ប្រជាជនចិនកំពុងស្រេកឃ្លានចង់បានលទ្ធិប្រជាធិបតេយ្យ
បើយោងតាមការស្ទាបស្ទង់មតិដែលផ្សព្វផ្សាយដោយសារព័ត៌មានចិនជាភាសាអង់គ្លេសឈ្មោះ Huan qiu Shibao (Global Times) ដែលជាសាខាមួយរបស់ទិនានុប្បវត្តិប្រជាជន មានប្រជាជនចិនប្រមាណ៦៣%យល់ថា “អនុវត្តតាមប្រព័ន្ធប្រជាធិបតេយ្យរបស់លោកខាងលិចជាការប្រសើរ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សារព័ត៌មានចិនជាភាសាអង់គ្លេសឈ្មោះ Huan qiu Shibao ឬ(Global Times) បានធ្វើការស្ទាបស្ទង់មតិមួយបានឲ្យដឹងថា ប្រជាជនចិនភាគច្រើននៅបារម្ភខ្លាចប្រព័ន្ធបោះឆ្នោតដោយសេរីដូចប្រទេសលោកខាងលិច នៅពុំទាន់អាចអនុវត្តបាននៅក្នុងប្រទេសចិននៅគ្រាបច្ចុប្បន្ននេះ។ ក៏ប៉ុន្តែមានប្រជាជនចិនដល់ទៅ១៥,៧%យល់ថា ប្រព័ន្ធសេរីបែបនេះអាចអនុវត្តបាននៅក្នុងប្រទេសចិនឥឡូវនេះ។
អ្វីដែលគួរឲ្យគេងឿងឆ្ងល់បំផុតគឺការហ៊ានផ្សព្វផ្សាយដោយសារព័ត៌មាន Huan qiu Shibao ឬ(Global Times) ពីចំនួនប្រជាជនចិន១៥,៧% យល់ថាប្រព័ន្ធសេរីដូចលោកខាងលិចអាចអនុវត្តបាននៅក្នុងប្រទេសចិនបច្ចុប្បន្ន។ ទាំងនេះបានសេចក្តីថា ប្រជាជនចិនទាំងនោះទាមទារឲ្យរបបគ្រប់គ្រងផ្តាច់ការចិនបច្ចុប្បន្នដែលមានគណបក្សនយោបាយតែមួយគត់រលត់រលាយ ហើយមានប្រជាជនចិនដល់ទៅជាង៤៩%ថ្លែងថា ពួកគេនៅរង់ចាំ “បដិវត្តន៍ថ្មី”កើតមាននៅក្នុងប្រទេសចិន។ ជាង១៥%យល់ថា “ប្រទេសចិនពិតជាកំពុងតែឈានទៅរកបដិវត្តន៍មួយថ្មី” រីឯប្រជាជនចិនប្រមាណ៣៤%យល់ថា “ប្រទេសចិនប្រហែលជាកំពុងឈានទៅរកបដិវត្តន៍មួយថ្មី”។
គួរបញ្ជាក់ថា ការស្ទាបស្ទង់មតិបែបវិទ្ធង្សនានេះមានផ្សព្វផ្សាយតែនៅក្នុង សារព័ត៌មានចិនជាភាសាអង់គ្លេសឈ្មោះ Huan qiu Shibao ឬ(Global Times) ប៉ុណ្ណោះ។ នៅថ្ងៃសៅរ៍កន្លងទៅនេះ លោក Wu Bangguo បច្ចុប្បន្នប្រធានសភាប្រជាមានិតចិនបានថ្លែងថា “ការអនុវត្តន៍តាមប្រព័ន្ធប្រជាធិបតេយ្យសេរីដូចលោកខាងលិចពុំអាចប្រព្រឹត្តបានឡើយនៅក្នុងប្រទេសចិនបច្ចុប្បន្ន ហើយប្រព័ន្ធគ្រប់គ្រងសង្គមនិយមបែបចិននេះនឹងមានអាយុយឺនយូរវែងឆ្ងាយតទៅទៀត”។
គួរកត់សម្គាល់ថា ប្រទេសចិនពុំអាចរក្សារបបគ្រប់គ្រងសង្គមនិយមបែបនេះបានយូរតទៅទៀតឡើយ។ នៅពេលអនាគតខាងមុខ ប្រទេសចិនត្រូវតែងាកមកអនុវត្តគោលការណ៍ប្រជាធិបតេយ្យ យុត្តិធម៌ និងសេរីភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ