នេប៉ាល់បោះឆ្នោតឃុំសង្កាត់ជាលើកទីមួយ
នៅថ្ងៃអាទិត្យទី ១៤ ឧសភានេះ បណ្តាជននេប៉ាល់ ត្រូវចូលរួមបោះឆ្នោតឃុំសង្កាត់ជាលើកទីមួយ គិតចាប់តាំងពី២០ឆ្នាំមក។ តាំងពីឆ្នាំ១៩៩៧មក នេប៉ាល់ ធ្លាក់ក្នុងសង្គ្រាមស៊ីវិល អូសបន្លាយពេលអស់ជាយូរខែឆ្នាំ។ សង្គ្រាមបានចប់ នេប៉ាល់បន្តហែកហួរនយោបាយ ក្នុងការធ្វើកំណែទម្រង់រដ្ឋធម្មនុញ្ញ ជាហេតុធ្វើឱ្យស្ថាប័នប្រជាធិបតេយ្យត្រូវជាប់គាំង។ គេរង់ចាំថ្ងៃបោះឆ្នោតនេះណាស់ ព្រោះវាអាចជាតំណាងនៃការបិទបញ្ចប់ភាពនិច្ចលនិយមរបស់នេប៉ាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
មេឃុំ ចៅសង្កាត់នេប៉ាល់ ដែលបានជាប់ឆ្នោតចុងក្រោយគេបំផុត គឺឆ្នាំ១៩៩៧ ! បន្ទាប់មកប្រទេសក៏ធ្លាក់ក្នុងសង្គ្រាមស៊ីវិល ជាមួយពួកម៉ៅនិយម ហើយអាណត្តិរបស់មេឃុំ និងចៅសង្កាត់ទាំងនោះមិនត្រូវបានប្តូរថ្មីទេ។ ជាមួយនឹងការដួលរំលំនៃរបបរាជានិយម នៅឆ្នាំ២០០៦ នេប៉ាល់ បានធ្លាក់ផុងក្នុងវិបត្តិនយោបាយ ! ប្រទេសត្រូវជាប់គាំង ការធ្វើកំណែទម្រង់រដ្ឋធម្មនុញ្ញទើបអាចសម្រេចចេញជារូបរាងបាននៅឆ្នាំ២០១៥ប៉ុណ្ណោះ។
ក្នុងរយៈពេលជាង១៥ឆ្នាំកន្លងមកនេះ ភូមិឃុំសង្កាត់ ត្រូវគ្រប់គ្រងចាត់ចែងតាមរបៀបការិយាល័យនិយម ដែលគ្មានអ្វីគួរឱ្យខ្លាចក្រែងរអាចិត្តពលរដ្ឋឡើយ។ ដូច្នេះអំពើពុករលួយបានស៊ីរ៉ូងពេញថ្នាក់មូលដ្ឋាន។ ចៅសង្កាត់ មេឃុំ មេភូមិ ធ្វើការចែកចាយមូលនិធិគ្នា ដោយមិនខ្វល់នឹងចុះធ្វើការផ្ទាល់ជាមួយពលរដ្ឋឡើយ។ ឧក្រិដ្ឋជនបានឆ្លៀតឱកាសគ្រប់បែបយ៉ាង។ សម្រាប់អ្នកវិភាគជាសាស្ត្រាចារ្យវិទ្យាសាស្ត្រនយោបាយនៅសាកលវិទ្យាល័យទ្រីភូវ៉ាន់នេប៉ាល់ អំពើពុករលួយនេះគឺជាដើមហេតុដ៏ចំបងមួយនាំឱ្យយុវជនយុវតីនេប៉ាល់ ធ្វើចំណាកស្រុក ទាំងហ្វូងៗ ទៅបរទេស។ បើតាមចំណាត់ថ្នាក់របស់ Tansparency Internationalនេប៉ាល់ជាប់លំដាប់លេខ១៣១ ក្នុងចំណោម១៧៩ប្រទេស ខាងមានអំពើពុករលួយ។
នៅថ្ងៃនេះ នេប៉ាល់បានឃើញពន្លឺថ្មី ! ដោយអាចសម្រេចរៀបចំការបោះឆ្នោតជ្រើសរើសឃុំសង្កាត់បាន។ ការបោះឆ្នោតដែលអាចនឹងប្តូរនិន្នាការចាស់ តាមសម្រួល និងដោយបន្តិចម្តងៗ ព្រោះបើតាមរដ្ឋធម្មនុញ្ញថ្មី មេឃុំចៅសង្កាត់ នឹងមានឯករាជភាពធំខាងផ្នែកថវិកា ដែលអាចផ្តល់សន្ទុះដល់ការអភិវឌ្ឍន៍ភូមិស្រុក និងជាពិសេសរដ្ឋធម្មនុញ្ញាបានកំណត់កូតាឱ្យមានស្ត្រីចំនួនពាក់កណ្តាលជាអ្នកឈរឈ្មោះធ្វើមេឃុំចៅសង្កាត់។ ជាមួយនឹងច្បាប់បែបនេះ នេប៉ាល់ទំនងជាងអាចប្តូរមុខមាត់ថ្នាក់ដឹកនាំមូលដ្ឋានថ្មីបានច្រើន។ នេះក៏ជាវិញ្ញាសាតេស្ត ! បន្ទាប់ពីការបោះឆ្នោតក្រុមប្រឹក្សាឃុំសង្កាត់ នេប៉ាល់នឹងរៀបចំការបោះឆ្នោតជាតិនៅដើមឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ