គ្រោះថ្នាក់រថភ្លើងនៅខេត្ត Zhejiang ៖មនុស្សស្លាប់ចំនួន៣៥នាក់និងរបួស២១០នាក់
បន្ទាប់ពីមានគ្រោះថ្នាក់ បុកគ្នារវាងរថភ្លើងល្បឿនលឿនខ្លាំងណាស់ TGVពីរខ្សែនៅថ្ងៃសៅរ៍២៣កក្កដាមក សំណួរស្តីពីទំនុកទុកចិត្តទៅលើសុវត្ថិភាពនិងគុណភាពនៃបណ្តាញរថភ្លើង TGV កាន់តែមានច្រើនឡើងៗ។ គ្រោះថ្នាក់នៃរថភ្លើង TGV នេះ ដែលកើតឡើងនៅខេត្ត Zhejiang ភាគខាងកើតប្រទេសចិន បានបណ្តាលឲ្យមានមនុស្សស្លាប់ចំនួន ៣៥នាក់និងរបួស ជាង២០០នាក់។ រថភ្លើង TGV ទីមួយ បានគាំងដំណើរលែងទៅមុខដោយហេតុ ការដាច់ចរន្តអគ្គិសនីនិងត្រូវបុកទង្គិចដោយរថភ្លើង TGV មួយទៀតដែលរត់តាមក្រោយជាហេតុបណ្តាលឲ្យទូរថភ្លើងចំនួន៤គ្រឿង ខ្ទាតធ្លាក់ចេញពីផ្លូវស្ពានដ៏ធំមួយ។ នេះបើយោងតាមទីភ្នាក់ងារព័ត៌មានផ្លូវការមួយឈ្មោះ "ចិនថ្មី"។
ចុះផ្សាយនៅថ្ងៃ៖
បន្ទាប់ពីគ្រោះថ្នាក់លើផ្លូវដែកនេះមក រដ្ឋមន្រ្តីក្រសួងអយស្ម័យយាន លោក Sheng Guangzu បានចេញបញ្ជាឲ្យបើកការអង្កេតស៊ីជម្រៅមួយ ស្តីពីមូលហេតុនានានៃគ្រោះថ្នាក់ ដែលបានកើតឡើងនៅម៉ោង ២០.៣០នាទីម៉ោងនៅស្រុកចិន នៅទីក្រុង Wenzhou ខេត្ត Zhejiang។
យោងតាម ទីភ្នាក់ងារព័ត៌មានផ្លូវការ« ចិនថ្មី » រថភ្លើងទីមួយដែលបានគាំងដំណើរលែងទៅមុខដោយហេតុត្រូវរងគ្រោះដោយហេតុរន្ទះបាញ់ចំ ក៏ប៉ុន្តែយោងតាមសារព័ត៌មានផ្សេងៗវិញ គឺផ្លូវដែកទេតើដែលត្រូវរន្ទះបាញ់ចំ។ « ចិនថ្មី »បញ្ជាក់ទៀតថា នៅក្នុងទូរថភ្លើងនីមួយៗ មានផ្ទុកអ្នកដំណើរប្រមាណជាង១០០នាក់។
ម្យ៉ាងទៀត គ្រោះថ្នាក់រថភ្លើង TGV នៅថ្ងៃសៅរ៍ ២៣កក្កដាម្សិលមិញនេះ បានកើតមានមិនដល់មួយខែផង បន្ទាប់ពីការបើកសម្ពោធយ៉ាងអ៊ឹកធឹកផ្លូវរថភ្លើង TGV ដែល តភ្ជាប់ទីក្រុងប៉េកាំងទៅទីក្រុង សៀងហៃចម្ងាយប្រវែង ១៣០០ គ.ម។
គ្រោះមហន្តរាយតាមផ្លូវដែកនេះ បានជម្រុញ ឲ្យសាធារណជនចិន មានក្តីមន្ទិលសង្ស័យពុំទុកចិត្តទៅលើសុវត្ថិភាពក្នុងការធ្វើដំណើរ និងគុណភាពនៃបណ្តាញផ្លូវដែកក្នុងប្រទេសចិន។
មាគ៌ាអយស្ម័យយាននៅប្រទេសចិនកំពុងតែវិវឌ្ឍយ៉ាងពេញទំហឹង ។ ផ្លូវដែកនេះ ដែលមានប្រវែង៨ពាន់៣៥៨គ.ម ត្រូវឡើងរហូតដល់ប្រវែង ១ម៉ឺន៣ពាន់គ.ម នៅឆ្នាំ២០១២និងចម្ងាយ ១ម៉ឺន៦ពាន់គ.មនៅឆ្នាំ២០២០។
ម្យ៉ាងទៀត ការសាងសង់បណ្តាញអយស្ម័យយានដ៏ឆាប់រហ័សនៅឆ្នាំមុននេះ ដោយប្រើទុនអស់យ៉ាងច្រើនបំផុតដល់ទៅ៧០ ម៉ឺន លានយ័ន (ឬស្មើនឹង ៧ម៉ឺន ៧ពាន់ លានអឺរ៉ូ ) បានក្លាយជាកម្មវត្ថុនៃការសូកប៉ាន់ក្រុមអ្នកទទួលខុសត្រូវលើកម្មវិធីសាងសង់មាគ៌ាអយស្ម័យយាន ក្រោមការត្រួតពិនិត្យមើលដោយរដ្ឋមន្រ្តីក្រសួងអយស្ម័យយានចិនជំនាន់នោះ គឺលោក Liu Zhijun ដែលត្រូវប្តឹងបរិហារដោយការិយាល័យជាតិទទួលបន្ទុកខាងអធិការកិច្ចលើចំណាយ។
រដ្ឋមន្រ្តីក្រសួងអយស្ម័យយានចិននេះ ដែលត្រូវជាប់អង្កេតមួយពីបទរំលោភបំពានលើវិន័យ ត្រូវបានគេដកចេញពីមុខតំណែងភ្លាមនៅខែកុម្ភៈកន្លងទៅនេះ។លោក Liu Zhijun ប្រហែលជាបានទទួលប្រាក់សំណូកប្រមាណជា៨០០លានយ័ន ឬត្រូវជា ៨៨លានអឺរ៉ូ។ នេះបើយោងតាមសារព័ត៌មានផ្លូវការចិន។ ការបង្ហើបប្រាប់ព័ត៌មានទាំងនេះ ក៏ប៉ះពាល់ផងដែរដល់សុវត្ថិភាពនៃការដឹកជញ្ជូនតាមផ្លូវដែកនៅក្នុងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ