អឺរ៉ុបខាងលិចរងគ្រោះ បំផ្លិចបំផ្លាញ ដោយព្យុះកំណាចCiaran
នៅអឺរ៉ុបខាងលិច មនុស្ស១០នាក់ ស្លាប់ ដោយសារព្យុះកំណាចCiaran ដែលបក់ក្នុងល្បឿន ជិត ២០០គីឡូម៉ែត្រក្នុងមួយម៉ោង។ ចាប់ផ្តើមបោកបក់ចេញមហាសមុទ្រអាត្លង់ទិក កាលពីថ្ងៃយប់ថ្ងៃពុធទី ១វិច្ឆិកា ព្យុះសង្ឃរាបំផ្លាញផ្ទះសម្បែង កាត់ផ្តាច់អគ្គិសនី នៅប្រទេសបារាំង បង្កឲ្យមានភ្លើងឆេះព្រៃនៅអេស្ប៉ាញ។ ចំណែកអ៊ីតាលី ដែលរងគ្រោះដោយទឹកជំនន់ក្នុងវេលាមានខ្យល់ព្យុះ រាប់ឃើញមានមនុស្សបាត់បង់ជីវិត៣នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ប្រទេសចំនួន៧ នៅអឺរ៉ុបខាងលិចរងគ្រោះបោកបក់ ដោយខ្យល់ព្យុះសង្ឃរាដ៏កម្រ កាលពីយប់ថ្ងៃពុធ ឈានចូលដល់ថ្ងៃព្រហស្បតិ៍ ដែលបានបណ្តាលឲ្យមនុស្សស្លាប់យ៉ាងតិច ១០នាក់ និងបំផ្លិចបំផ្លាញផ្ទះសម្បែង ចំណែកសាលារៀន ស្ថានីយ៍រថភ្លើង អាកាសយានដ្ឋាន កំពង់ផែត្រូវបិទ ផ្អាកមិនដំណើរការ។
នៅបារាំង ជាទី ដែលខ្យល់ព្យុះCiaran ត្រូវកត់ត្រាជាខ្យល់ព្យុះ កម្លាំងដ៏ខ្លាំងមិនធ្លាប់មាន នៅរយៈពេល៤០ឆ្នាំមកនេះ អាជ្ញាធរស្រង់ឃើញមានមនុស្ស២នាក់ស្លាប់ ដោយសារការបាក់រលំដើមឈើរលើរថយន្ត និងធ្លាក់ពីលើផ្ទះដោយសារកម្លាំងខ្យល់ព្យុះ។ ព្យុះសង្ឃរា ដែលបក់ក្នុងល្បឿនជិត២០០គីឡូម៉ែត្រក្នុងមួយម៉ោង បានបំផ្លាញផងដែរ បង្គោលភ្លើង កាត់ផ្តាច់អគ្គិសនី របស់ផ្ទះជិត៦សែនខ្នងនៅតំបន់ភាគខាងជើងបារាំង។
នៅអេស្ប៉ាញឯណោះវិញ ខ្យល់ព្យុះកំណាច Ciaran បានបង្កឲ្យមានភ្លើងឆេះព្រៃជាង ១០០០ហិចតា និងការជម្លៀសមនុស្សជាង៨០០នាក់ចេញពីផ្ទះសម្បែង។
បើតាមអាជ្ញាធរអេស្ប៉ាញ កម្លាំងខ្យល់បក់ ជាង១២០គីឡូម៉ែត្រក្នុងមួយម៉ោង រំខានការងារពន្លត់ភ្លើងឆេះព្រៃ ព្រោះថា ដោយសារខ្យល់ព្យុះខ្លាំង យន្តហោះមិនអាចចេញទៅដឹកទឹកពន្លត់ភ្លើង។
នៅប៊ែលហ្ស៊ិក មនុស្ស២នាក់ស្លាប់ដោយសារដើមឈើបាក់សង្កត់លើ។ បន្ថែមពីលើចំនួនមនុស្សស្លាប់២នាក់ នៅអាល្លឺម៉ង់ និងនៅហូឡង់ អាជ្ញាធរនៅទីក្រុងToscaneភាគកណ្តាលអ៊ីតាលីប្រកាសសញ្ញាអាសន្ន បន្ទាប់ពីខ្យល់ព្យុះសម្លាប់មនុស្ស៣នាក់ និងបង្កគ្រោះទឹកជំនន់ តាំងពីថ្ងៃព្រហស្បតិ៍។ សម្រាប់អភិបាលក្រុងអ៊ីតាលី Toscane គ្រោះមហន្តរាយបង្កឡើងដោយខ្យល់ព្យុះកំណាច Ciaran មានឈ្មោះរបស់វា នោះគឺការប្រែប្រួលអាកាសធាតុ។ នៅបន្ទាប់ពីព្យុះសង្ឃរា បក់សំដៅទៅភាគខាងត្បូង នៅសមុទ្រមេឌីទែរ៉ាណេ នៅថ្ងៃសុក្រ ប្រទេសនៅអឺរ៉ុបខាងជើងត្រូវរងសម្ពាធទឹកភ្លៀងមួយទៀត នៅចុងសប្តាហ៍នេះ ប៉ុន្តែ វាមិនធ្ងន់ធ្ងរកាចសាហាវខ្លាំងដូចព្យុះCiaranនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ