តុលាការកំពូលយល់ព្រមឲ្យគូស្រករមានភេទដូចគ្នាទទួលបានសិទ្ធិស្មើភាព ដូចគូស្រករមានភេទខុសគ្នា
នៅថ្ងៃពុធ ទី២៦ មិថុនាម្សិលមិញ តុលាការកំពូលអាមេរិកំាងបានបោះឆ្នោតទាត់ចោលច្បាប់អាពាហ៍ពិពាហ៍ដែលបានបិទសិទ្ធិគូស្រករមានភេទដូចគ្នា។ យោងតាមចៅក្រមតុលាការកំពូល ច្បាប់អាពាពិហ៍ពិពាហ៍ដែលសភាបានអនុម័តក្នុងឆ្នំា ១៩៩៦ បានធ្វើឲ្យមានការប៉ះពាល់ដល់សិទ្ធិសេរីភាពមនុស្សទូទៅ។ នៅខាងសហគមន៍អ្នកស្រឡាញ់ភេទដូចគ្នា និងក្រុមអ្នកអភិរក្សនិយម ពួកគេបានទះដៃអបអរសាទរចំពោះសេចក្តីសម្រេចចិត្តរបស់តុលាការកំពូល តែត្រូវបានបរិហារដោយក្រុមអ្នកវិវត្តនិយម។
ចុះផ្សាយនៅថ្ងៃ៖
ស្តាប់ - ០២:១៨
ក្នុងឆ្នំា ១៩៩៦ សភាអាមេរិកំាងបានអនុម័តច្បាប់អាពាហ៍ពិពាហ៍មួយដែលបានកំណត់ថា មានតែអាពាហ៍ពិពាហ៍រវាងមនុស្សប្រុស និងមនុស្សស្រីទេដែលមានសិទ្ធិទទួលផលប្រយោជន៍សង្គមស្របច្បាប់។ ចំណែកគូស្រកររវាងមនុស្សប្រុស និងប្រុស ឬស្រី និងស្រីវិញ គឺមិនមានសិទ្ធិដូចគូស្រកររវាងមនុស្សប្រុស និងមនុស្សស្រីទេ។ កាលណោះ ច្បាប់នោះត្រូវបានលោកប្រធានាធីបតីអាមរិក Bill Clinton ប្រកាសដាក់ឲ្យប្រើប្រាស់។ បន្ទាប់មក លោកប្រធានាធិបតីបារ៉ាក់ អូបាម៉ាបច្ចុប្បន្នក៏បានមិនបានជំទាស់នឹងច្បាប់នោះដែរ។ គឺទើបតែនៅក្នុងឆ្នំា ២០១២ ចំសម័យយុទ្ធនាការឃោសនាបោះឆ្នោតប្រធានាធិបតីទេ ដែលលោកអូបាម៉ាមានបំណងចង់ឲ្យលប់ច្បាប់នោះចោលវិញ។
នៅសហដ្ឋអាមរិកសព្វថ្ងៃ មានរដ្ឋចំនួន ១២ ក្នុងចំណោមរដ្ឋទំាង ៥០ បានអនុញ្ញាតឲ្យមនុស្សស្រឡាញ់ភេទដូចគ្នាអាចរៀបការស្របច្បាប់។ តែជាមួយនឹងច្បាប់អាពាហ៍ពីពាហ៍អនុម័តក្នុងឆ្នំា ១៩៩៦ គូស្រករមានភេទដូចគ្នាទំាងពីរមិនមានសិទ្ធិទទួលផលប្រយោជន៍សង្គមដូចគូស្រករដែលមានភេទខុសគ្នាទេ។ ធ្ងន់ធ្ងរជាងនេះទៀត គូស្រករមានភេទដូចគ្នាត្រូវតែបង់ពន្ធលើសិទ្ធិទទួលមរតកនៅពេលណាដែលមានដៃគូមា្នក់របស់ខ្លួនទទួលមរណៈភាព។ ជាក់ស្តែងថ្មីៗនេះនៅក្នុងទីក្រុងញូយ៉ក ស្រ្តីស្រឡាញ់ភេទដូចគ្នាម្នាក់បានបង់ពន្ធជិត ៤០០ ០០០ម៉ឺនដុល្លារលើសិទ្ធិទទួលមរតកក្រោយការបាត់បង់ជីវិតដៃគូស្រីរបស់ខ្លួន។
តែទីបំផុតនៅថ្ងៃពុធ ទី២៦ មិថុនា មានចៅក្រម ៥នាក់ក្នុងចំណោមចៅក្រម ៩នាក់នៅតុលាការកំពូល បានបោះឆ្នោតលុបច្បាប់នោះចេញវិញដោយសំអាងថា វាបានប្រឆំាងនឹងច្បាប់រដ្ឋធម្មនុញ្ញ ពិសេសវាបានប៉ះពាល់ដល់សិទ្ធិសេរីភាពរបស់មនុស្ស។ ដូច្នេះចាប់ពីអំណេះតទៅ គ្រប់គូស្រករដែលមានភេទដូចគ្នាស្របច្បាប់ទំាងអស់ នឹងទទួលបានសិទ្ធិដូចនឹងគូស្រករមានភេទខុសគ្នាអ៊ីចឹងដែរ។ មានន័យថា ពួកគេនឹងទទួលបានផលប្រយោជន៍សង្គម ដូចយ៉ាងប្រាក់ចូលនិវត្តន៍ ឬមួយក៏សេវាធានាសុខភាពជាដើម។ វាលើកលែងតែនៅក្នុងរដ្ឋចំនួន ៣៨ ដែលមិនបានទទួលស្គាល់អាពាហ៍ពិពាហ៍រវាងភេទដូចគ្នា។
អ្នកដែលបានសម្តែងក្តីសប្បាយរីករាយមុនគេ គឺសហគមន៍អ្នកស្រឡាញ់ភេទដូចគ្នា។ បន្ទាប់មក គឺលោកបារ៉ាក់ អូបាម៉ាដែលបានបញ្ជាក់តាមរយៈសេចក្តីជូនដំណឹងថា « តុលាការកំពូលបានកែប្រែរឿងអយុត្តិធម៌ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ