ក្រុមអ្នកស្រឡាញ់ភេទដូចគ្នា នៅតែត្រូវប្រឈមនឹងការរើសអើង
ចុះផ្សាយនៅថ្ងៃ៖
ស្តាប់ - ០៥:៤៨
ថ្ងៃទី១៧ឧសភាម្សិលមិញ គឺជាទិវាអន្ដរជាតិប្រឆាំងនឹងការរើសអើងអ្នកស្រឡាញ់ភេទដូចគ្នា។ ដូចឆ្នាំមុនៗដែរ នៅឆ្នាំ២០១៥នេះ អង្គការសិទ្ធិមនុស្សនិងក្រុមអ្នកស្រឡាញ់ភេទដូចគ្នានៅកម្ពុជា បានជួបជុំប្រារព្ធពិធីអបអរសាទរទិវាអន្ដរជាតិនេះ និងជាពិសេស ដើម្បីបញ្ឈប់ការរើសអើង។ ការរើសអើង ដែលនៅតែជាបញ្ហាប្រឈមសម្រាប់អ្នកស្រឡាញ់ភេទដូចគ្នានៅកម្ពុជា។
ក្រុមអ្នកស្រឡាញ់ភេទដូចគ្នា ឬ LGBT សំដៅដល់ ស្ដ្រីដែលស្រឡាញ់ភេទដូចគ្នា Lesbian បុរសដែលស្រឡាញ់ភេទដូចគ្នា Gay អ្នកដែលស្រឡាញ់ទាំងពីរភេទ Bisexual និងអ្នកដែលកែភេទពីប្រុសទៅស្រីឬពីស្រីទៅប្រុស Transgender។
នៅកម្ពុជា កន្លងមក សំឡេងរបស់អ្នកស្រឡាញ់ភេទដូចគ្នាត្រូវបានបំបិទតាមរយៈការគាបសង្កត់និងការមាក់ងាយ។ ប៉ុន្តែសព្វថ្ងៃនេះ សហគមន៍អ្នកស្រឡាញ់ភេទដូចគ្នានៅកម្ពុជា មានលក្ខណៈរឹងមាំជាងមុន។ ពួកគេហ៊ានបង្ហាញជាសាធារណៈអំពីអត្តសញ្ញាណពិតប្រាកដរបស់ខ្លួន ព្រមទាំងហ៊ានធ្វើសកម្មភាពផ្សេងៗដើម្បីជាប្រយោជន៍របស់ក្រុមខ្លួន និងសង្គមជាតិ។ ប៉ុន្តែយ៉ាងណាក៏ដោយ គេនៅតែសង្កេតឃើញថា ការរើសអើង ការមាក់ងាយ ក៏ដូចជាការរំលោភសិទ្ធិមនុស្ស នៅតែជាបញ្ហាប្រឈមសម្រាប់ក្រុមអ្នកស្រឡាញ់ភេទដូចគ្នានៅកម្ពុជា។
ដោយសារតែសង្គមនិងផ្នត់គំនិតជាទូទៅរបស់ប្រជាពលរដ្ឋកម្ពុជា ក្រុមអ្នកស្រឡាញ់ភេទដូចគ្នាត្រូវទទួលរងនូវការមាក់ងាយ និងរើសអើងជាបន្តបន្ទាប់។ ការរើសអើងអ្នកស្រឡាញ់ភេទដូចគ្នា មានតាំងពីនៅក្នុងគ្រួសារ សាលារៀន រហូតទៅដល់សង្គមទូទៅ។ នៅក្នុងគ្រួសារ ការមិនទទួលស្គាល់របស់ឪពុកម្ដាយចំពោះកូនដែលស្រឡាញ់ភេទដូចគ្នា បានជំរុញឲ្យពួកគេបង្ខំចិត្តចាកចេញពីគ្រួសារ ដើម្បីទៅរស់នៅតែលតោលប្រថុយប្រថាននៅខាងក្រៅ។ នៅសាលារៀន អ្នកស្រឡាញ់ភេទដូចគ្នានេះ ក៏ត្រូវទទួលរងនូវសម្ពាធរើសអើងពីសំណាក់មិត្តរួមថ្នាក់ ដែលអាចបង្ខំឲ្យពួកគេបោះបង់ការសិក្សាផងដែរ។ ចំណែកការមាក់ងាយនិងរំលោភសិទ្ធិមនុស្សពីសំណាក់សង្គមទូទៅ បានធ្វើឲ្យក្រុមអ្នកស្រឡាញ់ភេទដូចគ្នាត្រូវរស់នៅលាក់ខ្លួន និងមិនបានទទួលនូវសេវាសុខភាពសាធារណៈដែលពួកគេគួរតែទទួលបាន។ ទាំងនេះ បានធ្វើឲ្យក្រុមអ្នកស្រឡាញ់ភេទដូចគ្នាបាត់បង់ឱកាស ព្រមទាំងសិទ្ធិទទួលបានសមភាពនៅក្នុងសង្គម។ ហើយវាក៏បានក្លាយជាឧបសគ្គ ដែលរារាំងមិនឲ្យក្រុមមនុស្សស្រឡាញ់ភេទដូចគ្នាចូលរួមឲ្យបានពេញលេញក្នុងកិច្ចការសង្គម សេដ្ឋកិច្ច នយោបាយ ការអប់រំ ការថែទាំសុខភាព និងការងារផងដែរ។
ការរើសអើងចំពោះមនុស្សស្រឡាញ់ភេទដូចគ្នា មិនមែនជាបញ្ហារបស់កម្ពុជាតែឯងទេ។ នៅទូទាំងពិភពលោក បើទោះបីជាប្រទេសនោះអនុញ្ញាតឲ្យមានអាពាហ៍ពិពាហ៍ភេទដូចគ្នាហើយក៏ដោយ ក៏ការរិះគន់ រើសអើង នៅតែកើតឡើងជានិច្ច។
ជាក់ស្ដែង នៅប្រទេស Luxembourge លោកនាយករដ្ឋមន្ដ្រី Xavier Bettel ទើបតែរៀបអាពាហ៍ពិពាហ៍ជាមួយមិត្តប្រុសរបស់ខ្លួន កាលពីពេលថ្មីៗនេះ។ អាពាហ៍ពិពាហ៍ភេទដូចគ្នារបស់លោកនាយករដ្ឋមន្ដ្រី ក្រៅពីទទួលបានការសាទរពីអ្នកស្រឡាញ់ភេទដូចគ្នានិងអ្នកសេរីនិយមហើយ ក៏មានផងដែរ ការរិះគន់ដៀលត្មិះពីអ្នកអភិរក្សនិយម។ អ្នកអភិរក្សនិយម ដែលហៅអាពាហ៍ពិពាហ៍នេះថា ជារឿងខុសធម្មជាតិដ៏គួរឲ្យស្អប់ខ្ពើមជាដើម។
នៅប្រទេស Luxembourge មានត្រឹមការរិះគន់។ ប៉ុន្តែនៅប្រទេសដទៃមួយចំនួនទៀត អ្នកស្រឡាញ់ភេទដូចគ្នា ត្រូវបានចាត់ទុកថាជាឧក្រិដ្ឋជនថែមទៀតផង។ យ៉ាងហោចណាស់មានប្រទេសចំនួន១០នៅអាស៊ី ដែលបានកំណត់ថា ការស្រឡាញ់ភេទដូចគ្នា គឺជាបទឧក្រិដ្ឋ។ ប្រទេសទាំងនោះមានដូចជា ប្រទេសអាហ្វហ្គានីស្ថាន បង់ក្លាដេស ប៊្រុយណេ ប៊ូតាន់ ភូមា ម៉ាឡេស៊ី ម៉ាហ្គីស ប៉ាគីស្ថាន សិង្ហបុរី និងប្រទេសស្រីលង្កាជាដើម។ ចំណែកប្រទេសមួយចំនួនទៀតនៅកោះប៉ាស៊ីហ្វិក ក៏បានដាក់ទណ្ឌកម្មចំពោះអ្នករួមភេទដូចគ្នាផងដែរ។
ត្រឡប់មកកម្ពុជាវិញ។ ថ្វីត្បិតតែគ្មានការដាក់ទោសទណ្ឌសម្រាប់ការស្រឡាញ់ភេទដូចគ្នា ប៉ុន្តែមនុស្សស្រឡាញ់ភេទដូចគ្នានៅកម្ពុជាកំពុងតែរងគ្រោះដោយពុំមានច្បាប់ការពារពួកគេឡើយ។ មតិមួយចំនួនលើកឡើងថា ការការពារអ្នកស្រឡាញ់ភេទដូចគ្នា គឺប្រៀបបានទៅនឹងការជួយបំផ្លាញអនាគតរបស់ពួកគេ គ្រួសារ និងសង្គមជាតិ។ ប៉ុន្តែក្រុមអ្នកសិទ្ធិមនុស្សបានបកស្រាយថា ច្បាប់ការពារអ្នកស្រឡាញ់ភេទដូចគ្នា មិនមែនជាការលើកទឹកចិត្តនោះទេ ប៉ុន្តែគឺដើម្បីឲ្យសង្គមខ្មែរទទួលស្គាល់ក្រុមមនុស្សស្រឡាញ់ភេទដូចគ្នា និងជាពិសេស គឺដើម្បីឲ្យមានការគោរពសិទ្ធិគ្នាទៅវិញទៅមក។ អវត្តមាននៃច្បាប់ការពារក្រុមអ្នកស្រឡាញ់ភេទដូចគ្នា ធ្វើឲ្យរាល់ការរំលោភបំពានលើពួកគេត្រូវបានបំភ្លេចចោល ឬមើលរំលង។ នេះបើតាមក្រុមអ្នកការពារសិទ្ធិមនុស្ស។
ជាការពិត ច្បាប់ការពារក្រុមអ្នកស្រឡាញ់ភេទដូចគ្នាជារឿងចាំបាច់។ ប៉ុន្តែទន្ទឹមគ្នានេះ ការបញ្ជ្រាបចំណេះដឹង ដើម្បីបញ្ឈប់ការរើសអើងចំពោះមនុស្សស្រឡាញ់ភេទដូចគ្នា ក៏ជារឿងដែលមិនអាចខ្វះបានដូចគ្នា។ កើតមកជាមនុស្សស្រឡាញ់ភេទដូចគ្នា គឺមិនមែនជាកំហុសទេ។ ដូច្នេះ សង្គមគួរតែផ្តោតអារម្មណ៍ចំពោះការប្រព្រឹត្តរបស់ពួកគេ ការសិក្សារបស់ពួកគេ និងអនាគតរបស់ពួកគេ មិនមែនផ្តោតតែទៅលើភេទ និងសេចក្ដីស្នេហារបស់ពួកគេឡើយ។ ព្រោះថា ភាពជាមនុស្ស បើទោះបីជាស្រឡាញ់ភេទដូចគ្នាក៏ដោយ ក៏ពួកគេមានតម្លៃ មានសេចក្ដីថ្លៃថ្នូរ និងមានសមត្ថភាពរៀងៗខ្លួន។ ភាពជាមនុស្ស បើទោះបីជាស្រឡាញ់ភេទដូចគ្នាក៏ដោយ ក៏ពួកគេអាចធ្វើអំពើល្អសម្រាប់សង្គមផងដែរ។ មនុស្សគ្រប់រូប មិនថាកើតមកជាប្រុស ជាស្រី ឬជាមនុស្សដែលស្រឡាញ់ភេទដូចគ្នាក៏ដោយ គឺគួរតែត្រូវបានវាយតម្លៃដោយការប្រព្រឹត្តរបស់ពួកគេ មិនមែនដោយភេទរបស់ពួកគេឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ