំផុតសម្រាប់ការនាំចេញផលិតផលសម្លៀកបំពាក់ និងវាយនភណ្ឌរបស់កម្ពុជានោះនៅមិនទាន់កើតមាននៅឡើយទេរហូតមកទល់ពេលនេះ។ ការនាំចេញទំនិញក្នុងឆ្នាំ២០១១បានកើនឡើង ៣៦% និងការនាំចេញសម្លៀកបំពាក់និងផលិតផលវាយនភណ្ឌមានកំណើន ៣២% ដែលធ្វើឲ្យទំហំទឹកប្រាក់កើនដល់៤០០០លានដុល្លារ។
របាយការណ៍បង្ហាញទៀតថា ការនាំចេញសម្លៀកបំពាក់ទំនងជាទទួលបានអត្ថប្រយោជន៍ពីការផ្លាស់ប្តូរចរន្តនៃវិស័យឧស្សាហកម្មពីការប្រើកម្លាំងពលកម្មច្រើននៅប្រទេសចិនមកកាន់បណ្តាប្រទេសដែលប្រាក់ខែកម្មករមានកម្រិតទាបដូចជាកម្ពុជា។ ទំនងជាដោយសារហេតុផលនេះហើយបានជារោងចក្រកាត់ដេរនៅកម្ពុជាមានកំណើន១៨%កាលពីឆ្នាំ២០១១ កន្លងទៅ។
កាលពីថ្ងៃទី១១ឧសភា គណៈកម្មការសេដ្ឋកិច្ចនិងសង្គមប្រចាំតំបន់អាស៊ីប៉ាស៊ីហ្វិករបស់អង្គការសហប្រជាជាតិហៅកាត់ថា UN-ESCAP ក៏បានព្យាករណ៍ដែរថា នៅឆ្នាំ២០១២នេះសេដ្ឋកិច្ចប្រទេសកម្ពុជាមានកំណើន ៦,៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ