លោក ដូណាល់ ត្រាំ ទូរស័ព្ទអញ្ជើញ លោក ឌុយទែរតេ ទៅលេងវ៉ាស៊ីនតោន
នៅក្នុងកិច្ចសន្ទនាតាមទូរស័ព្ទជាមួយសមភាគីហ្វីលីពីន នៅថ្ងៃសៅរ៍ម្សិលមិញ ដែលផ្តោតទៅលើវិបត្តិនៅឧបទ្វីបកូរ៉េ និងអំពីតួនាទីរបស់សមាគមន៍ប្រជាជាតិអាស៊ីអាគ្នេយ៍ (អាស៊ាន) ក្នុងផ្នែកសន្តិសុខ ប្រធានាធិបតីអាមេរិក លោក ដូណាល់ ត្រាំ បានអញ្ជើញ លោក ឌុយទែរតេ ឱ្យទៅបំពេញទស្សនកិច្ចនៅវ៉ាស៊ីនតោន។
ចុះផ្សាយនៅថ្ងៃ៖
លោក ឌុយទែរតេ រងការរិះគន់ពីបណ្តាថ្នាក់ដឹកនាំពិភពលោកជាច្រើនណាស់ ចំពោះពាក្យសំដីនិងទង្វើបោសសម្អាតបង្អូរឈាមជំនួញគ្រឿងញៀន។ ទំនាក់ទំនងទ្វេភាគី ហ្វីលីពីន-អាមេរិក ក៏បានធ្លាក់ចុះដុនដាបជាលំដាប់ តាំងពីលោកបានជាប់ឆ្នោតក្លាយជាប្រធានាធិបតីមក ព្រោះលោក ឌុយទែរតេ បានតាំងខ្លួនដោយចំហថាជាអ្នកសង្គមនិយម និងបានប្តូរទិសដៅនយោបាយជាតិខិតទៅរកក្រុងប៉េកាំង និងម៉ូស្គូ។
ប៉ុន្តែនៅថ្ងៃនេះ ពេលនេះ ទំនាក់ទំនងទ្វេភាគីហាក់កំពុងមានភាពប្រសើរឡើង។ ប្រមុខរដ្ឋទាំងពីរ បានជជែកគ្នាតាមទូរស័ព្ទ នៅយប់មិញ ប្រកបដោយភាតរៈបំផុត ស្តីអំពីកង្វល់របស់អាស៊ានក្នុងវិស័យសន្តិសុខ ជាក់ស្តែងការគំរាមនុយក្លេអ៊ែរកូរ៉េខាងជើងមកលើតំបន់។ នេះបើតាមសេចក្តីថ្លែងការណ៍របស់សេតវិមាន។
លោក ត្រាំ និងលោក ឌុយទែរតេ ក៏បានពិភាក្សាគ្នាដែរអំពីសង្គ្រាមប្រឆាំងនឹងជួញដូរគ្រឿងញៀន ដែលបានសម្លាប់ជីវិតមនុស្សអស់រាប់ពាន់នាក់។ អង្គការ Amnesty International ព្រមទាំងអង្គការការពារសិទ្ធិមនុស្សផ្សេងៗជាច្រើនទៀត បានបរិហារឥតឈប់ទង្វើហិង្សាបង្ក្រាបការជួញដូរគ្រឿងញៀនហ្វីលីពីន តែរដ្ឋបាលអាមេរិករបស់លោកត្រាំ បានសម្តែងការពេញចិត្តយ៉ាងខ្លាំង ទើបអញ្ជើញលោកឌុយទែរតេឱ្យទៅបំពេញទស្សនកិច្ច នៅវ៉ាស៊ីនតោន។ អ្នកនាំពាក្យប្រធានាធិបតីហ្វីលីពីន បានបញ្ជាក់អំពីការអញ្ជើញរបស់អាមេរិកនេះ ប៉ុន្តែមិនបានលម្អិតអំពីកាលបរិច្ឆេទនៃដំណើរទស្សនកិច្ចនោះទេ។
លោកត្រាំក៏ពេញចិត្តនឹងកិច្ចសន្ទនាជាមួយលោក ឌុយទែរតេ និងថែមទាំងរីករាយនឹងចូលរួមក្នុងជំនួបកំពូលអាស៊ាន-អាមេរិក និងជំនួបកំពូលអាស៊ី នៅប្រទេសហ្វីលីននាខែវិច្ឆិកាខាងមុខ ដើម្បីបង្ហាញអំពីកិច្ចសន្យាដ៏មុះមុតរបស់អាមេរិកចំពោះតំបន់។
ធ្លាប់ស្ថិតក្រោមអាណានិគមអាមេរិក ហ្វីលីពីន មានទំនាក់ទំនងវប្បធម៌និងសេដ្ឋកិច្ចស្អិតល្មួតខ្លាំងណាស់ជាមួយអាមេរិក។ ប្រទេសទាំងពីរក៏បានចងភ្ជាប់គ្នាដោយសន្ទិសញ្ញាការពារគ្នាទៅមក ហើយកងកម្លាំងអាមេរិកបានជួយរក្សាសន្តិសុខហ្វីលីពីនតាំងពីរាប់ឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ