ទាហានបារាំងសម្លាប់មេដឹកនាំជីហាតរដ្ឋអ៊ីស្លាមនៅអាហ្វ្រិក
ទាហានបារាំងបានសម្លាប់មេដឹកនាំជីហាតអង្គការរដ្ឋអ៊ីស្លាមនៅតំបន់សាហារ៉ាស្ថិតក្នុងទ្វីបអាហ្វ្រិកតាមរយៈប្រតិបត្តិការមួយ។ មេដឹកនាំជីហាតរដ្ឋអ៊ីស្លាមរូបនេះឈ្មោះ អេដណាន អាប៊ូ អាល់សារ៉ាវី (Adnan Abou Walid al-Sahrawi) និងក៏ជាគោលដៅតាមប្រមាញ់របស់អាមេរិកដែរ ដោយសារតែបានធ្វើការវាយប្រហារដ៏សាហាវជាច្រើនដងទៅលើទាហានអាមេរិក និងបុគ្គលិកជំនួយបរទេស។
ចុះផ្សាយនៅថ្ងៃ៖
អេដណាន អាប៊ូ អាល់សារ៉ាវី ត្រូវបានសម្លាប់ដោយកងកម្លាំងយោធាបារាំង។ នេះគឺជាការប្រកាសរបស់ប្រធានាធិបតីបារាំងលោក អេម៉ានុយអែល ម៉ាក្រុង តាមរយៈសារធ្វីតទ័រនៅថ្ងៃព្រហស្បតិ៍១៦ កញ្ញា ឆ្នាំ២០២១នេះ។
លោកម៉ាក្រុងបានអះអាងបន្ថែមថា នេះ គឺជាជោគជ័យធំមួយទៀតក្នុងយុទ្ធនាការប្រយុទ្ធប្រឆាំងនឹង ក្រុមភេរវករនៅតំបន់សាហេល។ យ៉ាងណាក៏ដោយលោកប្រមុខរដ្ឋបារាំងមិនបានបញ្ជាក់ប្រាប់នោះទេ អំពីទីតាំង ឬក៏ព័ត៌មានលម្អិត ជុំវិញប្រតិបត្តិការរបស់ទាហានបារាំងរហូតសម្លាប់បានមេដឹកនាំជីហាតរដ្ឋអ៊ីស្លាមរូបនេះ។
គួរបញ្ជាក់ថា ក្រុមជីហាតអង្គការរដ្ឋអ៊ីស្លាមនៅសហារ៉ា (ISGS) ត្រូវបានគេផ្កោលទោសចំពោះការវាយប្រហារភេរវកម្មជាច្រើនលើប្រជាជនស៊ីវិល និងកងទាហាននៅក្នុងប្រទេស ម៉ាលី នីហ្សេ និងបួគីណាហ្វាសូ។
មេដឹកនាំជីហាត អាល់សារ៉ាវី ត្រូវបានគេស្គាល់ថាអ្នកនៅពីក្រោយការសម្លាប់បុគ្គលិកជំនួយជនជាតិបារាំងជាច្រើននាក់នៅឆ្នាំ ២០២០ និង ជាជនដែលអាមេរិកចង់បានផងដែរ ដោយសារតែធ្លាប់បានរៀបចំការវាយប្រហារដ៏ប្រល័យមួយកាលពីឆ្នាំ ២០១៧ ទៅលើទាហានអាមេរិកនៅនីហ្សេ។
បក្ខពួករបស់អាល់សារ៉ាវី ក៏បានចាប់ពង្រត់ជនជាតិបរទេសជាច្រើននាក់នៅក្នុងតំបន់សាហេលដែរ។ ជាមួយគ្នានេះគេជឿទៀតថា គឺក្រុមជីហាតរដ្ឋអ៊ីស្លាមរបស់ អាល់សារ៉ាវីនេះឯង ដែលជាអ្នកចាប់ឃុំខ្លួន ជនជាតិអាមេរិកម្នាក់ឈ្មោះជេហ្វ្រី វូដ (Jeffrey Woodke) ដែលត្រូវបានចាប់ពង្រត់ពីផ្ទះរបស់គាត់នៅប្រទេសនីហ្សេក្នុងឆ្នាំ ២០១៦។ កាលពីគ្រាកន្លងទៅ សហរដ្ឋអាមេរិកធ្លាប់បានប្រកាសផ្តល់ប្រាក់រង្វាន់ចំនួន ៥ លានដុល្លារ សម្រាប់ជនណាដែលផ្តល់ព័ត៌មានអំពីកន្លែងលាក់ខ្លួនរបស់អាល់សារ៉ាវី។
គួររំឭកជូនដែរថា ទាហានបារាំងបានសម្លាប់សមាជិកជាន់ខ្ពស់ជាច្រើននាក់របស់ពួកជីហាតអង្គការរដ្ឋអ៊ីស្លាមនៅអាហ្វ្រិកចាប់តាំងពីចាប់ផ្តើមអន្តរាគមន៍យោធារបស់ខ្លួននៅម៉ាលីក្នុងឆ្នាំ ២០១៣។ នៅខែមិថុនា ឆ្នាំ២០២១ នេះ លោកប្រធានាធិបតីបារាំងម៉ាក្រុង បានប្រកាសកាត់បន្ថយកងកម្លាំងទ័ពបារាំងនៅសាហេលបន្ទាប់ពីមានវត្តមាននៅទីនោះជាង ៨ ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ