តុលាការកំពូលអាមេរិកអនុញ្ញាតសិទ្ធិររៀបអាពាហ៍ពិពាហ៍រវាងមនុស្សភេទដូចគ្នានៅទូទាំងប្រទេស
ចុះផ្សាយនៅថ្ងៃ៖
ស្តាប់ - ០៤:២៧
កាលពីសប្តាហ៍មុន តុលាការកំពូលអាមេរិកបានសំរេចផ្តល់សិទ្ធិរៀបអាពាហ៍ពិពាហ៍រវាងមនុស្សស្រលាញ់ភេទដូចគ្នានៅទូទាំងប្រទេស។ នេះជាសេចក្តីសម្រេច ប្រវត្តិសាស្រ្តរបស់សហរដ្ឋអាមេរិក បើទោះបីជាមានការចម្រូងចម្រាសយ៉ាងណាក៏ដោយ ពីសំណាក់ក្រុមអ្នកគាំទ្រ និងក្រុមអ្នកជំទាស់។ តើការតស៊ូមតិទាមទារសិទ្ធិអាពាហ៍ពិពាហ៍ភេទដូចគ្នា នៅអាមេរិកចំណាយពេលប៉ុន្មានឆ្នាំ? តើមានប្រតិកម្មបែបណាខ្លះជុំវិញប្រធានបទដ៏រសើបនេះ?
ភ្លាមៗ ក្រោយពីតុលាការកំពូលអាមេរិកចេញសេចក្តី សម្រេច ទង់ពណ៌ឥន្ធនូរ ព្រមជាមួយការបាញ់ភ្លើងពណ៌ឥន្ធនូរ ដែលជានិមិត្តរូបតំណាងអោយសហគមន៍អ្នកស្រលាញ់ភេទដូចគ្នានេះ ត្រូវបានដាក់លំអ នៅលើអគារតុលាការកំពូលអាមេរិក សេតវិមាន សាលាក្រុងញូវយ៉ក និងនៅតាមបណ្តាស្ថាប័នធំៗ ជាច្រើនកន្លែងផ្សេងទៀត។ ក្បូនដង្ហែមានមនុស្សរាប់ពាន់នាក់បានដើរស្រែកអបអរសាទរ នៅតាមបណ្តាទីក្រុងធំៗ នៅសហរដ្ឋអាមេរិក។
សាលដីការ ដែលគេទន្ទឹងរង់ចាំអស់រយៈពេលជាយូរយារមកហើយនេះ ជាការឆ្លើយតបដោយវិជ្ជមានទៅនឹងការតស៊ូមតិអស់រយៈពេល ៤០ ឆ្នាំ ក្នុងការទទួលស្គាល់សិទ្ធិស្មើគ្នា នៅសហរដ្ឋអាមេរិក។ សាលដីការនេះក៏បានបញ្ជាក់ផងដែរថា សិទ្ធិអាពាហ៍ពិពាហ៍ជាសិទ្ធិមូលដ្ឋានសំរាប់បុគ្គលគ្រប់រូប។ ស្ថាប័ននេះបានបញ្ចប់រាល់ការប៉ុនប៉ងរារាំង ពីសំណាក់ក្រុមប្រឆាំងនឹងអាពាហ៍ពិពាហ៍រវាងមនុស្សភេទដូចគ្នា ដោយយោងលើសេចក្តីអះអាងថា «វិសោធនកម្មទី ១៤ នៃរដ្ឋធម្មនុញ្ញសហរដ្ឋអាមេរិក តំរូវអោយរដ្ឋមួយមានសិទ្ធិអនុញ្ញាតអោយមានអាពាហ៍ពិពាហ៍រវាងមនុស្សភេទដូចគ្នា ដោយផ្អែកលើសា្មរតីនៃភាពស្មើគ្នារវាងមនុស្សគ្រប់រូប»។
សាលដីការដ៏ចម្រូងចម្រាស
សូមបញ្ជាក់ថា សាលដីការនេះបានធ្លាក់ចេញមក ក្រោយពីមានមនុស្សស្រលាញ់ភេទដូចគ្នាចំនួន ១៦ គូ មកពីរដ្ឋចំនួន ៤ បានដាក់ពាក្យបណ្តឹងជំទាស់នឹងការហាមឃាត់ ដែលបានដាក់កំហិតនៅតាមបណ្តារដ្ឋរបស់ពួកគេ។ ក្នុងចំណោមអង្គជំនុំជម្រះ ដែលមានចៅក្រមសរុបចំនួន ៩ រូប សាលដីការ ៥ សម្លេងទល់នឹង ៤ សម្លេងនេះ មិនត្រឹមតែផ្តល់សិទ្ធិអាពាហ៍ពិពាហ៍នេះនៅតាមរដ្ឋទាំង ៥០ ប៉ុណ្ណោះទេ ប៉ុន្តែ សាលដីការនេះក៏បានតំរូវអោយគ្រប់រដ្ឋនីមួយៗ នៅសហរដ្ឋអាមេរិក ព្រមទទួលស្គាល់សម្ព័ន្ធភាពរវាងមនុស្សភេទដូចគ្នា ដែលពួកគេបានបា្ររព្ធអាពាហ៍ពិពាហ៍ នៅតាមទីកន្លែងផ្សេងទៀតលើពិភពលោក។
ចៅក្រមមាននិន្នាការអភិរក្សនិយម លោក Anthony Kennedy គឺជាអ្នកធ្វើអោយជញ្ជីងសម្លេងផ្អៀងទៅភាគីម្ខាង ដោយគាំទ្រចៅក្រមមាននិន្នការសេរីនិយម ៤ រូបផ្សេងទៀត ដែលចង់អោយមានសម្ព័ន្ធភាពស្របច្បាប់ សំរាប់អ្នកស្រលាញ់ភេទដូចគ្នា។ សាលដីការនោះបានសង្កត់ធ្ងន់ថា “គ្មានសម្ព័ន្ធភាពណាដែលជ្រាលជ្រៅជាងអាពាហ៍ពិពាហ៍ឡើយ ព្រោះអាពាហ៍ពិពាហ៍នេះហើយស បញ្ជាក់ពីឧត្តមភាពនៃស្នេហា គ្រួសារ ភាពស្មោះស្ម័គ្រ ភាពស្អិតល្មួត និងការតស៊ូពលិកម្ម។ ដោយរួមគ្នាបង្កើតសម្ព័ន្ធភាព គូស្វាមីភរិយា មនុស្សពីររូបនឹងក្លាយជាអ្វីមួយ ដែលធំជាងអ្វី ដែលពួកគេធ្លាប់មានពីមុនមក។ អាពាហ៍ពិពាហ៍តំណាងអោយសេចក្តីសេ្នហា ដែលអាចស្ថិតស្ថេរ បើទោះបីជាគ្មាននរណាម្នាក់អាចចៀសផុតពីសេចក្តីស្លាប់ក៏ដោយ។ ជាការមិនគោរពគោលការណ៍អាពាហ៍ពិពាហ៍ ប្រសិនបើយើងមិនព្យាយាមយល់ពីអារម្មណ៍មនុស្សស្រីប្រុសទាំងនោះ។ ការតស៊ូមតិទាមទាររបស់ពួកគេ ជាការបង្ហាញអោយឃើញថា ពួកគេគោរពគោលការណ៍អាពាហ៍ពិពាហ៍។”
ចំណែកប្រធានតុលាការកំពូល លោក John Roberts និងចៅក្រមអភិរក្សនិយម ៣ រូបផ្សេងទៀតប្រកាន់ជំហរជំទាស់នឹងសាលដីការនេះ ដោយយោងលើអំណះអំណាងថា ការផ្តល់សិទ្ធិអាពាហ៍ពិពាហ៍ភេទដូចគ្នានេះ មិនមែនជាភារកិច្ចរបស់ចៅក្រមទេ។ គេគួរតែប្រគល់តួនាទីនេះអោយអ្នកតំណាងរាស្ត្រជាអ្នកបញ្ចេញមតិ។ ក្រុមចៅក្រមជំទាស់ទាំងនោះចាត់ទុកសាលដីការនេះថា រដ្ឋប្រហារតុលាការ។
ប្រតិកម្មនៅតាមបណ្តាញសង្គម
គួររំលឹកផងដែរថា មុនការចេញសេចក្តីសំរេចនេះ មានតែរដ្ឋចំនួន ៣៧ ប៉ុណ្ណោះនៅសហរដ្ឋអាមេរិកទទួលស្គាល់អាពាហ៍ពិពាហ៍ភេទដូចគ្នា។ កាលពីឆ្នាំ ២០០៤ Massachusetts គឺជារដ្ឋដំបូងគេបង្អស់ នៅសហរដ្ឋអាមេរិក ដែលបានផ្តល់សិទ្ធិអាពាហ៍ពិពាហ៍បែបនេះ។ ចាប់ពីពេលនោះហើយ ដែលការទាមទាររបស់សហគមន៍មនុស្សស្រលាញ់ភេទដូចគ្នា ចាប់ផ្តើមផ្លាស់ប្តូរយោបល់ និងការយល់ឃើញរបស់សាធារណជនទូទៅ។
កាលពីប្រមាណ ១០ ឆ្នាំមុន ពលរដ្ឋអាមេរិកប្រមាណ ៦០% ប្រឆាំងដាច់ខាតការផ្តល់សិទ្ធិអាពាហ៍ពិពាហ៍ដ៏ចំលែកនេះ។ អាពាហ៍ពិពាហ៍ភេទដូចគ្នាគឺ ជាប្រធានបទដ៏រសើប និងចម្រូងចម្រាសបំផុត ដែលបានពុះចែកមតិប្រជាពលរដ្ឋអាមេរិកជាពីរក្រុម។ ក្រុមម្ខាងគឺ ជាក្រុមអភិរក្សនិយម យោងលើអំណះអំណាងសីលធម៌សាសនា និងច្បាប់ធម្មជាតិ ដែលតំរូវមនុស្សប្រុសស្រីមានសម្ព័ន្ធភាពអាចបង្ករកំណើត។ ចំណែកក្រុមម្ខាងទៀតជាអ្នកសេរីនិយមទាមទារសិទ្ធិ និងការផ្លាស់ប្តូរ ដោយយោងទៅលើការវិវត្តន៍នៃសង្គមច្ចុប្បន្ន។
មិនយូរប៉ុន្មានក្រោយការប្រកាសសាលដីការនេះ ពណ៌ឥន្ធនូរបានវាយលុកពេញបណ្តាញសង្គម មានជាអាទិ៍ Facebook និង Twitter។ តាមរយៈគណនីយរបស់សេតវិមាន លោកប្រធានាធិបតី អូបាម៉ា បញ្ចេញមតិថា «ថ្ងៃនេះជាទិវាតំណាងអោយការបោះជំហានធំមួយឆ្ពោះទៅកាន់ភាពស្មើគ្នា»។ មិនត្រឹមតែប៉ុណ្ណោះ រលកពណ៌ឥន្ធនូរនេះក៏បានគ្របដណ្តប់ស្ទើរតែគ្រប់សារព័ត៌មានអាមេរិកទាំងអស់។ ក្រុមហ៊ុនធំៗមួយចំនួនក៏ឆ្លៀតឆក់យកឱកាសនេះប្តូរស្លាកសញ្ញារបស់ពួកគេ ដែលរំលេចដោយពណ៌ឥន្ធនូរ នៅតាមបណ្តាញសង្គម។ ក្រុមហ៊ុនដូចជា Jell-O, Starbuck, Kellogg's, Ben & Jerry, Red Bull, MasterCard និង AT&T ជាដើម សុទ្ធតែបានផ្ញើរសារគាំទ្រ តាមរយៈការប្រើពាក្យគន្លឹះ LoveWins។ លើសពីនេះ សូម្បីតែតារាល្បីដូចជា Lady Gaga, Miley Cyrus និង Neil Patrick Harris ជាដើម សុទ្ធតែបានសំដែងអំណរសារទចំពោះដំណឹងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ