ហ្វីលីពីន ៖ អាមេរិកជួយធ្វើប្រតិបត្តិការយោធារំដោះក្រុងម៉ារ៉ាវី ពីពួកជីហាតស្និទ្ធនឹងរដ្ឋអ៊ីស្លាម
ហ្វីលីពីនរបស់លោក ឌុយទែរតេ មិនត្រូវការអាមេរិកទេ ! ប៉ុន្តែនៅពេលនេះ ប្រឈមនឹងការគំរាមកំហែងពីសំណាក់ពួកអ៊ីស្លាមជ្រុលនិយម បានស្នើសុំជំនួយពីកងកម្លាំងពិសេសអាមេរិក ដើម្បីរំដោះក្រុងម៉ារ៉ាវី ក្រុងភាគខាងត្បូងប្រទេស ដែលធ្លាក់ក្នុងកណ្តាប់ដៃពួកអ៊ីស្លាមជ្រុលនិយមស្និទ្ធនឹងអង្គការរដ្ឋអ៊ីស្លាម។ នេះបើតាមសេចក្តីប្រកាសរបស់ស្ថានទូតអាមេរិក និងយោធាហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
កងទ័ពអាមេរិកចូលជួយមែន ប៉ុន្តែ ជាជំនួយបច្ចេកទេសតែប៉ុណ្ណោះ ! កងកម្លាំងទ័ពពិសេសអាមេរិក មិនចូលសមរភូមិប្រយុទ្ធទេ ! នេះបើតាមការគូសបញ្ជាក់លម្អិតរបស់យោធាហ្វីលីពីន នៅក្នុងសន្និសីទកាសែត។
យន្តហោះស៊ើបការណ៍អាមេរិក P៣ Orion បានចេញហោះឆ្វែលលើក្រុងម៉ារ៉ាវី តាំងពីល្ងាចថ្ងៃសុក្រមក។ ម៉ារ៉ាវី ក្រុងភាគខាងត្បូងប្រទេស នៃកោះមីនដាណាវ បានធ្លាក់ក្នុងកណ្តាប់ដៃពួកយុទ្ធជនប្រដាប់អាវុធអ៊ីស្លាមជ្រុលនិយម តាំងពីជាងបីសប្តាហ៍មកហើយ។ ពួកប្រដាប់អាវុធនេះ ដែលមានកម្លាំងរាប់រយនាក់ បានប្រកាសភ្ជាប់ខ្លួន នៅនឹងអង្គការរដ្ឋអ៊ីស្លាម ក្នុងនោះមានទាហានជីហាតរដ្ឋអ៊ីស្លាមសិបនាក់ ធ្វើដំណើរមកពីប្រទេសជិតខាង ដូចជាឥណ្ឌូណេស៊ី ឬម៉ាឡេស៊ី និងមកពីតំបន់ដើមបូព៌ា។
ប្រឈមនឹងស្ថានការណ៍បែបនេះ ហ្វីលីពីន បានសម្តែងការព្រួយបារម្ភខ្លាំង ខ្លាចក្រុមនេះពង្រីកវត្តមាន និងយកក្រុងម៉ារ៉ាវីជាទីតាំង សម្រាប់បំផុសមនោគមវិជ្ជាជីហាតអ៊ីស្លាមនិកាយស៊ុននីត រដ្ឋអ៊ីស្លាមប្រចាំតំបន់អាស៊ីអាគ្នេយ៍។ អាជ្ញាធរហ្វីលីពីនបានចេញធ្វើ ប្រតិបត្តិការកម្ចាត់តាំងពីដំបូងភ្លាម តែងជួបបរាជ័យរហូតមក។ នៅទីបំផុតក៏សុខចិត្តទទួលយកជំនួយពីអាមេរិក។
ជំនួយដែលបានប្រព្រឹត្តទៅបន្ទាប់ពីមានភាពតានតឹង តាំងពីជាច្រើនខែរវាងសហរដ្ឋអាមេរិកនិងហ្វីលីពីន ដោយហេតុតែតាំងពីបានជាប់ឆ្នោតក្លាយប្រធានាធិបតីហ្វីលីពីនមក លោក ឌុយទែរតេ បានបង្ហាញកាយវិការងាករេ ផ្តាច់ទំនាក់ទំនងល្អជាប្រពៃណីជាមួយវ៉ាស៊ីនតោន ដោយសុខចិត្តទៅអោបចិន ដើម្បីប្រយោជន៍សេដ្ឋកិច្ច ហើយបានប្រកាសសន្យាបណ្តេញទ័ពអាមេរិកឱ្យអស់ចេញពីប្រទេស។
ហ្វីលីពីនធ្លាប់ជាសម្ព័ន្ធមិត្តដ៏សំខាន់របស់អាមេរិកប្រចាំតំបន់។ នៅឆ្នាំ២០០២មក វ៉ាស៊ីនតោន បានពង្រាយកម្លាំងទ័ពពិសេសរបស់ខ្លួន ប្រមាណជា១២០០នាក់ នៅកោះមីដាណាវ ដើម្បីបំពាក់បំប៉ននិងធ្វើជាទីប្រឹក្សារបស់កងទ័ពហ្វីលីពីន ក្នុងការប្រយុទ្ធប្រឆាំងនឹងពួកប្រដាប់អាវុធអ៊ីស្លាមជ្រុលនិយម អាប៊ូសាយ៉ាហ្វ។ អាមេរិកបានបញ្ឈប់ប្រតិបត្តិការនេះ នៅឆ្នាំ២០១៥ ដោយរក្សាទុកតែកងកម្លាំងពិសេសតូចមួយ សម្រាប់ផ្គត់ផ្គង់ជំនួយ និងផ្តល់ការគាំទ្រផ្នែកបច្ចេកទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ