ហូឡង់៖បាតុកម្មហិង្សាប្រឆាំងនឹងការដាក់ចេញជាថ្មីនូវវិធានការឹតបន្តឹងទប់ស្កាត់នឹងការឆ្លងជំងឺកូវីដ១៩
នៅក្នុងទីក្រុងរ៉ូតទែរដាម ប្រទេសហូឡង់ បាតុកម្មប្រឆាំងនឹងការដាក់ចេញជាថ្មីនូវវិធានការឹតបន្តឹងទប់ស្កាត់នឹងការឆ្លងជំងឺកូវីដ១៩ បានបង្កឲ្យមានអំពើហិង្សាកាលពីយប់ថ្ងៃសុក្រ ទី១៩ វិច្ឆិកា។ ប្រឈមនឹងភាពពុះកញ្រ្ជោល និងអំពើហិង្សារបស់បាតុករមួយចំនួន កម្លាំងប៉ូលិសបានធ្វើការបាញ់ព្រមានដោយមានអ្នករងរបួស និងការចាប់ខ្លួន។ គួរបញ្ជាក់ថា ហូឡង់កំពុងប្រឈមនឹងសន្ទុះកំណើនករណីឆ្លងកូវីដ១៩ តាំងពីមួយសប្តាហ៍។ ជាក់ស្តែងក្នុងថ្ងៃសុក្រ ទី១៩ វិច្ឆិកា មានករណីឆ្លងថ្មីជាង ២១ ០០០ករណី។
ចុះផ្សាយនៅថ្ងៃ៖
ស្តាប់ - ០២:០១
ក្រុមជនពាក់មុខប្រដាប់ដោយដំបង ការវាយ ហើយដុតឡានប៉ូលិស និងការដុតបំផ្លាញរបស់របរជាច្រើនផ្សេងទៀតដូចជាកង់ និងម៉ូតូ ទាំងអស់នេះជារូបភាពដែលគេបានឃើញនៅក្នុងក្បួនបាតុកម្មនៃការប្រឈមមុខដាក់គ្នាយ៉ាងហិង្សារវាងក្រុមបាតុករ និងកម្លាំងប៉ូលិសនាយប់ថ្ងៃសុក្រ ទី១៩ វិច្ឆិកាក្នុងទីក្រុងរ៉ូតទែរដាម។ នៅក្នុងសេចក្តីប្រកាសព័ត៌មានចេញផ្សាយនៅក្រោយម៉ោង ៩យប់ ប៉ូលិសបានបញ្ជាក់ពីការបាញ់កាំភ្លើងដើម្បីព្រមាន និងមានរបួសចំនួន ៧នាក់ ក្នុងនោះក៏មានប៉ូលិសដែរ។ បើតាមទូរទស្សន៍ក្នុងស្រុក មានអ្នករបួសម្នាក់យ៉ាងតិចដោយគ្រាប់កាំភ្លើង។ តែគេពិបាកកំណត់ថា តើជាគ្រាប់កំាភ្លើងរបស់ប៉ូលិស ឬមកពីខាងណា។
ទន្ទឹមគ្នានេះ រដ្ឋអំណាចបានប្រកាសពីការចាប់ខ្លួនបាតុករជាច្រើននាក់។ គួរបញ្ជាក់ថា បាតុកម្មនេះបានរៀបចំឡើងដោយក្រុមប្រឆាំងនឹងវិធានការរឹតបន្តឹងជាថ្មីរបស់រដ្ឋាភិបាលក្នុងការទប់ស្កាត់នឹងការឆ្លងជំងឺកូវីដ១៩។ តាំងពីមួយសប្តាហ៍ដែលប្រទេសហូឡង់បានប្រឈមនឹងសន្ទុះករណីឆ្លងថ្មីដោយមានជាង ២១ ០០០ករណីក្នុងថ្ងៃសុក្រ ទី១៩ វិច្ឆិកា។ ប្រឈមនឹងកំណើនករណីឆ្លងថ្មីនេះ រដ្ឋាភិបាលបានដាក់ចេញនូវវិធានការរឹតបន្តឹងជាថ្មីដូចជាតម្រូវឲ្យពាក់ម៉ាសនៅទីកន្លែងបិទជិតមួយចំនួន ហើយភោជនីយដ្ឋានត្រូវបិទទ្វារនៅម៉ោង ៨យប់។
គួររម្លឹកថាក្នុងខែមករាកន្លងទៅ ពោលក្រោយពីការចូលជាធរមាននូវបំរាមគោចរដែលជាវិធានការទប់ស្កាត់ការឆ្លងកូវីដ១៩ ហូឡង់ក៏ធ្លាប់បានស្គាល់នូវបាតុកម្មហិង្សាដូចកាលពីយប់ថ្ងៃសុក្រ ទី១៩ វិច្ឆិកាអ៊ីចឹងដែរ។ បើតាមមើលទៅ វិធានការរឹតបន្តឹងជាថ្មីរបស់រដ្ឋាភិបាលពេលនេះនៅមិនទាន់អាចរំងាប់កំហឹងរបស់ពលរដ្ឋមួយចំនួនទេ ព្រោះក្នុងថ្ងៃសៅរ៍ ទី២០ វិច្ឆិកានេះ មានមនុស្សជាច្រើនពាន់នាក់ត្រៀមចុះផ្លូវធ្វើបាតកម្មជាថ្មីទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ