បារាំងចាប់ខ្លួនមនុស្ស១១នាក់ ដែលសង្ស័យថាពាក់ព័ន្ធនឹងភេរវកម្មសម្លាប់គ្រូបង្រៀន
រសៀលថ្ងៃអាទិត្យ ទី១៨តុលា ពលរដ្ឋបារាំងជាច្រើននាក់ នឹងធ្វើពិធីដង្ហែក្បួន នៅកណ្តាលក្រុងប៉ារីស ដើម្បីសម្តែងមតិគាំទ្រគ្រូបង្រៀន និងដើម្បីឧទ្ទិសដល់វិញ្ញាណក្ខន្ធនៃសពគ្រូបង្រៀនមួយរូប ដែលត្រូវយុវជនម្នាក់ សម្លាប់ ដោយកាត់ ក កាលពីយប់ថ្ងៃសុក្រ។ ពីថ្ងៃសៅរ៍ ប្រជាជនបារាំង ក៏បានរួមគ្នាសម្តែងសាមគ្គីភាពចំពោះគ្រូបង្រៀន និងបានដាក់កម្រងផ្កា នៅតាមសាលារៀននៃបណ្តាខេត្តធំៗដែរ។ ជុំវិញការស៊ើបអង្កេតវិញ គឺប៉ូលីសបារាំងបានចាប់ខ្លួនមនុស្ស១១នាក់ហើយ ។
ចុះផ្សាយនៅថ្ងៃ៖
ស្តាប់ - ០២:៣៤
«Je suis Samuel ខ្ញុំគឺ សាមុអែល» ឬ «ខ្ញុំជាគ្រូបង្រៀន Je suis enseignant» ជាបដាដែលគេសរសេរឧទ្ទិសជូនលោកគ្រូ Samuel Paty។ នៅជាយក្រុងប៉ារីស គ្រូបង្រៀន កូនសិស្ស មាតាបិតាសិស្ស និងមហាជនទូទៅ ច្រើនកុះករ បានចូលរួមរំលែកទុក្ខ នាំគ្នាទៅដាក់កម្រងផ្កា នៅវិទ្យាល័យភាគខាងលិចក្រុងប៉ារីស ជាទីដែលជនរងគ្រោះ បង្រៀន។
រដ្ឋាភិបាលបារាំង ក៏នឹងរៀបចំពីបុណ្យកាន់ទុក្ខថ្នាក់ជាតិ ជាផ្លូវការ នៅថ្ងៃពុធ ហើយនិងធ្វើពង្រាងច្បាប់ថ្មី ឆ្លើយតបឱ្យតឹងតែង ចំពោះពួកជនដែលកាន់សាសនាជ្រុលនិយម និងចង់ផ្តាច់ខ្លួន។ នៅពេលនេះ មជ្ឈដ្ឋានអ្នកនយោបាយបារាំង ស្ទើរតែគ្រប់ភាគី សុទ្ធតែថ្កោលទោសអំពើឃាតកម្មដ៏ឃោរឃៅ លើគ្រូបង្រៀន Samuel Paty ។
ពាក់ព័ន្ធនឹងដំណើរការស៊ើបអង្កេតវិញ នគរបាលបានចាប់ឃាត់ខ្លួន ក្រុមមនុស្សសង្ស័យ ចំនួន១១នាក់ គិតត្រឹមព្រឹកថ្ងៃអាទិត្យ ក្នុងនោះ មានឪពុកម្តាយនិងសាច់ញាតិជិតឆ្ងាយរបស់ជនដៃដល់ ហើយក៏មានដែរ ឪពុកម្តាយរបស់កូនសិស្សស្រីម្នាក់ ដែលបានទៅប្តឹងនៅសាលារៀន។ ឪពុកកូនសិស្សនេះ បានផុសវីដេអូអំពាវនាវតាមហ្វេសបុក ឱ្យនាំថ្កោលទោសនិងប្រឆាំងនឹងលោកគ្រូបង្រៀន នាប៉ុន្មានថ្ងៃមុនកើតហេតុ។ បុគ្គលនេះ មានបងប្អូនស្រីម្នាក់ បានទៅចូលរួម ជាមួយពួកភេរវជនជីហាត នៃក្រុមអង្គការរដ្ឋអ៊ីស្លាម នៅប្រទេសស៊ីរី ក្នុងឆ្នាំ២០១៤ ហើយនាងគឺកំពុងតែឋិតក្នុងបញ្ជីស្វែងរកចាប់ខ្លួនរបស់ប៉ូលីសបារាំង។ នេះបើតាមរដ្ឋអាជ្ញាប្រឆាំងភេរវកម្ម Jean-François Ricard ក្នុងសន្នីសីទសារព័ត៌មាន ពីថ្ងៃសៅរ៍ ទី១៧តុលា។
រដ្ឋអាជ្ញាប្រឆាំងភេរវកម្ម ក៏បានទម្លាយពីអត្តសញ្ញាណជនដៃដល់ ដែលសម្លាប់កាត់កគ្រូបង្រៀន ថាគេមានឈ្មោះថា Abdoullakh Abouyezidovitch Anzorov ជាជនភៀសខ្លួន សុំសិទ្ធជ្រកកោននៅបារាំង តាំងពីក្មេងអាយុ៦ឆ្នាំម្ល៉េះ ជាមួយ ឪពុកម្តាយ ជាជនជាតិឆេឆេនី។ គេកើតឆ្នាំ២០០២ នៅក្រុងម៉ូស្កូ។
លោក Sergueï Parinov អ្នកនាំពាក្យស្ថានទូតរុស្ស៊ីប្រចាំក្រុងប៉ារីស ប្រកាសថា ឃាតកម្មនេះ គ្មានពាក់ព័ន្ធនឹងរដ្ឋបាលក្រុងម៉ូស្កូឡើយ ហើយ រុស្ស៊ី ថ្កោលទោសដាច់ណាត់ ចំពោះអំពើភេរវកម្មគ្រប់ទម្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ