១៣ វិច្ឆិកា ២០១៥៖ រាត្រីតក់ស្លុត នៅក្រុងប៉ារីស ដោយសារអំពើភេរវកម្ម
ថ្ងៃទី៨កញ្ញានេះ នៅទីក្រុងប៉ារីស តុលាការបានចាប់ផ្តើមបើកសវនាការដ៏ធំបំផុត ដើម្បីកាត់ទោស ជនចាប់ចោទចំនួន២០នាក់ ដែលជាប់ពាក់ព័ន្ធ ក្នុងអំពើភេរវកម្មបាញ់រះ នៅទីក្រុងប៉ារីស កាលពីថ្ងៃទី ១៣ វិច្ឆិកា ឆ្នាំ២០១៥។ ភេរវកម្ម បង្កឡើងដោយបណ្តាញជនជីហាតនៅបារាំង និងមកពីប៊ែលហ្ស៊ិក ហើយដែលជាប់ពាក់ព័ន្ធជាមួយ ក្រុមជីហាតអង្គការរដ្ឋអ៊ីស្លាម នៅអ៊ីរ៉ាក់ និងស៊ីរី។ អំពើភេរវកម្មនេះ បានផ្តាច់ជីវិតមនុស្ស ចំនួន១៣0នាក់ និងរបួស ៣៥២នាក់។
ចុះផ្សាយនៅថ្ងៃ៖
ស្តាប់ - ០៣:១៧
នៅវេលាម៉ោង ៩និង២០នាទីយប់ ថ្ងៃទី១៣វិច្ឆិកា ២០១៥ សំឡេងផ្ទុះ បានបន្លឺឡើង នៅក្បែរពហុកីឡាដ្ឋានជាតិបារាំង ខណៈដែលមនុស្សជាច្រើនម៉ឺននាក់ រួមទាំងលោក ប្រធានាធិបតី ហ្វ្រង់ស្វ័រ ហូឡង់ ផង កំពុងតែទស្សនាការប្រកួតបាល់ទាត់ រវាងក្រុមជម្រើសជាតិបារាំង និង អាល្លឺម៉ង់។ ជនជីហាតបានបំផ្ទុះគ្រាប់បែកសម្លាប់ខ្លួន នៅក្បែរច្រកទ្វារចូលពហុកីឡាដ្ឋាន និងបានបណ្តាលឲ្យស្លាប់មនុស្សម្នាក់ទៀត ដែលនៅក្បែរនោះ។
ប្រសាសន៍របស់លោក ហ្វ្រង់ស្វ័រ ហូឡង់ អតីតប្រធានាធិបតីបារាំង
៥នាទីក្រោយមក នៅកណ្តាលក្រុងប៉ារីសឯណេះ ក្នុងសង្កាត់លេខ១០ ភេរវជនបានជិះរថយន្ត ប្រើកាំភ្លើងយន្តបាញ់រះ ជាងមួយរយគ្រាប់ ទៅលើមនុស្សម្នា ដែលអង្គុយពិសារភេសជ្ជៈ និងអាហារ នៅបារ Le Carillon និងបានបាញ់រះទៅលើភោជនីយដ្ឋានអាហារខ្មែរមួយដ៏ល្បី ឈ្មោះ Le Petit Cambodge ដែលស្ថិតនៅទល់មុខនោះ។ ទីតាំងនេះ មានមនុស្សស្លាប់ ១៥នាក់ និងរបួស១០នាក់។
ម៉ោង ៩និង៣០នាទី ជនជីហាតម្នាក់ទៀត បានបំផ្ទុះគ្រាប់បែកសម្លាប់ខ្លួន នៅក្បែរពហុកីឡាដ្ឋាន តែមិនបានបង្កឲ្យមានអ្នករងគ្រោះទេ។ ម៉ោង៩ និង៣២នាទី នៅកណ្តាលក្រុងប៉ារីស ជនជីហាតជិះរថយន្តពណ៌ខ្មៅ បានបាញ់រះចំនួនជាង១០០គ្រាប់ទៀត ទៅលើមនុស្សម្នា ដែលអង្គុយពិសារភេសជ្ជៈនៅខាងមុខហាង La Bonne bière បណ្ដាលឲ្យស្លាប់មនុស្ស៥នាក់ និងរបួស៨នាក់។
ម៉ោង៩ និង៣៦នាទី នៅទីតាំងភោជនីដ្ឋាន La belle équipe ក្នុងសង្កាត់លេខ១១ ក្រុមជនជីហាតបានបាញ់រះ ប្រមាណជាង១០០គ្រាប់ដែរ បណ្តាលឲ្យស្លាប់មនុស្ស១៩នាក់។ ហើយនៅមិនឆ្ងាយប៉ុន្មានពីទីតាំងនេះ ត្រង់ចំណុច ហាងបារ Le Contoire Voltaire ជនជីហាតម្នាក់បានបំផ្ទុះគ្រាប់បែក បណ្តាលឲ្យរបួសមនុស្សជាច្រើននាក់។
ក្នុងសង្កាត់លេខ១១ដែរ ម៉ោង៩និង៤០នាទី ភេរវជន៣នាក់ បានបន្លំខ្លួនចូលទៅក្នុងទីតាំងសាលប្រគុំតន្ត្រីរ៉ុក Le Bataclan ខណៈដែលមនុស្សជាច្រើនរយនាក់ កំពុងតែស្តាប់និងរាំសប្បាយ ជាមួយនឹងការប្រគុំតន្រ្តី។ ក្នុងពេលដែលជនជីហាតទាំង៣នាក់ កំពុងតែបាញ់រះ និងចាប់មនុស្សធ្វើចំណាប់ខ្មាំង នៅខាងក្នុងទីតាំងសាលប្រគុំតន្ត្រីនេះ នៅឯពហុកីឡាដ្ឋានជាតិបារាំងឯណោះ សំឡេងផ្ទុះទី៣បានបន្លឺឡើង នៅវេលាម៉ោង ៩និង៥៣នាទី ដោយជនជីហាតម្នាក់ទៀត បានបំផ្ទុះគ្រាប់បែកសម្លាប់ខ្លួន តែមិនបណ្តាលឲ្យមានអ្នករងគ្រោះទេ។
ដំណឹងនៃ ការវាយប្រហារភេរវកម្មទ្រង់ទ្រាយធំ ក្នុងទីក្រុងបារីស បានចាប់ផ្តើមផ្សព្វផ្សាយតាមបណ្តាញព័ត៌មាន ធ្វើឲ្យមានការចលាចល និងស្មារតីភ័យខ្លាច អមជាមួយនឹងសំឡេងស៊ីរ៉ែន រថយន្តសង្គ្រោះបន្ទាន់ និងរថយន្តនគរបាល យ៉ាងកងរំពង។ នៅម៉ោងប្រមាណជា ១២និង២០នាទីរំលងអាធ្រាត្រ សមត្ថកិច្ចពិសេសបារាំង បានសម្រុកចូលទៅក្នុងទីតាំងប្រគុំតន្រ្តី Le Bataclan ដើម្បីរំដោះចំណាប់ខ្មាំង។ ភេរវជនទាំង៣នាក់ បានបំផ្ទុះអាវកាក់គ្រាប់បែកសម្លាប់ខ្លួន នៅពេលសមត្ថកិច្ចបានសម្រុកចូលទៅដល់។ ជនរងគ្រោះ នៅក្នុងទីតាំងប្រគុំតន្រ្តី Le Bataclan មានស្លាប់ចំនួន៨៩នាក់ និងរបួសជាច្រើននាក់។
ភេរវកម្ម នៅយប់ថ្ងៃទី១៣វិច្ឆិកាឆ្នាំ២០១៥ នៅទីក្រុងប៉ារីស បានសម្លាប់ជីវិតមនុស្សចំនួន ១៣០នាក់ និងរបួសជាង៣៥០នាក់។ យោងតាមការអង្កេតរបស់សមត្ថកិច្ចបារាំង វាគឺជាស្នាដៃ របស់បណ្តាញភេរវកម្មអ៊ីស្លាមនៅប៊ែលហ្សិក និងនៅបារាំង ហើយដែលជាប់ពាក់ព័ន្ធ ជាមួយនឹងបណ្តាញជីហាតអង្គការរដ្ឋអ៊ីស្លាម នៅអ៊ីរ៉ាក់ និងស៊ីរី៕
ប្រសាសន៍លោក គង់ សម្បត្តិ ជនជាតិខ្មែររស់នៅក្រុងប៉ារីស
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ