តុលាការបារាំងកាត់ទោសដាក់ពន្ធនាគារអ្នកដែលជាប់ពាក់ព័ន្ធនឹងភេរវកម្ម នៅប៉ារីស
ជិត ៦ឆ្នាំក្រោយ ភេរវកម្ម នៅទីក្រុងប៉ារីស ដែលបានសម្លាប់មនុស្ស ១៧នាក់ នៅទស្សនាវដ្តី ឆាលី អិបដូ និងនៅហាងលក់ទំនិញរបស់ជនជាតិជ្វីហ្វ តុលាការពិសេសក្រុងប៉ារីសបានសម្រេចកាត់ទោស ដាក់ពន្ធនាគារ អ្នកដែលជាប់ពាក់ព័ន្ធនឹងភេរវកម្ម ចំនួន ១៣នាក់ ឲ្យជាប់ពន្ធនាគារ ពី ៤ ទៅ ៣០ឆ្នាំ។ ភាគីដើមបណ្តឹងរដ្ឋប្បវេណី ចំនួន២០០នាក់ ដែលជាជនរងគ្រោះ និងជាសាច់ញាតិ របស់ជនរងគ្រោះ ស្លាប់នៅក្នុងការវាយប្រហារភេរវកម្ម កាលពីខែមករា ឆ្នាំ ២០១៥ ទទួលយល់ព្រម ការសម្រេចរបស់តុលាការ ប៉ុន្តែ មេធាវីមួយចំនួនរបស់ជនសង្ស័យ បាននិយាយហើយថា គេនឹងប្តឹងបន្តទៅសាលាឧទ្ធរណ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
នៅក្រោយសវនាការដ៏ស្មុគស្មាញ និងអូសបន្លាយពេលវេលា រាប់ខែ ដោយសារតែវិបត្តិកូវីដ តុលាការក្រុងប៉ារីស នៅទីបំផុតទៅបានសម្រេចកាត់ទោស មនុស្ស១៣នាក់ ឲ្យជាប់ពន្ធនាគារ ពី៤ ទៅ៣០ឆ្នាំ និងម្នាក់ ឲ្យជាប់គុកអស់មួយជីវិត ក្នុងបទចោទប្រកាន់ ថាបានឃុបឃិត ផ្គត់ផ្គង់អាវុធ ជួយរៀបចំផែនការធ្វើភេរវកម្ម សម្លាប់មនុស្ស នៅទស្សនាវដ្តីត្លុក ឆាលី អិបដូ និងនៅហាងទំនិញជ្វីហ្វ កាលពីខែមករា ឆ្នាំ ២០១៥។
មេក្លោង ៣នាក់ គឺបងប្អូន Kouachiដែលបានវាយប្រហារ ភេរវកម្មសម្លាប់មនុស្សនៅ ទស្សនាវដ្តី ឆាលី អិបដូ ហើយភេរវជន Coulibaly នៅហាងទំនិញ ជ្វីហ្វ Hyper Cacher ត្រូវបានប៉ូលិសបាញ់សម្លាប់ នៅ ប៉ុន្មានថ្ងៃក្រោយ មានភេរវកម្ម។ ដូច្នេះ សវនាការរយៈពេល ៣ខែ ដែលតុលាការក្រុងប៉ារីស បានចាប់ផ្តើមបើក តាំងពីថ្ងៃទី ២កញ្ញា មកនេះ ជាសវនាការដែលផ្តោតជំនុំជម្រះតែទៅលើជនជាប់ចោទដែលមានជាប់ពាក់ព័ន្ធ នឹងការវាយប្រហារភេរវកម្មតែប៉ុណ្ណោះ។
នៅក្រោយភេរវកម្ម បីថ្ងៃ ដែលបានសម្លាប់មនុស្ស ១៧នាក់ នៅទស្សនាវដ្តី ឆាលីអិបដូ និងហាងទំនិញ ជ្វីហ្វ ជនជាប់ចោទ ១៤នាក់ ត្រូវបានប៉ូលិសស្រាវជ្រាវរកឃើញមុខ និងចាប់ខ្លួនបាន តាមរយៈ ការឆ្លើយឆ្លងទូរស័ព្ទ និងសំណាកADN ជាមួយក្រុមភេរវជន។ នៅថ្ងៃពុធ ដោយសារតែ គ្មានភស្តុតាង រឹងមាំ តុលាការក្រុងប៉ារីស បានសម្រេច ដកជនជាប់ចោទ ៦នាក់ ពីក្នុងបញ្ជីចោទប្រកាន់ ជាប់ពាក់ព័ន្ធនឹងអំពើភេរវកម្ម ប៉ុន្តែ ពួកគេនៅតែត្រូវជាប់ទោស ពន្ធនាគារ ក្នុងបទជួញដូរអាវុធ។
ម្យ៉ាងទៀត នៅក្នុងចំណោមជនជាប់ចោទ ១៤នាក់ មាន ៣នាក់ ត្រូវបានតុលាការកាត់ទោស ដោយកំបាំងមុខ ដោយសារ បានរត់គេចខ្លួន គ្មានដំណឹងច្បាស់លាស់ ឬស្លាប់នៅ ស៊ីរី ដូចជា អតីតសង្សាររបស់ ភេរវជនCoulibaly ហើយនិងអតីតនិស្សិតវិស្វករម្នាក់ ដែលបានជួយរៀបចំផែនការឲ្យCoulibaly វាយប្រហារលើហាងទំនិញជ្វីហ្វ នៅជាយក្រុងប៉ារីស។
ជនជាប់ចោទទាំង១១នាក់ មានអាយុ ពី ២៩ ទៅ ៦៣ឆ្នាំ ដែលមានមុខនៅ សវនាការ និងត្រូវបានតុលាការកាត់ទោស កាលពីថ្ងៃពុធ សុទ្ធសឹងជាអ្នកដែលធ្លាប់ជាប់ក្នុងបញ្ជីថ្កោលទោសរបស់តុលាការបារាំង។ ដោយថ្កោលទោសឧក្រិដ្ឋជនដែលជាប់ពាក់ព័ន្ធនឹងការវាយប្រហារភេរវកម្ម ទៅលើទស្សនាវដ្តីឆាលី អិបដូ និងហាងទំនិញជ្វីហ្វ តុលាការប៉ារីសបានបើកសវនាការប្រវត្តិសាស្រ្តមួយ ដើម្បី ផ្តល់យុត្តិធម៌ដល់ជនរងគ្រោះដោយសារអំពើភេរវកម្ម ដែលបានអង្រួនទីក្រុងប៉ារីស កាលពីជិត ៦ឆ្នាំមុន។
បារាំង នៅតែប្រឈមខ្លាំង នឹងការគំរាមកំហែងវាយប្រហារភេរវកម្ម។ នៅក្រោយ តុលាការចាប់បើកសវនាវការ ជំនុំជម្រះ អ្នកពាក់ព័ន្ធនឹងអំពើភេរវកម្ម ឆ្នាំ ២០១៥ ភេរវកម្ម ៣លើក បានកើតឡើង បន្តបន្ទាប់គ្នា ដែលចុងក្រោយ គឺភេរវកម្មសម្លាប់គ្រូបង្រៀន នៅក្នុងបរិបទដែលសិទ្ធិសេរីភាពបញ្ចេញមតិ និងការចំអក ទៅលើសាសនាឥស្លាម កំពុង ចោទជាបញ្ហា ធំ ក្នុងសង្គមបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ